2 Samuel 3 - Ngawm Bible

¹ Saul i innkuapihte a pantu ngalkapte le David le a ngalkapte cu ngeipi dodun leleng haw hi. David cu ni khat nung ni khat cak dedeuhin, a ngalte cu ni khat ung ni khat zulzau dedeuh haw hi.

David i Capate

² Hebron pen a suakmi David capate cu a nuailamte haw hi. Pa khatnak cu Amnon, a nu cu Jezreel khua mi Ahinoam hi.

³ A pa nihnak Chileab, a nu cu Nabal thihsan mi, Karmel khua mi Abigail hi. A pa thumnak cu Absalom, a nu cu Geshur ngam kumpi Talmai canu Maakah hi.

⁴ A pa linak cu Adonijah, a nu cu Haggith hi. A pa nganak cu Shefatiah, a nu cu Abital hi.

⁵ A pa luknak cu Ithream, a nu cu Eglah hi. Hih capate cu Hebron khua pen suak haw hi.

David Lakah Abner Kopleh

⁶ Saul innkua pantu ngalkapte le David ngalkapte a dodunnak haw a ngei pepel ten Saul innkua pantu ngalkap tei lak pen Abner cu thuneitu in suak dedeuh hi.

⁷ Ni khatin Saul i capa Ishbosheth in Abner cu Saul zineu, Aiah i canu Rizpah tuah zaukawm haw hi, tin sualnawn hi.

⁸ Hi thu hangin Abner cu a thinukzet hi. “Saul sonsia tukin kei um cim? Judah nadektu in maw na ngaihsut ngangai uh?” tin au hi. “A pat tung pepan na pa Saul, a unaute le a ngualcamte hangin na hum uhah thungaitu hi lelengtu ing, David i nadehnak pen vang nangmah pan ing. Mahnaven tuni numei tuah sualnawn ci!

^9-10 Hi ngam cu Saul le a casuan tei lak pen la in, David cu Israel le Judah ngam langkhat mawk pen langkhat mawk tian uk khawngtu kumpi in bawl tung tin, Topa Pathian in, David cu tiam zo hi. Hi thu hi ka kimtik ma tale Pathian in vat hum hen!” ti hi.

¹¹ Ishbosheth in Abner cu lau leita in kam khat hei don ngam ma hi.

¹² Abner in David umnak Hebron ah palai hahin, “Hi ngam hi akua in uk cuang tuk kaw? Keimah tuah lungkimnak bawlin Israel ngam na neh khawng theihnak tukin bawm tung hi,” tin cah hi.

¹³ David in, “Pha hi! Lungkimnak bawl tung. Mahnaven ka lakah na hun ten Saul i canu Mikhal na pui thei tale bawl thei tung,” ti hi.

¹⁴ Ishbosheth lak hei ah David in palai hahin, “Ka zi Mikhal pia lehin hi. Amah co theihnak tukin aman cu Filistin mi za khat tei vuncep pia ing,” ti hi.

¹⁵ Mah hangin Ishbosheth in Mikhal cu Laish i capa a pasal Paltiel lak pen pui kikleh hi.

¹⁶ Paltiel in, a zi Mikhal cu a phal ngawl hangin kapthahin, Bahurim khua tiang zui hi. Abner in, “Kik tohin hi,” tin Paltiel cu hilh hi.

¹⁷ Abner cu Israel hotu tei lakah hawhin, “David na kumpi tukin, na deihnak uh cu ngeipi zo hi.

¹⁸ Atu hi na ca uhin hun lemcangbel hi. ‘Topa Pathian in, ka salpa David mang tung a, ka mihing Israel cu Filistin mite le a ngamdang tei khut sung pepan tung hi,’ tin, a tihmi thei khawng uh ci,” ti hi.

¹⁹ Abner cu Benjamin hinnamte vang thuhilh thah pepelin, mahnung ten Israel le Benjamin hinnam tei lungkimnak hilh tukin Hebron a, David lakah hawh hi.

²⁰ Hebron a, David lakah Abner cu mi sawm nih tuah hawhin, David in amu ca in an eih puai bawlsak hi.

²¹ Abner in David lakah, “Maw, kumpi pa, hawh nang inna, Israel ngam cu a venghawngin, na uknak sungah hengtik tung hi. A kumpi haw in, nang cu pom haw tuk poh hi. Na lungtupmi ngahin, hi ngam cu a buppi in, uk tuk ci,” ti hi. Abner cu David in lungmuang zetin hawhtik hi.

Abner That Haw

²² Mahnung ten Joab le David i ngalkapte cu ngalsimnak haw pen kikin, a lon haw na tampi keng haw hi. Abner cu himdamno in David in, a hah zo hangin Hebron ah umma toh hi.

²³ Joab le a ngalkapte a hen haw ten a lak hawah Abner cu David kumpipa i lakah hungin himno in, David in kuat kikleh zo hi, tin hilh haw hi.

²⁴ Joab cu David lakah hawhin, “I kaw na bawl? Na lakah Abner hungin, ita mahti bangin hawhtik nge cim?

²⁵ Nangmah zol nuamin le na hawhnak hempoh le na bawlmi hempoh thei ciang nuamin, na lakah hung hi. Mahmi cu thei ma cim?” tin ti hi.

²⁶ David lak pen a hawh nungten Abner pui tukin Joab in mi hahin, Sirah tuikhuk pen kik pihleh haw hi. Mah thu cu David in imah thei ma hi.

²⁷ Abner cu Hebron a henpih haw ten thukuh hilh tuk bangin kongka elah Joab in hawhpihin, a thin pen sunin, Joab in Abner cu that hi, itahim titale a naupa Asahel a thah zo hangin phu laleh hi.

²⁸ David in mah thu a zak ten, “Ka mihingte le kei in Abner a thahnak haw thu thei hihim ma ung hi, tih cu Topa Pathian in thei hi.

²⁹ Dantatnak cu Joab le a innkua tei humah heng hen, khan khat nung khan khat, Joab i innkua tei lakah vonsawk thisan nat maw, phaaknat maw, ahimata elkunmi maw, ngaldonakin thihnak maw, ahimata mi ca-ngah an ngenin vakmi in um zal tahen,” ti hi.

³⁰ Gibeon a, a dodunnak hawah Abner in, a nau Asahel a thah hangin Joab le Abishai in Abner cu that haw hi.

Abner Vui Haw

³¹ David in Joab le a mihingte cu a puante botbal a, thangkhau puan silhin Abner kah tukin thupia hi. A vui haw ten a luang koihnak thingkuang nunglamah David kumpipa cu a ke loli in hawh hi.

³² Abner cu Hebron ah vui in khanah David kumpipa cu nase zetin kap hi. Mi hempoh kap khawng haw hi.

³³ David in la tuah kahin; “Misil bangin Abner thi cim?

³⁴ Na khut ken haw ma, Na ke hei ken haw ma; Misual tei thahmi bang ci” ti hi. Mi hempoh vangin kah lehleu haw hi.

³⁵ Nitum laih ngawlin an ei tukin David cu a mihing ten hilh li haw naven nuam ma hi. “Nitum laih ngawlin i poh ka ei sangin Pathian in kei cu that saw hen,” tin thutiam hi.

³⁶ Mahti bangin a tih cu mipi ten amuh haw ten lungkimzet haw hi. Kumpipa i bawlmi hempoh cu a lungkim pih ngeh haw hi.

³⁷ Abner i lu bonakah kumpipa tel kha mah hi tih cu David i mihing hempoh le Israel mi hempoh ten thei haw hi.

³⁸ David Kumpi in, a khutnuai bawi tei lakah, “Tuni in Israel ngam puitu mipha, mi muantak pa khat thi hi, tih hi thei uh cim maw?

³⁹ Keimah cu Pathian i tenmi kumpi hi naveng tuni cu ka thinnau ngangai hi. Hi Zeruiah capate cu ka ca in thuak hakzet haw, amu bawlmi bangbokin hi misual tei humah Pathian in dantatnak hengtik zal hen,” ti hi.