2 KUMPI 24 - Ngawm Bible

¹ Jehoiakim Judah kumpi a hih laihin, Babilon kumpi Nebuchadnezzar in Judah ngam cu do in, kum thum sung Nebuchadnezzar i khutnuai ah um haw hi. Mahnung ten ngal tho hi.

² Topa in Babilon mi, Siria mi, Moab mi le Ammon mite cu Jehoiakim do tukin le Judah ngam siatsuah tukin hah hi. Hihi cu Topa in, a nadektu profet tei lak pen a hilhsami a kimtiknak tukin hi.

^3-4 Kumpi Manasseh sualnak hempoh hangin le a cuangin sualnak nei ngawl mite thisan tam leita a luantik hangin Topa in Judah mite cu a mitmuh ngawlnak ngamah hawlvawk khawng a tum hangin hi nate cu ama thupiaknak tuah a piangmi hi. Topa in Manasseh cu ngaidam thei ma hi.

⁵ Jehoiakim i nadehmi dangte cu Judah Kumpi Tei Khang Tangthu Laibu sungah sialsiah haw hi.

⁶ Jehoiakim cu thi in, a capa Jehoiakhin in kumpi dek hi.

⁷ Izipt kumpi le a ngalkapte cu a ngam haw pen ngamdangah vei khat hei hawhleh thei haw ma toh, itahim titale Izipt i ukmi ngam tampi cu Babilon kumpi in la khawngin, Eufrates Ngun pen Izipt Ngun tian uk khawng hi.

Judah Kumpi Jehoiakhin

⁸ Jehoiakhin cu kum sawm le kum liat a kim ten Judah kumpi dekin, Jerusalem pen ha thum sung uk hi. A nu cu Jerusalem khua mi Elnathan i canu Nehushta hi.

⁹ Jehoiakhin cu a pa i ziaza a zui hangin Topa i humah sual hi.

¹⁰ Jehoiakhin cu Judah kumpi a hih laihin, Babilon ngalkapte Nebuchadnezzar i ngalbawi tei ho in, Judah ngamah hung haw a, Jerusalem khuapi kil haw hi.

¹¹ A kil haw sungin Nebuchadnezzar amah loli Jerusalem ah hungin,

¹² Kumpi Jehoiakhin in, a nu, ama nadektu umlawhte, a khutnuai bawite le kumpi ngalkap hotu bawite tuah Nebuchadnezzar lakah hawhin, a khutnuai ah tum hi. Nebuchadnezzar in Babilon ngam a uknak kum liat kumin, Jehoiakhin cu man hi.

¹³ Topa i Biakinn le Kumpi inn a ummi sui le ngunte cu Babilon ah pua khawng hi. Topa i hilh hamsanak bangin Nebuchadnezzar in Topa i Biakinn a, man tukin Solomon in sui tuah a bawlmi nate cu sukeh khawng hi.

¹⁴ Jerusalem khuasung mi, kumpi sung khat le hotute hempoh, a venghawng haw in thawng sawm, Babilon ah Nebuchadnezzar in sila in pui hi. Khutzung thiamte le pumsute tianin pui khawngin Judah ngamah mi ca-ngahbelte bek zam hi.

¹⁵ Nebuchadnezzar in, kumpi Jehoiakhin cu a nu le a zite, a khutnuai bawite le Judah ngam hotute tuah Babilon ah sila in pui hi.

¹⁶ Mi ngil le mi thupite, ngalkap dek theitu le ngaldo tukin a matsate thawng salih le khutzung thiamte le pumsute mihing thawng khat, Babilon ah pui hi.

¹⁷ Nebuchadnezzar in Jehoiakhin i pasel, Mattaniah cu Judah Kumpi ah bawlin, a min cu Zedekiah tin thek hi.

Judah Kumpi Zedekiah

¹⁸ Zedekiah cu kum sawm nih le kum khat a kim ten Judah kumpi dekin, Jerusalem pen kum sawm le kum khat uk hi. A nu cu Libnah khua mi Jeremiah i canu Hamutal hi.

¹⁹ Kumpi Jehoiakim i sualnak bawlmi cu kumpi Zedekiah vangin bawlin Topa i humah misual hi.

²⁰ Jerusalem le Judah mitei humah Topa cu a thinuk zetin, a mitmuh ngawlnak ngamah hawlvawk hi.