2 KUMPI 9 - Ngawm Bible

Israel Kumpi Jehu

¹ Mahlai in profet Elisha in profet tei lak pen khangno pa khat samin, “Na tuangtim inna, Gilead ngam Ramoth ah hawhin hi. Hi olif thau bung hi pua inna,

² mahlai na hen ten Nimshi i tupa, Jehoshafat i capa Jehu na zei in hi. A ngualcam tei um ngawlnak khan pa khat sungah sam inna,

³ hi olif situi hi a lu ah leihin, ‘Israel kumpi tukin Topa in sathau thih hi,’ ti in hi. Manlang zetin tai in,” ti hi.

⁴ Mah hangin tangvalno profet pa khat cu Ramoth ah hawhin,

⁵ bawite a tawhdun khawm laihtak haw cu na tawk hi. Profet in, “Bawipa, nangmah tawkta nuam ing,” ti hi. Jehu in, “Akua saw kaw na otpih?” ti hi. Profet in, “Bawipa, nangmah,” ti hi.

⁶ a pa nih haw in, inn sungah tumin profet in olif thau cu Jehu i lu ah leihin, “Topa, Israel Pathian in, ‘Ka miphun Israel tei kumpi tukin sathau thih ing.

⁷ Ka profet le ka nadektute Jezebelin, a thah hangin amah ka bawlsiat theihnak tukin Ahab capa, kumpi na bawipa cu thatin hi.

⁸ Ahab innkua le a casuante cu a thih haw kul hi; a khangno hihen, a tek hihen, a innkua sung a, pano hempoh cimittik khawng tung.

⁹ Nebat i capa kumpi Jeroboam innkua le Ahijah capa kumpi Baasha innkua tei hum a, ka bawl bangin Ahab i innkua tei hum hei ah bawlbok tung.

¹⁰ Jezebel cu kuamah in vui haw tukma hi; a luang cu Jezreel ngamah uico ten ei haw tuk hi,’ tin hilh hi.” Mahmi a hilh celhbek ten profet tangvalno cu tulin tai hi.

¹¹ Jehu cu a ngualcam bawi tei lakah kikleh hi. Amuh ten, “I thu la um kaw? Mah misilpa in itakaw nang a tawh nuamnak?” tin dong haw hi. Jehu in, “Iti bang mihing hum tih le i deih hum tih cu theileng poh uh ci mei?” ti hi.

¹² Amuh ten, “Mah kha ma, thei ma ngangai ung hi. A tihmi cu hilh tehin,” tin ti haw hi. Jehu in, “Topa in Israel kumpi tukin sathau thih hi ci, tin keimah hilh hi,” tin hilh hi.

¹³ Mahbek ten a ngualcam bawi ten a angki cualte dukin, Jehu dinnak tukin kailawn humtabelah phah haw a, pengkul a tum nung haw ten “Jehu cu kumpi hi,” tin, a aw neih zah haw tuah au haw hi.

Kumpi Joram That Haw

^14-15 Nimshi capa Jehu in kumpi Joram cu suam hi. Kumpi Joram cu Siria kumpi Hazael do in, Ramoth ah liamin, a liamma damnak tukin Jezreel ah a hawh hi. Jehu in, a ngualcam bawi tei lakah, “Keima lam tangtu na hi uh tale Jezreel khua mite hilh tukin kuamah Ramoth khuapi pen tul pahsuh un,” ti hi.

¹⁶ a cipuhleng humah khungin Jezreel lamah hawh hi. Joram cu dam ciang ma laih a, Judah kumpi Ahaziah in, a veh lai tak hi.

¹⁷ Jezreel khua kongkhah cingtu in Jehu le a mihingte a hun haw cu mu in, “Cipuh hum khungin, mi a hung mu ing,” tin au hi. Joram in “Eimu ngualcamte hi tih le a ngal uhte hi tih dongkantu tukin cipuh ngalkap pa khat na hahin hi,” tin thupia hi.

¹⁸ A hah haw mipa in, Jehu cu tawkin a lakah, “Ngualcam pha tukin hung cim maw, tih kumpipa in thei nuam hi,” ti hi. Jehu in, “Mahmi cu nangma nadeh kha ma hi, ka nung pen zui saw in!” ti hi. Kongkhah cingtu in, “A hah uh mipa in tawk naven kikleh ma hi,” ti hi.

¹⁹ Midang hahleh haw in, a masa bang lengin Jehu cu dong bok hi. Jehu in, “Mahmi cu nangma nadeh kha ma hi, ka nung pen zui saw in!” ti hi.

²⁰ Kongkhah cingtu pa in “Ka hah uhmi pa in tawk naven kikleh bokma hi. A hotupa in, a cipuhleng cu huih bangin lengtik hi; Jehu bang kek si!” tin ti leleu hi.

²¹ Mahbek ten Joram in, “Ka cipuhleng hunpih nawnawm un!” tin thupia hi. Hunpih haw a, Joram le kumpi Ahaziah cu amu cipuhleng veve tuah Jehu tawk tukin tul haw hi. Hawh haw in, Naboth i huanah Jehu cu tawk haw hi.

²² Joram in “Thupha in hung cim maw?” tin Jehu cu dong hi. Jehu in, “Na nu Jezebel i tawpatmi milim biaknak le polsia lennak tuah a ngamsung uh a dim sung cu i thupha kaw a um theih tuk?” tin don hi.

²³ Mahbek ten Joram cu nunglamah hek a, tai thahin, “Keimah suam nuam cim, Ahaziah!” tin au hi.

²⁴ Jehu in, a thalcang suahin, a tha neih tawp tuah kau in, Joram cu a ngumzaangah kapin, thalcangin, a lung pen kha hi. Joram cu a cipuhleng sungah lumin thi hi.

²⁵ Jehu in amah bawmtu Bidkar lakah, “A luang la inna, Naboth huanah na vawkin hi. Joram i pa Ahab nung ka zui laihin nangmah tuah cipuh hum khungin, hilai ah hawh langkhat hung a, Topa in Ahab dodalnak awnin,

²⁶ ‘Zantakin, Naboth le a capate that haw in, a thisante mu ing. Hi mun lelengah, a phuba la tung hi tin, thutiam ing, a tihmi cing laih ci mei!’ Mah hangin Topa i hilhsa bangin “Joram luang cu la inna, Naboth huanah na vawkin hi,” tin thupia hi.

Judah Kumpi Ahaziah That Haw

²⁷ Mahmi cu kumpi Ahaziah in, amuh ten a cipuhleng tuah Beth Haggan khua lamah tai in; a nung pen Jehu in hil hi. “Amah vang that un!” tin Jehu in, a ngalkapte cu thupia hi. Ahaziah cu Ibleam khua el, Gur lampi ah a cipuhleng tuah a tai laihin liamsuah haw hi. Mahnaven Megiddo khuapi cu heng thei in, mah khua ah thi hi.

²⁸ A luang cu a khutnuai bawi ten cipuhleng tuah Jerusalem ah pua haw a, Jerusalem David khuapi, kumpi khanah vui haw hi.

²⁹ Ahaziah cu Ahab i capa Joram i Israel kumpi a deh kum, kum sawm le kum khatnakah kumpi dek pan hi.

Kumpinu Jezebel That Haw

³⁰ Jehu cu Jezreel khua a hen ten, Jezebelin, a thulate cu thei khawngin, a mitkhoh hangtikin, a sam bawl pha in, kumpi inn tukvelh pen a nuailam lampi cu na cuan hi.

³¹ Jehu cu khuapi kongkhah pen tumin Jezebelin, “Maw Zimri! maw mi that pa, hilai ah ikaw na bawl?” tin ti hi.

³² Jehu in zoto in, “Ka lamah akua kaw a tang?” tin au hi. Kumpi inn a bawipa nih, thum ten tukvelh pen zo haw hi.

³³ Jehu in, “Hi nu cu vawksuk un!” tin ti hi. Jezebel cu vawksuk haw in, a thi tuah pangte le a cipuhte cu theh khawng hi. A luang humah Jehu in, a cipuhleng hawlin,

³⁴ kumpi innah tumin an ei hi. Mahnung bek ten, “Hi numei sesuak cu khul unna, phum un, kumpi canu a hih bok heng ten!” tin ti hi.

³⁵ A luang khul tukin mi khenkhat hawhin, a zoh haw ten a lu-nguh, a ke nguh le a baan nguh bek mu haw hi.

³⁶ Mahmi cu Jehu a hilh haw ten amah in, “Hiti bang hi tuk hi ti in Topa in, a hilh hamsa mi poh hi; a sila pa profet Elijah lak pen Jezebel i taksa cu Jezreel ngam sungah uico ten ei haw tuk hi.

³⁷ A luang cu ek bangin lengkek khawng tuk a, kuamah in Jezebel hi tih theitum haw tukma, ti hi.”