2 TIMOTE 1 - Ngawm Bible

¹ Khrih Jesuh tuah a pehzom uhnak hangin a tepsami nunnak thu phuang tukin, Pathian lungkimnak tuah Khrih Jesuh i tiikmi keimah Paul in;

² Ka ihmi ka capa Timote aw, na lakah laikuat ing. Pa Pathian le Khrih Jesuh ohtei Topa in hehpihnak le lemdaihnak thupha pia tahen.

Lungdam Thuhilhnak le Thapiaknak

³ Ka pu le pa tei a deh haw mi le lungmu thiangtho zetin ka deh bokmi Pathian nelah lungdam thu hilh ing. Sun le zan thungenin nangmah ka phawh sial ten Pathian nelah lungdamthu hilh ing.

⁴ Na hitui caknakte cinglengin, phawk leleng ing. Ka lungdamnak cangkim tukin nangmah ka tawk thei ahin nuamzet ing.

⁵ Upnak cangcian na neihmi thei leleng ing. Mahmi upnak cu napi Lois le na nu Eunice tei neihmi upnak hi. Atu-in mah upnak cu nei lai tuk ci tih um ing.

⁶ Mah hangin na lu humah khutsuanin thupha piaknak ka bawl laihin, Pathian i piakmi laksawng cu nung leleng tukin cingkhawi in, tih ka theihtiknak hi.

⁷ Itahim titale Pathian i piakmi Hawvang Thiangtho in ngalnawm tukin bawl ma hi: huham, itnak le mah le mah ukdun theihnak tuah dimtik saw hi.

⁸ Ohtei Topa i thu cu, hilh tukin na zakca pahsun hi. Khrih ca in thawngta mi keimah hangin zakca in um pahsun. Pathian in thazaang a piak bangin Thuthangpha ca in cimnak thuak ngam saw in hi.

⁹ Pathian in ama mihing hi tukin samin, nunpan zo hi. Mahti bangin a nunpatnakah eimu bawl theihmi a um hang hi ngawlin, a hehpihnak le tumtahnak a neih hang hi saw hi. Hi a hehpihnak cu Khrih Jesuh lak pen hun a pat laih ngawlin pia zo hi.

¹⁰ Mahnaven pantu Topa Khrih Jesuh a hunsuk hangin atu-in eimu lakah langtik hi. Thihnak hi ngu cu botikin, Thuthangpha sungah kumkhua nunnak ngahtik zo hi.

¹¹ Pathian in Thuthangpha phuang tukin kamtai le zilhtu ah teng zo hi.

¹² Hi bangin ka thuaknak cu mahmi hangin hi. Mahnaven ka muansanmi akua him tih ka theih hangin lungmuannak a dimin nei ing. Mah hangin ka khut sungah a keptikmi cu mah ni khua a hen tianin himdamno in, amah in cingkhawi tuk hi tih cangcian zetin thei ing.

¹³ Ka hilh sami thuman cu khim zetin len inna, na zui tuk le na zohteh tukin phano koihin, Khrih Jesuh tuah a pehdunnak uh hangin a ngah uhmi upnak le itnak sungah kho zetin um un.

¹⁴ Eimuh tei sung a nungmi Hawvang Thiangtho i huhamin nangma lak a piakmi na phate cu phazetno cingkhawi in hi.

¹⁵ Asia peng sung a ummi hempoh ten nunghekin taisan khawng haw zo tih cu thei ci, mah sungah Figelas le Hermogenes vang tel bok haw hi.

¹⁶ Mahnaven Onesiforas in vei tampi ka lungnoptik a hih hangin Topa in, a hehpihnak cu amu innkua sungah hengtik tahen.

¹⁷ Thawnginn sung ka umlaih hei in zahcakpih ngawlin Rom khua a hen bek ten amuh laklawh zei hi.

¹⁸ Mah ni ten Topa in hehpihnak pia tahen! Mahten Efesa khua pen itihzah tian ka ca in nadek haw him tihvang thei ciangzet ci.