2 PETER 2 - Ngawm Bible

Zilhtu Man Ngawlte

¹ Tanglaihin Israel tei lakah profet manngawl um haw hi, mahti bang bokin atu nangmu lakah vang zilhtu manngawl piang tuk hi. Mi siatsuah theitu le a man ngawlmi updan luhtum pih tukin a Topa uh hei lawl haw tuk hi. Mahten amu hun sung lengah siatnak cu ngaihsut ngawl pi in hengtik haw tuk hi.

² Mah hei ten tisa deihnak tuah a ngamtat pha ngawl haw cu mi tampi ten zui haw tuk hi, mahtibang a bawl haw hangin miten thutak lampi cu sonsia haw tuk hi.

³ A hampumnak haw hangin hi zilhtu man ngawl ten tangthu bawlcawm hilhin, nangmuhte cu sum zeinakah mang haw tuk hi. Mahnaven amuh Thukhentu cu a ngallinnak ngeipi zo a, amuh siatsuahtu tuk vang hihbu ngawlin um hi.

⁴ Vancungmi a sualtute hei, Pathian in khawih ngawlin hell sungah khia belh hi. Mah khuathim sungah kencihin um haw a, Thukhennak Ni ngakin um haw hi.

⁵ Tanglaih a, leipi vang Pathian in khawih cuang ma hi. Pathian kihcaknak a nei ngawl miphun tei humah tuihau tungtikin a patsuahmi cu thudik a hilhtu Noah le midang salihte bek haw hi.

⁶ Pathian in Sodom le Gomorah khuapi cu zamsanin, mei tuah siatsuah hi. Mahmi cu Pathian kihcaknak a nei ngawltu tei ca in cin leleng tukin a bawlmi hi.

⁷ Mahnaven daantin nei ngawl mipha ngawl tei amthongin, a bawl haw mi mipha pa Lot cu pansuakleh hi.

⁸ Mah mipha pa cu mipha ngawl tei lakah nisial umin, a nunzia phat ngawl dan mu in, a theih ten a thin nazet hi.

⁹ Mahten Topa cu amah a kihcatu tei haksat a thuak haw ten panin mipha ngawlte cu Thukhennak Ni tian bawlsiatnak thuaktik tukin koih hih hi.

¹⁰ Mahten dantatnak thuak tukin a khawihmi cu Pathian thuneihnakte nautatin, amuh tei tisa deihnak, a nawngkaimi taksa nopnak a zuitute haw hi. Hi zilhsualtute cu pualthau in, ngilozet haw hi; humlam van a ummite imah simsial ngawlin zawnsak haw hi.

¹¹ Amuh sangin ngil saw le a ngeng saw vancungmite hei in, Topa i mitmuhin mahmi cu nautat haw ma hi.

¹² Mahnaven hi zilhsualtute cu ngaihsutnak imah nei haw ma hi. Amu thin sung pen a suak vutmi babangin hilh haw hi. Mat le ngawh tukmi ngamsa bang haw hi. A theihtheih haw ngawlmi pawpoh cu nautatnak tuah sonsia haw hi. Mah hangin ngamsa bangin thahnak tawk bok haw tuk hi.

¹³ Midangte haksatnak a piak haw hangin haksatnak thuak bok haw tuk hi. Amuh tei ca in nunnop a tih haw mi cu khuavak laih hei in, amu tisa deihnak a bawl susuih haw khi hi. Mizol cu nop hi tin ti in, nangmu lak a puai an a eih haw ten zahcaknak le mualphonak a suaktiktute haw hi.

¹⁴ Numei pha ngawlte zo tuk khi a deihbel haw mi hi a, sualnak bawl tuk a nuam haw dan cu thinkim tih nei awng haw ma hi. Upnak a dawm deuhte khi sualnak thang sungah awk tukin huai haw in, hampumnak lamah neh theih tukmi na hi haw ma hi. Pathian i tamsiatmi haw hi.

¹⁵ Lampi man cu pialsanin, lampai haw hi. Beor i capa profet Balaam i zuimi lampi khi zui haw. Balaam cu thilpha ngawl a bawlmanin, sum a co nuamtu hi.

¹⁶ A sualnak hangin mawhsiat tawk hi. A laak in Balaam cu mihing tei awnkamin otpihin, a lauhuai na pha ngawl a bawlmi cu cawltik hi.

¹⁷ Hi mihingte cu a kangmi ciktui le huihsia i a muhvawkmi meinim bang haw hi. Pathian in amu ca in, a thukbel khuathimnak mun bawlsa in koih zo hi.

¹⁸ Pualthaunak le awn pha ngawlte awnin, nungcang sual sung pen a suak ca semmi sualnak thangah awkleh tukin a tisa nopnak khi mang haw hi.

¹⁹ Mi lakah luatnak thutiam haw hi. Mahnaven amuhte cu mi siatsuahtu ngamtat pha ngawl i sal haw hi. Itahim titale mihingte cu a neh zotu pawpoh i sila na hi hung hi.

²⁰ A Topa uh le nunpantu Jesuh Khrih cu bulpak tek a theihnak haw hangin ningdelhhuai sualnak sung pen suakin, mahtin a suah ngah ceng haw ten mah ningdelhhuai sualnak lengah awkleh kikin, a lel tale, a masa ngamtat sang sia saw tuk hi.

²¹ Thuman lampi a theih haw nungten le thukham thiangtho amu lakah a piak nung haw ten, pialsanleh thong tuk sangin imah thei ngawl vanglakin, a um saw hawta ahin amu ca pha saw hi.

²² Hitih bangin amu humah a piangmi in, “Uico in, a luak eileh kik,” tih le, “Vok cu somciang nung hei ten cinciak sungah bualleh kik hi,” tihmi awnkam tehkipnak hi thuman hi tihmi langtik hi.