2 Samuel 12 - Ngawm Bible

Nathan Thucah le David i Sihkiknak

¹ David lakah profet Nathan cu Topa in hahin, “Khua pa khatah mi pa nih um haw hi; pa khat cu hau zetin, pa khat cu ca-ngahzet hi.

² Mihau pa cu khui le tuu tampi nei in,

³ mi ca-ngah pa cu a lei copmi tuuno pa khat bek nei hi. Mah a tuu pa khatno cu phano zo in, a innkua ah a cate bangin umin khangto hi. Ama eih mi an pia bokin, a khuathai tuah tui intikin, a kawng hum loli ah cawi mek hi. A tuu cu a canu bangin ngaisung hi.

⁴ Ni khat cu mihau pa i innah mikhual pa khat heng hi. A mikhual cu an do nuam naven a ngan pa khatno hei ngawh tuk phal ma hi. Mah hangin mi ca-ngah pa i tuu neihcalam cu laksakin, a mikhualpa cu an do hi,” tin hilhtik hi.

⁵ David cu a thinuk zetin, “A nungmi Topa i min salin hilh ing hi: mahtibang thilpha ngawl bawltu cu a thih kul hi!

⁶ Hi bang mi hehpihnak hei nei ngawl a hih bangin a lakmi cu let li in lulleh loli hen,” ti hi.

⁷ Nathan in David lakah, “Mahpa cu nangmah hi ci!” Israel Pathian Topa in, “Saul i khutsung pen hupin, Israel kumpi in cangtik ing.

⁸ Saul i zite le a uknak pia ing a, Israel le Judah ngam kumpi in bawl ing. Hite hi a tawk ma laih tale let nihin pia tuk naveng!

⁹ ita ka thukhamte zui ngawl cim? Ita hiti bang ngamta cim? Ngaldonakah Uriah cu Ammon mite thattikin, a zi ngu ci.

¹⁰ Hi bangin ka thukham zui ngawlin Uriah zi na nguk hangin na casuan khenkhat cu akhang akhangin, sakthi tuah thi leleng haw tuk hi.

¹¹ Na innsung sung loli pen vansangin, a bawltu umtik hihim tung hi, tin hilh ham ing. Na zite la tung a, na mitmuh loli in pano dang lakah ka piak ten theileh tuk ci. Mahpa in khuavak lai loli in, na zite cu zaupih tuk hi.

¹² Nang cu sualnak bawl kuh ci, mahnaven Israel tei muh khawng tukin na zite a zaupihnak haw cu sun khuavak laih loli in, kimtik tung hi, ti hi,” tin hilh hi.

¹³ David in, “Topa i mai ah sual zo ing hi,” ti hi. Nathan in, “Topa in ngaidam tuk a, thi tukma ci.

¹⁴ Mahnaven hi bangin thilpha ngawl na bawlnak pen Topa na zotsaknak cu langtik zo na hih hangin, nangma ca saw thi tuk hi,” ti hi.

¹⁵ Mah nungten Nathan cu innah pin hi. Uriah i zi in capa a hin mi cu Topa in nase zetin natik hi.

David i Capa Thi

¹⁶ David in, a capa damnak tukin Pathian nelah thungen hi. David cu an ei ma hi, taksialin, a innsung suat humah tho ngawlin zau leleng hi.

¹⁷ A khutnuai bawi ten suat humah zau ngawlin tho tukin lem li haw naven ngai kha nuam hihim ma hi. Amuhte tuah vang imah ei nuam ma hi.

¹⁸ Ni pi khat nungten a capa cu thi zo hi tih thu a khutnuai bawi ten hilh ngam haw ma hi. “A capa a nunlaih hei in otpih don nuam ngawl a hih ten, a capa thih cu itakaw a hilh ngam tuk uh? Amah le mah hei bawlsiadun kha kawn,” ti haw hi.

¹⁹ Pa khat le pa khat a kuhno a otpihdun haw cu David in, amuh ten ka capa hi thi zo tuk tin ngaisungin, “Nauno cu thi zo maw?” tin dong hi. “Thi zo hi,” tin don haw hi.

²⁰ David cu suat hum pen tho in, tuibual hi, a samte kiatin, a van thek hi. Hawhin Topa i innah Pathian bia hi. A innah kikin, an bawltikin, a bawl ceng bek haw ten ei hi.

²¹ A khutnuai bawi ten, “Itin kaw na cano a nunlaih saw in, kapin an ei ngawlin um ci. Mahnaven a thih bek ten tho in an ei ci. Thei tum viang ma ung hi,” tin ti haw hi.

²² David in, “Hi zuh hi, ka capa a nunlaihin an cangin kap li ing. Ka capa hi thitik ngawlin Topa in hehpih ni maw tin ngaisung ing.

²³ Mahnaven atu-in thi zo a hih hangin, itin kaw an cu ka can tuk toh? Ka capa cu nunglehtik thei nang maw? Ni kha khat ten a umnakah hawhleh bok tung, mahnaven amah cu ka umnakah hungleh thei tukma toh,” ti hi.

Solomon Suak

²⁴ David in, a zi Bathsheba cu hehnem hi. Zaukawmleh haw in, capa hing hi. A capa cu David in Solomon tin, a minsa hi. Solomon cu Topa Pathian in it in,

²⁵ Jedidiah tin, a minsa tukin profet Nathan lakah thupia hi, itahim titale Topa in it hi.

David In Rabbah La

²⁶ Mah sungin Joab in Ammon mitei khuapi Rabbah cu vil li, vil li in, neh awn toh hi.

²⁷ David lakah mi hahin, “Rabbah cu vil li, vil li in, a tuinak haw la zo ing.

²⁸ Mah hangin ngalkap khawm inna, Rabbah khuapi cu do in nangmah in nehin hi. Hi khuapi hi neh tung a, a min cu ka min cuangin sa tung hi,” tin cah hi.

²⁹ Thu a cah bangin David in, a ngalkapte cu khawm a, Rabbah khua cu do in neh ngangai hi.

³⁰ Mah a lak haw mi khuapi ah Molek a tih haw mi a milim i sui lukhuh cu pawng sawm salih le pawng nga ngitin mah sungah suang manpha vang um hi. David in mah lukhuh cu milim humta la in amah in khu hi. Thildang tampi vang khuasung pen la hi.

³¹ Khuasung mite heipi tuah nadektikin, ukkhete bawltik hi. Ammon ngamsung khua dangte vang mahti bangin dektik leng hi. Mahnung ten David le a ngalkapte cu Jerusalem ah kik haw hi.