2 TIMOTE 3 - Ngawm Bible

Ni Dawltabel

¹ Ni dawlbel lam ten haksatnak hun tampi heng tuk tih cing leleng un hi.

² Mi tampi ten amu ca tuk bek ngaisung haw tuk, hampumzet haw tuk a, ultung zetin pualthauzet haw tuk hi. Mi nehsiah kawkawi in, a nu le pa tei thu hei el haw tuk hi. Lungdamnak tuk hei thei ngawlin biaknak vang imah in simsial haw tukma hi.

³ Mi hehpih thei haw tukma hi. Hehpih ningnatnak tih hei thei haw tukma hi. Mivat le deng nuamte haw tuk a, mi lauhuaizet hi haw tuk a, thilpha hua haw tuk hi.

⁴ Mi sonsia le zolthu son haw tuk a, mi ngaihsak dunnak nei haw tukma hi, ultungin pualthau haw tuk a, Pathian sangin amu tisa nopnak khi deih saw haw tuk hi.

⁵ Biaknak lamah, a pualam bekin pom haw tuk hi. Mahnaven a sunglamah a huham ngangai cu pom nuam haw tukma hi.

⁶ Mahtibang mihingte cu midang tei innah tumin, sualnak vanngit a puatu numeite, tisa deihnak i nehmi le

⁷ thutak thei nuamin zilh li naven a theithei ngawlmi numei nawmtam khi nehsiahin, zawnsak haw hi.

⁸ Jannes le Jambres cu Moses dodaltu a hih haw bangin thutak dodaltu hi haw hi. Hite hi phazetno in thu ngaisung thei ngawlmi, lungmu man ngawl le upnak lamah tingsam zetmi hi haw hi.

⁹ A tumtah haw mi cu khawlapi heng baan haw tukma hi: itahim titale mi hempoh ten a silnak haw khi thei paih haw tuk hi. Jannes le Jambres vang, mahti bangkek bok haw hi.

Dawltabel Nunhilhnak

¹⁰ Nang cu ka thuhilhnak, ka ziaza le ka nunsung a ka tumtah mite mu in zui zo ci. Ka upnak, ka thinsaunak, ka itnak le ka thuak theihnak,

¹¹ bawlsiat ka tawhnak le haksatnak ka thuakmi vang mu zo ci. Antiok, Ikonium le Listra khua a, nase zetin bawlsiatnak ka thuakte vang na theih khawngmi hi. Mahnaven Topa in mah sung pen pan suak hi.

¹² A kuakua hei hihen Khrih tuah a pehdunnak hangin Pathian deihzawngin nun a tumtu cu bawlsiatnak tawk haw tuk hi.

¹³ Mahnaven mipha ngawl le mi siasuak cu sualnak lamah zuan pepel saw tuk hi: mizol pepelin amuh vang zol co pepel bok haw tuk hi.

¹⁴ Mahnaven nang cu na theihsa mi le kho zetin na upmi thutakah kho zetin ding lelengin hi. A zilhtu a kuate hum tih khi thei ci.

¹⁵ Lai Thiangtho cu na naupangno lai pen pan thei zo ci tih khi phawkngil pahsun hi. Mah Lai Thiangtho cu Khrih Jesuh na upnak hangin nunpatnakah a hentu, cihnak a piatu hi.

¹⁶ Lai Thiangtho hempoh hi Pathian i tiik hangin ngatmi hi, thutak cunnak, hilh sualmi elnakah le a sualmi leplehnak, nisial nuncan pha nun theihnak tuk hilhdunnakah pha hi.

¹⁷ Mahti bangin Pathian na a dektu cu mi cangkim hi tuk a, na pha namkim bawl tukin thuam cangkim a neimi hi tuk hi.