2 Samuel 17 - Ngawm Bible

Ahithofel le Hushai Ten Absalom Ngaihsutnak Pia

¹ A ngei ngawlin, Ahithofel in Absalom lakah, “Ngalkap thawng sawm le thawng nih teng tung a, tu zan loli in David cu hil tung.

² A cawlzet laih takin le a thinnauzet lai takin do tung hi. A thinsu in, a mihingte vang tai khawng haw tuk hi. Mahlai takin, kumpipa amah bek that tung a,

³ mothak a pasal lakah a kihleh bangin a mihing hempoh cu ka lakah kihpihleh khawng tung hi. Na thah nuammi cu mi pa khat bek poh si. Midangte cu him khawng haw tuk poh,” ti hi.

⁴ Mah thu a zak haw ten ngaihsutnak phazet hi tin, Absalom le Israel puitu ten ngaisung haw hi.

⁵ Absalom in, “Hushai sam un, a hilhmi ngai bok nung,” ti hi.

⁶ Hushai cu hungin Absalom in Ahithofel i hilhmi hempoh cu Hushai lakah a hilh khawng ceng ten, “Ahithofel i ngaihsutnak hi zui nung maw? Nang na ngaihsutnak itin kaw?” tin dong hi.

⁷ Hushai in, “Tutum Ahithofel i ngaihsutnak a piakmi hi pha ma hi.

⁸ Na pa David le a ngalkapte cu ngaldo awng mek sa haw hi, mah hangin tupi sungah a cano lonmi vom bangin lauhuaizet haw hi tih cu za khawng ci. Na pa cu ngaldo awng mek sa a hih hangin zanah a ngalkap tei lakah cam ma hi.

⁹ Tulaihtakin suangbuk sungah maw, mundangah maw ngelh tuk hi. David in, na mihingte a do bok ten a zatu hempoh ten Absalom i ngalkapte cu sung zo haw, tin au li haw tuk hi.

¹⁰ kiosa bangin lau nei ngawl ngalphabel pa hei in lau in can tuk hi; itahim titale Israel ngam sungah kua hei in, na pa cu ngaldo thiamzet hi tih le a ngalkapte vang ngalhangzet haw hi, tih cu thei khawng haw hi.

¹¹ Kei i ngaihsutnak cu hi tih hi. Israel ngammawk khat, Dan pen khatlam mawk Beersheba tian Israel mi hempoh tuipi thuanthum el philnelah khawm inna, nangmah loli in ngaldonakah ho in hi.

¹² Ilai munah a um zongin, David cu mu tukin zei inna, a theih man laih ngawlin daita bangin nam tuk hung hi. Amah hihen, a mihingte hihen pa khat hei luat haw tukma hi.

¹³ Khua pa kha khat sungah a tum vangin a mihing uhten khau kengin, mah khua cu suang pa khat hei tang ngawl toh tianin dok vawk khawng tuk hung,” ti hi.

¹⁴ Absalom le Israel miten, “Hushai i ngaihsutnak cu Ahithofel i ngaihsutnak sangin pha saw si,” tin ti haw hi. Absalom humah siatnak heng tukin Ahithofel i ngaihsutnak pha saw cu Topa in khel lehdentik hi.

David Suakca

¹⁵ Absalom le Israel puitu tei lakah ngaihsutnak a hilhmi le Ahithofel i ngaihsutnak piakmi hempoh cu Hushai in thiampi Zadok le thiampi Abiathar lakah hilh khawng hi.

¹⁶ Hushai in, “Nawhkhah un! David lakah thucah unna, tui tannak munah zan khat hei cam toh pahsuh hen. Amah hei hihen, a mihingte hei hihen mat le thah a thuak haw ngawlnak tukin manlang zetin Jordan ngun kaltanin, tai hen,” ti hi.

¹⁷ Abiathar capa Jonathan le Zadok capa Ahimaaz cu khua sungah tum ngam ngawlin Enrogel pen ngak leleng haw hi. Umlawh khanglai pa khatin khuasung a, na a piangmi le thute cu hilh mekin, mah nungten amuhin kumpi David cu hilhsa lawn haw hi.

¹⁸ Mahnaven vei khat cu naupangpa pa khatin amuh ten Absalom hilh hi. Jonathan le Ahimaaz cu tai in, Bahurim khua pa khat pa i innah heng haw hi. Mahpa in, a inn elah tuikhuk pa khat nei a, mah khuk sungah tum haw hi.

¹⁹ Mahpa i zi in khuk cu a khuh khawng ceng ten kuamah i theih tuk ngawlin mah khuk humah cangpho hi.

²⁰ Absalom i mihingte hungin, mah nu cu, “Ahimaaz le Jonathan ilai ah um haw kaw?” tin dong haw hi. Amah in, “Tui tan zo haw,” ti hi. Zei haw naven amuh haw ngawl hangin Jerusalem ah kikleh haw hi.

²¹ A hawh nung haw ten Ahimaaz le Jonathan cu khuk sung pen tul haw a, David lakah hawhin thu hempoh hilh haw hi. Ahithofel i suamnak thu cu a hilh haw ten David cu, “Manlang inna, lui ngalkhat lamah manlang zetin hawhin hi,” tin ti haw hi.

²² Mah hangin David le a mihingte cu Jordan ngun kaltanin, khuavak miamiai ten khatlam ngalah suak khawng haw hi.

²³ A ngaihsutnak piakmi zui haw ma tih Ahithofel in amuh ten laak khungin, a khua ah pin hi. A innkua tei lakah lo le lam a cah nungten amah le mah ngui awk hum hi. Ahithofel cu thi in, a pa i khanah vui haw hi.

²⁴ Absalom le a ngalkapte cu Jordan ngun kaltanin, ngun ngalkhat lam a hen haw ten David cu Mahanaim khua heng zo hi.

²⁵ Absalom in Joab ai-in Amasa cu a ngalkapte hotu in koih hi. Amasa cu Ishmael mi Jether i capa hi, a nu cu Nahash i canu Abigail hi; amah cu Joab i nu Zeruiah i unau hi.

²⁶ Absalom le a mihingte cu Gilead ah cam haw hi.

²⁷ David cu Mahanaim khua a hen ten Ammon ngam Rabbah khua um, Nahash capa Shobi le Lodebar khua mi Ammiel i capa Makhir le Gilead ngam Rogelim khua mi Barzillai ten muak haw hi.

²⁸ Kuang, leibeel, zauphah le puante keng haw hi. David le a ngalkap tei ca tukin sangvut cangho le barli cangho, vaiphan, cangphan, be, mawtol,

²⁹ khuaitui, thawphat khuinawi ha, tuucik le khuicikte kengin, eih tukin pia hawh hi. David le a ngalkapte cu ngamkhing lakah ngilkialin, a dangdumzet haw tuk tih cu thei haw hi.