2 Samuel 10 - Ngawm Bible

David In Ammon le Siria Neh

¹ Hun a ngei deuh ten, Ammon kumpi Nahash cu thi in, a capa Hanun in kumpi dek hi.

² David Kumpi in, “A pa Nahash in ka humah upatnak le hehpihnak a bawl zo bangin Hanan humah langtik bok tung hi,” ti in, a lungsiatnak nemtu tukin mi hah hi. David hahmite Ammon a hen haw ten,

³ Ammon mi puitu ten a kumpipa haw lakah, “Nangmah hehnemtu tukin David in hi bangin mi a hah hi, na pa a upat hangin hi, tih um cim maw? Mah kha hihim ma hi, eimuh a neh nuam haw hangin a kumpi uh zociang tukin vilvengtu hah hi,” tin thusia so haw hi.

⁴ David i hahmi palaite cu Hanun in manin, a khamul haw langkhat lam ten a meh ceng ten a angki cualpi haw cu a tai pen tansakin hahleh hi.

⁵ David in mah thu a zak ten a palaite tawk tukin mi hah hi. Itahim titale a zahcak leita haw hangin a lakah hung ngam haw ma hi. Jerikho khua ah um tukin le a khamul haw a poleh sawng ten pin tukin thucah hi.

⁶ David cu ngalin, a bawl haw Ammon miten a theihciang haw ten, Bethrehob le Zobah pen Siria ngalkap thawng sawm nih, Tob pen ngalkap thawng sawm le thawng nih le Maakah ngam ngalkap thawng khat tuah zawng haw hi.

⁷ David in mah thu a zak ten Joab cu a ngalkap phabelte tuah hah hi.

⁸ Ammon mite cu thok bok haw a, Rabbah khuapi tumnakah panmun bawl haw hi. Siria ngalkap, Tob ngalkap le Maakah ngalkapte vangin ngam tihkim le mun tihkim pen Israel ngalkapte cu pang haw hi.

⁹ Joab in ngal ten mailam le nunglam pen do haw tuk tih a zak ten Israel ngalkap lak pen a phabel tengin, Siria ngalkapte tawngtu tukin mailamah koih hi.

¹⁰ A ngalkap dangte cu a naupa Abishai i uknak sungah koihin, Abishai in Ammon mite tawngtu in panmun bawltik hi.

¹¹ Joab in, a nau Abishai lakah, “Siria ngalkap ten a nawk deuh haw tale keimah bawmin hi. Ammon ngalkap ten a nawk deuh haw tale bawm tung hi.

¹² Imah lau pahsun! A mihingte le a Pathian uh i khuapi tei ca nase zetin tang tuk hung hi. Topa in, a phabelin bawl tahen,” ti hi.

¹³ Joab le ngalkap ten nam tawtok haw in, Siria ngalkapte cu tai khawng haw hi.

¹⁴ Ammon miten Siria ngalkapte tai amuh haw ten Abishai mitmuhin tai bok haw in, a khuasung hawah kik haw hi. Ammon mi a donak haw pen Joab cu kikin, Jerusalem hengleh hi.

¹⁵ Israel miten neh haw hi tih Siria ten a zak haw ten a ngalkap hempoh cu khawmleh haw hi.

¹⁶ Eufrates Ngun pen nisuahnak lam a um Siria mite vang Hadadezer kumpipa in sam khawngin, Helam ah hungin, Zobah kumpi Hadadezer i ngalkapte uktu ngalbawi Shobak i ho in um haw hi.

¹⁷ David in mah thu a zak ten Israel ngalkapte sam khawmlehin, Jordan ngun a kaltan nung haw ten Helam lamah hawh haw hi. Siria ngalkapte cu Halem ah David do tukin nase zetin panmun la in um haw hi. Dodun tawtok haw a,

¹⁸ Siria ngalkapte cu Israel miten hilkek khawng haw hi. David le a ngalkap ten Siria cipuhleng mawngtu za salih le cipuh ngalkap thawng sawm li that haw in, Siria ngalbawi pa Shobak vang liam haw a, mah munah thi hi.

¹⁹ Kumpi Hadadezer khutnuai um kumpi dangte vangin Israel miten neh haw tih amuh haw ten, Israel mite tuah lemdaihnak bawlin, a khutnuai ah um haw hi. Mahnung siah cu Siria miten Ammon mite cu bawm ngam haw ma toh hi.