2 KUMPI 7 - Ngawm Bible

¹ Elisha in, “Topa i thu hilhmi hi ngai un! Zingten tubang hunin, Samaria khua ah sangvut phabel cuai khat ahimata barli sangvut cuai nih cu ngun tangka cang khat tuah lei thei tuk uh ci,” ti hi.

² Kumpi zuitu bawi pa khatin, Elisha lakah, “A cangthei tukmi hi ma hi, Topa amah in van tukvelh hongin, cang a khesuk li vangin cangthei tukma hi!” tin don hi. Elisha in, “Cang tuk a, na mit loli tuah mu tuk ci; mahnaven nangin ei ngah tukma ci,” tin don hi.

Siria Ngalkapte Tai Haw

³ Phaaknat a thuaktu pa lite cu khuapi kongka ah um haw in, amuh le muh, “Ita a thihsuk uh tianin, hilai ah a um nuam tuk uh?

⁴ Khua sungah a tum uh vangin nemcuam ma, an ngawlin thi tuk poh si ung; hilai ah a um uh hei in thi leleng tuk hung. Mah hangin Siria ngalkap tei ngiahnak munah hawh saw nung. A that haw tale thi nung; mahnaven that ngawlin khawih vang hi thei haw pah cuh” tin tidun haw hi.

⁵ Mah hangin, khua a thim ten Siria ngalkap tei ngiahnak munah hawh haw hi. A hen ngangai haw ten pa khat hei umleh haw ma toh.

⁶ Topa in Siria ngalkap tei beng sungah thawmnging zatikin, mah thawm cu ngalkap tamzet, cipuh le cipuhleng tampi tei thawmnging bang hi. Israel kumpi in, Hit kumpi le Izipt kumpi a ngalkapte tuah zawmin, keimuh do tum haw na hi, tin Siria ngalkap ten na ngaisung haw hi.

⁷ Mah hangin thi tuk lau in, Siria ngalkapte cu a lulet kelet tai haw in, a puanbuk haw, a cipuh le a laakte vang cuh man ngawlin a ngiahnak haw abang lengin zam haw hi.

⁸ Miphaak pa lite cu ngiahbuk a hen haw ten puanbuk pa khat sungah tum haw in, puanbuk sung a, ummi ante cu ei in, a eih celh haw ten a tawh haw mi sui, ngun le puansilhte cu manlangzet cuhin, amu ca tuk sel haw hi. Kik haw a, puanbuk dang pa khat sungah tumin, mahti bang lelengin bawl haw hi.

⁹ amuh le muh, “Hi ti bangin a bawl uhmi hi pha kha tukma hi. Thuthangpha nei hung a, eimu ca bekin tih tuk kha ma hi. Zinglam tian a ngak uh tale mawh pua tatak tuk hung. Tu loli in hawh nung inna, kumpi khutnuai bawite hilh nung,” tin tidun haw hi.

¹⁰ Mah hangin Siria ngalkap tei ngiahnak pen tul haw a, Samaria khua sungah tumin, kongkhah cingtu tei lakah, “Siria ngalkap tei ngiahnakah haw ung a, kuamah mu ma ung, khing diudeu hi. A cipuh le a laak tei khau hei duk haw ma hi! A puanbukte vang Siria ngalkap tei a zam haw bang loli in umlaih hi,” tin hilh haw hi.

¹¹ Mah thu cu kongkhah cingtu ten kumpi hilh haw hi.

¹² Zan zo naven kumpipa cu tho in, a khutnuai bawi tei lakah, “Siria ngalkap tei tupmi na hilh nang, khuasungah an umma tih thei haw hi. Mah hangin a ngiahnak haw pen tulin hampa lakah ngelh haw tuk hi. An zei tukin khuasung pen a tul haw ten a nungcungin man khawng nung inna, a khuapi haw vang la tuk hung hi, tin ngaisung haw hi,” ti hi.

¹³ A khutnuai bawi pa khatin, “Ivang bangvang a bosa hunin, a thi zote bangin hi khuasung a ummi hempoh cu thi khawng leleng tuk hung hi. Thil um daan iti bang ngangai hum tih a theihnak tukin a nunglaihmi cipuh pa nga tuah mi khenkhat hawhtik teh nung,” ti hi.

¹⁴ Mi khenkhat tengin, Siria ngalkapte ilai ah haw hum tih zo tukin kumpi in cipuhleng pa nih tuah hah hi.

¹⁵ Hawh haw a, Jordan heng haw hi. Lamtuanah Siria ngalkap ten a tai thahin, a zam haw mi a puan le a hiamnamte mu pepel haw hi. Kik lehin, mah thu cu kumpipa hilh haw hi.

¹⁶ Samaria khuasung mipite cu pah humdun khawng awn tian tulin, Siria ngalkap tei ngiahbuk cu tum lulut haw hi. Topa i otmi bang cikcekin sangvut phabel cuai khat, ahimata barli sangvut cuai nihah ngun tangka cang khatin zuak ngangai haw hi.

¹⁷ Mah hunin, Israel kumpi in, amah a zui mektu a khutnuai bawi cu kongkhah cingtute cu hotu in koih hi. Mipite Siria ngalkap tei ngiahbuk lamah a nawtdun susuih haw ten mah hotu pa cu cil hum haw; Elisha tawk tukin kumpipa a hawh hun khin Elisha i awn bangin mahpa cu na thi ngangai hi.

¹⁸ Elisha in kumpi lakah, “Zingten tubang hunin Samaria khuasung dawlah, sangvut phabel cuai khat, ahimata barli sangvut cuai nih cu ngun tangka cang khat tuah zuak haw tuk hi,” a tih ten,

¹⁹ mah kumpi zuitu bawi in, “A cangthei mi kha ma hi, Topa amah in van tukvelh hong vutin cang a khesuk hei in cangthei tukma,” tin don hi. Elisha in, “Hi ngangai tuk a na mit loli in mu tuk naven cin ei ngah tukma ci,” tin don hi.

²⁰ A tih bangin a humah heng ngangai ta poh le, mipi ten khuapi kongkhah pen cil hum haw hi.