2 Samuel 22 - Ngawm Bible

David Ngalnehnak La

¹ David Kumpi cu Saul le midang a ngal tei khut sung pen Topa Pathian in, a luattik ten Topa i lak a sakmi la cu a nuailamte hihi.

² Topa cu keimah pantu hi. Amah cu a kho mi ka ngal kulhtian hi.

³ Ka Pathian cu keimah humtu hi, amah cu ka himnak hi, Amah in lumphaw bangin hupin, a pat hangin him ing. Topa cu keimah pantu le huptu hi in, thisan luannak mun pen luattik hi.

⁴ Topa cu sam ing a, ka ngal tei khut sung pen luattik hi. Topa cu thangphat un!

⁵ Thihnak tuicawkin kei kiimin, siatnak tuicawk ten ka humah khuh haw;

⁶ A lauhuai thihnak cu ka elkimah dim, khankhukin kei thang siah hi,

⁷ Ka lungbingin Topa i lakah au ing, ka Pathian nelah bopnak ngenin, a biakinn sungah ka aw zain, bop ka ngetnak cu ngai hi.

⁸ Topa cu a thinuk hangin, leihumpi hing hi; vanmawk tianin hing khawng hi.

⁹ A naal sung pen meikhu suah hi. A kam pen mei alh le meiling tul hi.

¹⁰ Topa in van cu lipin, tolh hi. Khawnimte cu a ke nuai ah koih hi.

¹¹ Cherubim khungin tolh hi, huih bangin manlang zetin leng hi.

¹² Khuathim tuah zialdunin, khua nim sah zetin kim hi.

¹³ Amai khuaphelep sung pen, meiling tul zawzuak hi.

¹⁴ Topa cu van pen, vanthum bangin thum hi. Cungnungbel Topa i aw cu nging dudum hi.

¹⁵ A thalcangte cu kapin; a ngalte cu lengkek khawng haw hi. A khuaphelepin, a ngalte cu tai khawng hi.

¹⁶ Topa in, a ngalte cu liatin, a thinukin, a thum ten, Tuipi thuanthum taw tian le leipi mawk tianin lang khawng hi.

¹⁷ Topa in van pen sawksuk a, kei cu man ngah hi. A thuk zetmi tui sung pen kei cu suah hi.

¹⁸ Ka ca in, a cak zetmi ka ngalleh, kei a haw tu tei khut sung pen pan zo hi.

¹⁹ Ka lungbing laihtakin kei cu do haw hi. Mahnaven Topa in kei cu hup hi.

²⁰ Launak mun pen kei cu puitulin, zalennak munah henpih hi. Ka humah a lungdam hangin, kei cu hup hi.

²¹ Midik ka hih man cu Topa in kei pia hi. Mawhnak ka neih ngawl hangin muicu pia hi.

²² Topa i piakmi daan cu zui ing, ka Pathian cu langpang awng mang.

²³ Ama daan hempoh cu zui ing. A thupiakmite el awng mang.

²⁴ Sualnak cu pial ing, soiselnak ka humah umma hi tih cu thei ing.

²⁵ A dikmi ka bawl hangin Topa in laksawng pia hi. Mawhnak nei ngawl ka hihlam a theih hangin laksawng pia hi.

²⁶ Muantakmi tei lakah muantak Topa hi ci. A cangkimmi tei lakah cangkim mi Pathian hi ci.

²⁷ Mi thiangtho tei humah thiangtho ci. Mi awklawl humah, ticikcek ci.

²⁸ Mi nuai ah niamkhiat theite cu pan ci. Mi ultungte cu nemsuk ci.

²⁹ Topa aw, nang cu ka khuavaknak hi ci, ka thimnak hempoh cu vaktikin;

³⁰ Ka ngalte do tukin thazaang pia ci. A ngal kulhtian lek thei tukin, cahnak huham pia ci.

³¹ Hi Pathian i na bawlte hi cangkim zetin, a thute cu iti zahin, muantak haw him! Ama humhimnak a zeitu tei ca in, amah cu ngal lumphaw bang hi.

³² Topa amah bek Pathian hi, Pathian amah bek a ngal lumphaw uh hi.

³³ Pathian cu a cangkim zetmi ka ngelhnak hi, Amah in ka lampi tuangtik hi.

³⁴ Ka ke cu sazuk ke bangin manlangin hi. Mualhumah himdamno in umtik hi.

³⁵ A khohbelmi thal le thalcang mang thei tukin, ngaldo hilh hi.

³⁶ Topa aw, nangmah in hupin kei cu luattik ci, Kei cu bawmin mi thupi in suaktik ci.

³⁷ Matnak tawk ngawlin kei cu luattik ci, bahnak tawk awng mang hi.

³⁸ Ka ngalte cu hilin, siatsuah khawng ing hi, Ka neh khawng laklawh pin awng mang hi.

³⁹ Vatvawk ing a, tho thei ngawltohin, ka ke bulah bok vawk haw hi.

⁴⁰ Ngaldonak tukin cahnak pia ci. Ka ngalkap tei humah nehnak pia ci.

⁴¹ Ka ngalte cu ka lak pen taitik ci. Kei a huatute cu siatsuah khawng ing.

⁴² Bopnak ngen haw naven kuamah in pan thei haw ma; Topa sam haw naven, a aunak haw don ma hi.

⁴³ Ngawi ing a, leivul bangin cang haw in, Cilpekin, a, lampi ah cinciak bangin cang haw hi.

⁴⁴ Keimah a dodaltu tei lak pen luattikin, miphun tampi humah uktu bawi in bawl hi. Ka zak awng ngawlte vang ka ukmi in suak haw hi.

⁴⁵ Ngamdang mite ka mai ah kun haw in, ka thupiakmi zui haw hi.

⁴⁶ Ngamdang mite a thinnau in, a kulhtian sung pen cantawtokin tul haw hi.

⁴⁷ Topa cu a nung hi! Ka belhnak suangpi cu thangphat un! Pathian thawm ngengnak cu thangtik un, ka nunpatnak suangpi cu!

⁴⁸ Ka ngal tei humah nehnak pia ci, ka khutnuai mihingte cu bawlsia in,

⁴⁹ Ka ngal tei khut sung pen kei luattik hi. Topa aw, ka ngal tei humah nangmah in nehnak pia ci. Mi siatsuahtu tei khut sung pen hup ci.

⁵⁰ Mah hangin miphun hempoh tei lakah nang cu thangphat tung hi. Na lakah thangphatnak lasa tung hi.

⁵¹ Pathian in, a kumpi lakah nehnak pia hi. A tensa David le a casuan lakah, a cat ngawlmi a itnak cu kumkhua in langtik hi.