2 KUMPI 6 - Ngawm Bible

Heipi Cang Ngah Leh Haw

¹ Vei khat cu Elisha i ho mi profette cu Elisha lakah hung haw in, “Zo in, a umnak uh hi neu leita.

² A umnak uh inn a ngeng saw deuhin, saklehnak thingphuk tukin Jordan ah hawhtikin hi,” ti haw hi. Elisha in, “Pha hi, hawh un,” ti hi.

³ Profet pa khatin, hawh bok tukin Elisha cu zawmin, a lungkim hi.

⁴ a venghawng haw in, hawh langkhat haw hi. Jordan a hen haw ten thing cu phuk haw hi.

⁵ Pa khat pa in, thing a phuh laihin, phawhkhak ngawlin, tui sungah a heipi cang cak kha hi. “Aw hoi, ka bawipa, itin kaw ka bawl tuk? ka zawnmi le hi bok si?” tin au hi.

⁶ Elisha in, “Ilai tawkkekah kaw a caksuk?” tin dong hi. Mahpa in, a caknak tawkkek cu hilh hi. Elisha in ngolhkang pa khat satvutin, tui sungah a lot ten heipi cang cu langto hi.

⁷ Elisha in, “La hah hi,” ti in mahpa in sawkin, la hi.

Siria Ngalkapte Sung Haw

⁸ Vei khat cu Siria kumpi in, Israel ngam do hi. A ngalbawite tuah tawkdun khawm haw in, “Mahlai zawn, mah zawnte pen nam un hi,” tin thupia hi.

⁹ Elisha in Israel kumpi lakah, “Mahlai munte ah na hawh pahsuh un. Siria ngalkap ten pang haw hi,” tin thucah hi.

¹⁰ Mah hangin Israel kumpi in mahlai lam a hawh ngalkapte cu ngallinnak pia in, mahtih bangin vei tampi luat haw hi.

¹¹ Mahmi cu Siria kumpi in, a zak ten a thinukzet hi. A ngalbawite cu samin, “Akua kaw Israel kumpi lamah a tangtu eimu lak pen a um?” tin dong hi.

¹² Ngalbawi pa khatin, “Maw kumpi pa, kuamah in zuak ma ung. Na khan sung pen, na hilhmi na thukuhte tian profet Elisha in Israel kumpi lakah a hilh lelem hangin hi,” ti hi.

¹³ Siria kumpi in, “Mahpa i umnak cu hilh unna, man tung,” ti hi. Elisha cu Dothan ah um hi tin, a hilh haw ten,

¹⁴ cipuh le cipuhlengte tuah ngalkap tampi cu mahlai ah hah hi. Dothan khua cu zanlamin heng haw a, kil khawng haw hi.

¹⁵ A zing, zingtungno in, Elisha i umlawhpa cu a thawh ten pualeu lamah tulin, Dothan khua kiltu Siria ngalkapte, a cipuh le a cipuhlengte tuah mansa tiptepin, a um haw cu mu hi. Elisha lakah tai in, “Ai zaw, bawipa lalthongta hung ngei! Itin kaw a um tuk uh?” tin thinsu zetin au hi.

¹⁶ Elisha in, “Na thinsu pahsun; amu lak a ummi sangin eimu lak a ummi hi tam saw haw hi,” ti hi.

¹⁷ Topa i lakah thungen hi. “Topa aw, a mitvaktik inna, khua mutikin hi,” ti hi. Topa in, a thungetnak cu zain, Elisha i umlawhpa in khua a zoh ten Elisha i elkim mual tuanpi hempoh cu cipuh le mei alh cipuhleng tuah dimin mu hi.

¹⁸ Siria ngalkap ten a nam haw ten Elisha in thungenin, “Topa aw, hi ngalkapte hi a mit haw cawtikin,” ti hi. Topa in, a thungetnak cu ngai in, a mit haw cawtik khawng ngangai hi.

¹⁹ Elisha cu a lak hawah hawhin, “Lampi pai uh ci. Na zei lih uhmi khua cu hihi kha ma. Keimah zui unna, na zei mipa uh i umnakah hawhpih tung,” ti hi. Samaria ah hawhpih hi.

²⁰ Khuasung a hen bek haw ten Elisha in, thungenin, “Topa aw, a mit haw damtik inna, khua mu haw hen,” ti hi. Topa in, a thungetnak cu sang hi; a mit haw damtikin, Samaria khuasung a um haw cu mu haw hi.

²¹ Israel kumpi in Siria ngalkapte amuh ten, “Bawipa, hi ngalkapte hi that khawng nang maw?” tin Elisha dong hi.

²² Elisha in, “That pahsun. Ngal na donak uh pen na mat uhmi ngalkapte hei that pahsuh un. A eih haw tuk tui le an pia unna, a kumpi haw lakah pin haw hen,” ti hi.

²³ Mah hangin Israel kumpi in an eih puai ngengzet bawlsakin, a in, a eih celh haw ten Siria kumpi lakah pin haw hi. Mah hun pepan Siria ngalkap ten Israel ngam doleh haw ma toh hi.

Samaria Sim Haw

²⁴ Hun a ngeideuh nungten Siria kumpi Benhadad in, a ngalkap hempoh samkhawm a, Israel cu do in, Samaria khuapi cu kil khawng hi.

²⁵ Hun ngeipi sung a kil khawng hangin Samaria khua sungah an eih tuk haksa zetin, laak lu pa khatah tangka sawm liat manin, mual pulun khut mikawk kilh khatah ngun tangka cang nga man hi.

²⁶ Ni khatin Israel kumpi cu khuapi kulhtian mawkah lam a len laihin, numei nu pa khatin, “Maw kumpipa hu bawm zalin hi,” tin au hi.

²⁷ Kumpi bawipa in, “Topa Pathian in, a bawm ma tale kei in ikaw ka bop theih tuk? Sangvut le sabit neitu heng sa cim?

²⁸ I kin nge cim?” tin ti hi. Numei nu in, “Nungah khin na cano ei nung inna, zingten keima cano eileh nung, tin ti hi.

²⁹ Mah hangin ka cano cu huan ung a, ei khawng ung. A zingten na cano ei toh nung ti naveng phal ngawlin sel,” ti hi.

³⁰ Mah thu cu kumpi in, a zak ten a thasia in, a puante botkek khawng hi. Khuapi kulhtian hum a hawh laihin, a el a um miten a puansilh sunglamah thangkhau puan a silh cu mu haw hi.

³¹ kumpipa in, “Tu ni loli in Shafat capa Elisha a ngawng ka tan ma tale Topa in keimah that hen,” ti hi.

³² Elisha man tukin mi hah hi. Elisha cu a innah umin, upa khenkhat ten na leng haw hi. Kumpipa i hahmi mihing a hen deuh laih ngawlin, Elisha in, “Hi laithat pa in keimah that tukin mi pa khat hah hi,” tin upate cu hilh hi. “A hahmi pa a hen ten kongkhak unna, inn sungah tumtik pahsuh un. Kumpipa amah vang hengpal bok tuk hi,” ti hi.

³³ A ot hei a celh laih ngawlin kumpipa cu na heng ngangai hi. Amah in, “Hiti bang haksatnak ka hum uhah a hengtiktu cu Topa hi. Itin kaw ama bopnak cu ka muan theih tuk toh?” ti hi.