2 Samuel 2 - Ngawm Bible

David Cu Judah Kumpi In Cang

¹ Mah nungten, David in, “Judah ngam khua pa kha khatah hawh nang maw? tin Topa dong hi. “Hawhin hi,” tin Topa in ti hi. David in, “Ilai khua ah kaw ka hawh tuk?” tin dongleh hi. Topa in, “Hebron ah hawhin,” ti hi.

² Mah hangin David cu a zi pa nih: Jezreel khua mi, Ahinoam le Nabal i thihsanmi Carmel khua mi Abigail tuah Hebron ah hawh hi.

³ A mihing ngalkapte le a innkuapihte vang hawhpihin, Hebron khua ah um hi.

⁴ Judah mite Hebron khua ah hungin, Judah kumpi tukin David cu sathau thih haw hi. Gilead ngam Jabesh khua ten Saul cu vui haw tih, David in, a zak ten,

⁵ mi hahin, “Na bawipa uh Saul humah upatnak nei in phano in, na vui uh hangin Pathian in muicu pia zal tahen.

⁶ Atu-in Topa in laingatnak le muantak tuah umpih leng ta hen. Hiti bangin na bawl uh hangin kei vangin phano in nangmuh zo bok tung hi.

⁷ Cak unna, na ngalpha un. Na kumpi uh Saul cu thi zo hi, atu-in keimah cu Judah miten a kumpi haw tukin sathau thih zo haw hi,” tin thu cah hi.

Ishbosheth Cu Israel Kumpi In Cang

⁸ Ner i capa Abner, Saul ngalkap hotu cu Saul i capa Ishbosheth tuah tai in, Jordan ngun ngal Mahanaim ah heng haw hi.

⁹ Mahlai munah Abner in Ishbosheth cu kumpi tukin bawlin, Gilead, Asher, Jezreel, Efraim le Benjamin ngam le Israel ngam buppi in uk hi.

¹⁰ Kumpi a can ten Ishbosheth cu kum sawm li hi in, kum nih sung uk hi. Mahnaven Judah hinnam ten David panin,

¹¹ David in Judah cu Hebron khua pen kum salih le lang sung uk hi.

Israel le Judah Dodun Haw

¹² Abner le Ishbosheth ngalkapte cu Mahanaim pen tulin Gibeon khuapi ah hawh haw hi.

¹³ Joab, a nu Zeruiah le David ngalbawite cu tuinim umnakah tawkdunin, tuinim i lang khatlam le lang khatlamah panmun la haw hi.

¹⁴ Abner in, “A tangvalte uhte tul veve in pa khat le pa khat tawngdun haw ahin pha tuk hi,” tin Joab cu ti hi. Joab in, “Mah pah ni,” ti hi.

¹⁵ Mah hangin Ishbosheth le Benjamin phun ai-awh mihing sawm le pa nih tulin, David mihing ai-awhin sawm le pa nih tul bok haw hi.

¹⁶ A dodun haw ten a ngal tek tei lu pen manin, a thinah a ngalnam tuah a dawh haw hangin munkhatah a venghawng lumin, thi khawng haw hi. Gibeon el a, mah mun cu, “Ngalnam mun” tin sam vawk haw hi.

¹⁷ Mahten nasezet dodunin, Abner le Israel mite cu David ngalkap ten neh haw hi.

¹⁸ Zeruiah i capa pa thum Joab, Abishai le Asahel tel bok haw hi. Sazuk bangin tai cak Asahel in,

¹⁹ Abner cu khua dang hek ngawlin hil ngut hi.

²⁰ Abner cu nunglam hekin, “Asahel hi cim?” tin ti hi. “Mahzuh hi, Asahel ing hi,” tin don hi.

²¹ Abner in, “Hil toh pahsun!” “Ngalkap pa kha khat hil saw inna, a ken mi cu sut saw in,” ti hi. Mahnaven Asahel in hil leleng hi.

²² Abner in, “Hil toh pahsun hi! That ngangai tuk pah ing cuh. Ka that tale itin na u Joab cu tawk ngam tuk kam ing?” tin ti hi.

²³ Mahnaven Asahel in cawlngawl hil leng hi. Mah hangin Abner in, a ceipi cu nunglam hek vutin khawh a, Asahel cu a thin pen a nunglamah paihlet vawkin khawh ngah hi. Asahel cu lumin thi hi. Asahel luang umnak a hen haw ten kuakua hei hihen cawlin, mahlai ah ding haw hi.

²⁴ Mahnaven Joab le Abishai in Abner cu hillehin, nitum susul ten Giah pen nisuahnak lam, Gibeon ngam hawhnak lampi a um Ammah mual heng haw hi.

²⁵ Benjamin mite cu Abner lakah khawmdunin, mualhumah panmun bawl haw hi.

²⁶ Abner in Joab lakah au in, “Hi tin maw kumkhua in, a dodun leleng tuk uh? A tawpnak ten huatdunnak suak kha tuk hi, tih thei ma cim? Kohte cu na hinnam pih loli ung hi! Na mihing ten a hil haw hi, kham ngawlin maw na um leng tuk?” tin ti hi.

²⁷ Joab in, “Mahti bangin na awn tul ngawl a hin, a nungmi Pathian min salin hilh ing hi; ka ngalkap ten zingtianin, hil leleng haw tuk laih naven,” ti hi.

²⁸ Joab in pengkul tumin, a ngalkap ten Israel mite cu hil haw ngawl toh hangin a dodun haw cu cawl haw hi.

²⁹ Abner le a ngalkapte cu Jordan ngun mawk munlawnah zan khua hawh haw a, Jordan ngun a kaltan nung a zingsun tian hawhin, Mahanaim heng haw hi.

³⁰ Abner a hil haw ngawl nungten Joab in, a ngalkapte cu khawmin, Asahel sialcih ngawlin sawm le kuah kim haw ma tih cu thei hi.

³¹ David ngalkap ten Benjamin hinnam, Abner ngalkapte za thum le sawm luk that haw hi.

³² Joab le a ngalkap ten Asahel luang cu zawngin Bethlehem a innkua khanah vui haw hi. Zan khua hawh haw in, a zing zingtungno in Hebron ah hengleh haw hi.