2 Samuel 19 - Ngawm Bible

Joab In David Liat

¹ David Kumpipa cu kap lelengin, a capa Absalom ngai in um hi tih Joab hilh haw hi.

² Kumpipa mithi ngai in um hi tih cu David i ngalkap hempoh ten a zak haw ten a venghawng haw ca in mah ngalneh ni cu lungsiatnak hi saw in suakta hi.

³ Ngalkapte ngal a sun haw ten zakca in, a tai ngalkap bangin khuapi sungah thawm nei ngawlin tum haw hi.

⁴ Kumpipa cu a mai hupin, “Absalom ka capa! ka capa Absalom ka capa!” tin nase zetin kap li hi.

⁵ Joab cu kumpipa i innah hawhin, a lakah, “Nangmah le na capa le canute, na zi le na zi neu tei nunnak a huptu ngalkapte cu tuni in zakcatik ci.

⁶ Nangmah a ittute mitkemin, nangmah a huatute saw cu deih ci. Na ngalbawite hihen, na ngalkap hihen, na ca in imah hi ma ung tih ciangno in langtik zo ci. Tuni in Absalom nungin, keimuh saw hi ka thi uh a hin, na lungkimzet tuk hi tih cu mu ing.

⁷ Atu-in hawh inna, na ngalkap tei lakah thapiaknak thu dem bek hilhin hi. Na hilh nuam ma tale Topa i min salin hilh ing hi; zingten ngalkap pa khatno hei na lakah um haw tukma toh hi. Na khangno lai pepan na nunsung na tawhmi haksatnak hempoh lak pen mahmi cu haksabel hi tuk,” ti hi.

⁸ kumpipa cu tulin khuapi kongkhah elah khung hi. Mahlai ah um tih a zak haw ten a lakah hung khawng haw hi. Absalom lakah a tangtu Israel mite cu tai in amu inn tenah pin haw hi.

Jerusalem Ah David Pinkik

⁹ A ngam buppi in, a sonbelmi cu, “A kumpipa in ngal tei khut sung pen hupin, Filistin tei khut sung pen ohte cu suakcatik zo a, atu-in, Absalom i hangin amah hei a ngamsung uhah umma toh hi.

¹⁰ Absalom cu a kumpi tukin sathau thih nave hung ngaldonakah thi zo toh hi. Ita kumpi David kikleh tukin kuamah in ngaisung ma kam hung,” ti hi.

¹¹ Israel tei son lihmi thu cu David lakah heng hi. Mah hangin thiampi Zadok le Abiathar cu Judah puitu tei lakah hahin, “Kumpipa a innah kiktik tukin ita cuamduang kam uh ci?

¹² A innkuapih le ama thi le sa loli uh ci. Ita a kihlehnak tuk thu ah vaidawlbel uh cim? tin ti un hi,” ti hi.

¹³ David in, a lakah Amasa lakah hilh tukin hi bangin cah hi. “Nang hi ka unau pih hi ci. Tu pepanin Joab ai-in ka ngalkap hotu tukin bawl tung. Ka bawl ma tale Pathian in keimah that hen,” ti hi.

¹⁴ Mahti bangin David awnkam a um hangin Judah mi hempoh tei lungmu cu hekkik khawngin, na khutnuai bawite tuah kikleh un hi tin, David cu cah haw hi.

¹⁵ Mah hangin David cu kikin, tui ngal lamah pui tukin Gilgal pen a hungtu Judah miten Jordan Ngun pen muak haw hi.

¹⁶ Mahlai takin, Behurin khua pen Gera i capa, Benjamin mi Shimei cu kumpi David tawk tukin Jordan lamah tai bok hi.

¹⁷ Shimei cu Benjamin hinnam mihing thawng khat tuah hawh haw hi. Saul innkua tei umlawh Ziba cu a capa sawm le pa nga le a umlawh sawm nihte tuah kumpipa i mai Jordan ngunah heng hi.

¹⁸ Ngun cu kaltanin kumpipa i innkuate ngalkhat lamah pui bawmtu le kumpipa i kulmi hempoh bawltu in suak haw hi. Kumpipa in tui a kaltan tuk ten Shimei cu a mai ah bokin,

David In Shimei Hehpih

¹⁹ “Maw kumpi pa, Jerusalem pen na tul ni a, ka bawl sual mite cing leleng zal pahsun. Ka hum a thinuknakin ngaisung phal toh pahsun hi.

²⁰ Bawipa, sual ing hi tih ka theih hangin hi, saklam miphun hempoh sung pen masabelin, a tawk masabeltu ka hihnak cu,” ti hi.

²¹ Zeruiah i capa Abishai in, “Topa Pathian in kumpi in, a tel zo mi a tamsiat hangin Shimei cu thah kul loli,” ti hi.

²² Mahnaven David in Abishai le a u Joab lakah, “Akua in, na ngaihsutnak dong kaw? Ka ca in buainak piatu in suak tum uh cim? Atu-in Israel kumpi cu keimah ing hi, tuni in Israel mi pa khat hei thah hi haw tukma,” ti hi.

²³ Shimei lakah, “Kuamah in nang cu that hihim haw tukma hi,” tin thutiam hi.

David In Mefibosheth Hehpih

²⁴ Saul i tupa Mefibosheth vang kumpipa tawk tukin hawh bok hi. Jerusalem pen kumpipa tai in nehtu in, a kihleh laklawh Mefibosheth in, a ke som ma, a khamul hei met ngawlin a puan hei sawp ma hi.

²⁵ Mefibosheth cu Jerusalem pen hawhin kumpipa i lakah a hen ten, kumpipa in, “Mefibosheth, Jerusalem pen ka tul ten ita hung bokma kam?” tin dong hi.

²⁶ Mefibosheth in, “Maw kumpi pa, na theih bangin kei cu ka ke zawng hi. Na lakah hawh bok tukin ka laak khunnak bawlsakin, tin ka umlawhpa hah naveng kei cu zol hi.

²⁷ Na lakah kei cu sonsia bet lalaih hi. Mahnaven nang cu Pathian vancungmi bang na hih hangin pha na tihmi cu bawl pohin hi.

²⁸ Ka pa i innkua pih hempoh cu kumpi nangma thah khawng tuk takmi ung hi, mahnaven na cabuai ah an ei thei tukin kei bawl ci. Kumpipa, na lak pen hehpihnak hei ngen ngam tukmi kha lehma toh ing,” ti hi.

²⁹ Kumpipa in, “Na son tuk imah umma toh. Saul i leingam le na hempoh cu Ziba tuah sem un hi, tin ngaisung cat zo ing,” ti hi.

³⁰ Mefibosheth in kumpipa lakah, “Maw, bawipa nangmah cu nung le damno in, na kih theih zo nungsang, a venghawngin Ziba in nei poh hen,” ti hi.

David In Barzillai Hehpih

³¹ Jordan ngun ngalkhat lamah kumpipa hen bok tukin Gilead mi Barzillai vang Rogelim pen hung bok hi.

³² Barzillai cu tekzet toh a, kum sawm liat hi. Mihauzet hi a, Mahanaim kumpi a umlaihin cawmtu cu amah hi.

³³ Kumpipa in, a lakah, “Jerusalem ah keimah zui inna, phano in zo tung hi,” ti hi.

³⁴ Mahnaven Barzillai in, “Ngeipi nung tukma toh ing. Ita Jerusalem ah zui li tuk ing him?

³⁵ Kum sawm liat kim zo ing, mah hangin nun vang hi ka ca in man neileh sapma toh. Ka eih le ka in mite vang hi a uknak thei ma toh ing; numei hihen, pano hihen la mawi a sak haw mite vang za lehma toh ing. Kumpipa nangmah cimkham pia thong tung.

³⁶ Hiti lawlawmin, na hehpihnak co tukin tak hihim mang. Mah hangin Jordan ngun ngalkhat tian bek henta nang.

³⁷ kiklehtikin, na ka khua uhah ka nu le ka pa i khan elah ka nunnak cu bo tahen. Hilai ah ka capa Khimham um hi, kumpi pa, na lakah hawhpih inna, pha na sak babangin zo in,” ti hi.

³⁸ Kumpipa in, “Khimham cu hawhpih nang inna, na awi bangin zo tung hi. Na ngetmi hempoh vang bawlsak khawng tung,” ti hi.

³⁹ David le a mihingte cu Jordan ngun kaltan haw hi. David in Barzillai cu namin, muicu pia hi. Mahnung ten Barzillai cu a innah pin hi.

Judah le Israel Dondun

⁴⁰ Judah mi hempoh le Israel mi khenkhat ten kumpipa cu cingin, Jordan ngun a kaltan nungten Gilgal ah haw in, Khimham vangin zui hi.

⁴¹ Israel mi hempoh cu kumpipa i lakah hawhin, “Kumpipa, na mihingte hei hihen, na innkua le nangmah tianin, itakaw ka unau pih uh Judah miten amu bulta bang hamin, Jordan ngun ngal tian a cin lelengnak haw?” tin ti haw hi.

⁴² Judah miten, “Ita bawl tukma kam ung? Kumpipa cu ka phunpih uh si. Ita hi hangin thinuk kam uh ci? Amah in an do hi tin ngaisung uh cim? Laksawng pia hi tin um uh cim,” tin donleh bok haw hi.

⁴³ Israel miten, “Amah tuah phun khat na hi uh vangin kumpi David hi nangmuh sangin ham theihnak letsawmin nei ung. Ita kohte zawnsak kam uh ci? Thungai in titale, kumpipa kiklehtik tukin a tuangtim masatu cu keimuh ung hi,” tin ti haw hi. Mahnaven Israel tei awn sangin Judah mitei awnkam cu hang deuh ngangai hi.