2 KUMPI 8 - Ngawm Bible

Shunem Numeinu Kikleh

¹ Shunem khua a um, a capa a nuntik lehmi numei nu i lakah, “Tho inna, Topa in, pehzomin kum salih paam a tuntik tuk hangin, nangmah le na innkuate tuah mundangah hawhin, na um uh ahin, pha tuk hi,” tin Elisha in ti hi.

² A hilhmi bang ngai in, a innkuate tuah Filistin ngamah hawh haw a, mahlai ah kum salih sung um haw hi.

³ Kum salih nungten mah numei nu cu Israel ngamah kiklehin, a inn le a lote ngah kikleh tukin kumpi lakah ngen tukin hawh hi.

⁴ Mahlai in kumpi cu Elisha i umlawhpa Gehazi tuah thuson khawm li haw hi. Elisha i nalamdang a bawlte cu kumpipa in thei nuamzet hi.

⁵ Elisha in naupang pa a nuntik lehnak thu cu Gehazi in kumpipa a hilh lih laih takin Shunem numeinu in kumpi lakah a ngetmi thu cu hilh hi. Gehazi in, “Maw kumpi pa, ka hilhmi numeinu le Elisha i a nuntik lehmi a capano cu hilai ah heng haw,” ti hi.

⁶ Kumpipa in thu a dot pepel ten Gehazi i hilhmi cu thudik hi tih cu thei pepel hi. Kumpi in, a khutnuai a, bawi pa khat samin, numeinu lakah, kum salih sung a lo sung suak an man hempoh le a laihngawl ata hempoh vang pialeh khawng tukin thupia hi.

Elisha le Siria Kumpi

⁷ Elisha cu Damaskas khua ah a hawh laihin, Siria kumpi Benhadad cu a tina ngelcel hi. Elisha cu Damaskas khua sungah um hi tih kumpi in, a zak ten,

⁸ a khutnuai bawi pa khat Hazael cu samin, “Profet cu laksawng pia inna, nungleh tung maw nung zo tukma toh ing kaw tih Topa dotsak zal hen,” ti hi.

⁹ Mah hangin Hazael in, Damaskas pen a suakmi na a phabelte a namkimin la in, kalauk sawm li puatikin Elisha lakah hawh hi. Elisha a tawh ten, “Na umlawh Siria kumpi Benhadad in, a natnak pen dam tuk maw dam tukma toh kaw tih dong tukin keimah hah,” ti hi.

¹⁰ Elisha in, “Na kumpipa uh cu thi tuk hi, tin Topa in ka lakah phuang zo hi; mahnaven nung tuk ci, tin hilhin hi,” ti hi.

¹¹ Elisha in, a mitmai sia tuah Hazael cu zo ngengu leleng a, Hazael cu a um nop ngawlin a maisan khawng hi. Elisha cu kapto lok hi.

¹² Hazael in, “Bawipa a ita kap nge cim?” tin dong hi. Elisha in, “Israel tei hum a thilpha ngawl na bawl tukmi hi ka muh hangin kap ing. A ngal kulhtiante haal khawng tuk ci, a tangvalte ngalnam tuah cimittik khawng tuk ci, a canote lei ah vat hum khawng tuk ci a, naupai numeite vatkeh khawng tuk ci,” tin don hi.

¹³ Hazael in, “Itin kaw mahti bangin bawl theihnak huham ka neih tuk? Kei cu uico bang hi poh sing, imah ma sing,” ti hi. Elisha in, “Topa in keimah lak zo hi, Siria ngam kumpi hi tuk ci,” ti hi.

¹⁴ Hazael cu kik lehin Benhadad in, “Elisha in, a iti kaw?” tin dong hi. Hazael in, “Nung tuk ci, ti hi,” tin hilh hi.

¹⁵ Mahnaven a zingten Hazael in puan sahzet pa khat la in, tui sungah a diah nungten kumpipa i mai cu tuamin kumpi cu that hi. Hazael cu Siria kumpi dek hi.

Judah Kumpi Jehoram

¹⁶ Ahab capa Joram cu Israel kumpi a deh kum nganakin, Jehoshafat i capa Jehoram cu,

¹⁷ Judah kumpi dek pan hi. Kumpi a hih ten kum sawm thum le kum nih hi a, Jerusalem pen kum liat sung uk hi.

¹⁸ A zi cu Ahab i canu hi a, Ahab i innkua bangin Jehoram vangin Israel kumpi tei bawlmi na pha ngawl zui bok a, Topa i humah sualnak bawl hi.

¹⁹ Mahnaven Judah ngam cu Topa in siatsuah phalma hi, itahim titale a sila pa David lakah a casuan ten ngam cu uk leleng haw tuk hi, tin thu a tep zo hangin hi.

²⁰ Jehoram kumpi a deh laihin Judah uknak pen Edom mite amuhno ukdun theih tukin luatnak ngah haw hi.

²¹ Jehoram cu a cipuhlengte tuah Zair ah hawhin, mahlai ah Edom ngalkap ten kil khawng haw hi. Zan khuanu ten Jehoram le a cipuhleng hawl hotu ten, amuh kiltu Edom ngalkapte cu pah tulin luat haw hi; a ngalkapte cu amu inn tekah tai khawng haw hi.

²² Mah pepan Edom cu Judah ngam tuah pehdun ngawltohin amuhno ukdunnak luatnak ngah haw hi. Mah hun lelengin Libnah khuapi ngaltho leleu hi.

²³ Jehoram i nadehmi dadang cu Judah Kumpi Tei Khang Tangthu Laibu tihmi sungah sialsiah haw hi.

²⁴ Jehoram cu thi in, Jerusalem David khuapi, kumpi khanah vui haw hi. Mah nungten a capa Ahaziah in kumpi dek hi.

Judah Kumpi Ahaziah

²⁵ Ahab i capa Joram in Israel kumpi a deh sawng kum sawm le kum nihnakah Jehoram i capa Ahaziah in,

²⁶ Judah kumpi dek pan hi. Kumpi a deh ten amah cu kum sawm nih le kum nih hi. A ngam cu Jerusalem pen kum khat uk hi. A nu Athaliah cu Israel kumpi Omri i tunu hi.

²⁷ Ahaziah cu kumpi Ahab innkua tei makpa a hih hangin Ahab innkua tei ngamtat bang lengin, Topa i humah sualnak bawl hi.

²⁸ Siria kumpi Hazael tuah dodun tukin, kumpi Ahaziah cu Israel kumpi Joram in panpih a, Gilead ngam Ramoth ah tawngdun haw in, Joram cu liam hi.

²⁹ Mah hangin Jezreel khuapi ah dam nuamin kikleh hi. Mahlai ah Judah kumpi Ahaziah in veh hi.