2 KUMPI 23 - Ngawm Bible

Josiah In Siatsuah Khawng

¹ Kumpi Josiah in, Judah ngam le Jerusalem khua a hotute samin,

² Mahte tuah Topa i Biakinn ah hawh haw hi. Thiampi le profet, Jerusalem khua sungmi venghawngin, mihau hihen, mi ca-ngah hihen zui khawng haw hi. A venghawng haw mai ah Biakinn sungah amuh haw mi thutepnak laibu cu nging zetin sial khawng hi.

³ Kumpi dinnak tukin koihmi khuam elah Josiah cu dingin mah laibu sung a, ummi bangin Topa i thungai tukin, a lungmu le a nunnak venghawng tuah a daan le a thupiakmi hempoh zui tukin le thutepmi sung a ummi bangin bawl khawng tukin Topa i lakah thutiam hi. Mipi vangin Topa i piakmi thukham cu zui tukin thutiam bok haw hi.

⁴ Josiah in Baal pathian biaknak a, manmi na hempoh, pathian Asherah biaknak le aksite biaknak a, manmi na hempoh cu Topa in Biakinn pen suah khawng tukin Thiampi Sang Hilkiah, a bawmtu thiampite le Biakinn kongka a nadektu tei lakah thupia hi. A thupiak bangin suah khawng haw in, mah nate cu kumpi in Jerusalem khuapi pualeu, Kidron Hawkluam elah haal khawngin, a meivamte cu Bethel ah kuat hi.

⁵ A laihngawl a, Judah kumpi a dektu kumpi tei nadeh piakmi thiampite, Jerusalem elkim le Judah ngam sungah Pathian biaklandawh hum a, biakpiaknak piatu thiampite le Baal pathian, ni, hade, aksi le van a ummi hempoh tei lak a, biakpiaknak bawltu thiampite hempoh cu a nadeh haw pen hawlvawk khawng hi.

⁶ Topa i Biakinn ah Asherah pathiannu ca tukin phutmi khuam thiangtho cu phai in, Jerusalem khua pualeu Kidron Hawkluamah halin, zan zetin, a huah dihdiah nungten mipite vuinak khanmualah theh khawng hi.

⁷ Biakinn sung a, numei pha ngawl tei umnak tukin manmi khante cu siatsuah khawng hi. (Mahlai ah numei ten Asherah biaknakah man tukin puan tak haw).

⁸ Judah ngamsung khuapi pen thiampite cu Jerusalem ah khawmdun khawngin, a biakpiaknak haw biaklandawh cu ngamsung khua hempoh ah Geba pen Beersheba tian, nawngkaitik khawng hi. Khuapi tumnak kongkhah veilam a ummi, khuapi uktu bawi Joshua i sakmi kongkhah el a, keelhuai ca in sakmi biaklandawh siatsuah khawng hi.

⁹ Thiampite cu Topa i Biakinn sungah nadektu hi thei haw ma hi; mahnaven a ngualcam thiampi tei ca piakmi naman hel ngawl cangho cu ei thei bok haw hi.

¹⁰ Josiah in Molek pathian lakah a canu le capa haw halkang biakpiaknakah a piak theih haw ngawlnak tukin Hinnom Hawkluam a, pathian biaknak mun Tofeth cu nintik khawng hi.

¹¹ Judah kumpi tei a bawl haw mi ni biaknak le upatnak tuk a tihmi haw cipuhte cu siatsuahin cipuhlengte vang haal khawng hi. Hi cipuh le cipuhleng cu Topa i Biakinn huan sung kongkhah el, Nathan Melek tihmi bawi upa inn pen naino ah a koih haw mi hi.

¹² Judah kumpi ten kumpi inn hum a dawh haw mi biaklandawhte le Topa i Biakinn a khan pa nih sung a, kumpi Manasseh in biaklandawh a bawlmite cu kumpi Josiah in siatsuah khawng hi; biaklandawhte cu zan niknekin sukeh a, Kidron Hawkluamah vawk hi.

¹³ Olif Mual pen hanglam, Jerusalem i nisuahnak a, kumpi Solomon i ningdelhhuai pathiante, Sidon pathiannu Astarte, Moab tei pathian Khemosh le Ammon tei pathian Molek ca tukin a dawh haw mi biaklandawhte cu siatsuah khawng hi.

¹⁴ Mah pathian tei suangphutte cu sukeh khawngin, pathiannu Asherah ca in, a phut haw mi khuamte phuk khawngin, a dinnak haw munte cu mihing nguh tuah khuh khawng hi.

¹⁵ Nebat capa, Israel mite sualnak sungah a puitu, Kumpi Jeroboam in Bethel ah Pathian biaknak a sakmi cu Josiah in siatsuah khawng hi. Biaklandawhte a siatsuah nungten suangphutte sukeh khawngin, zantik khawng hi. Asherah biaknak ca in, a phut haw mi khuam thiangthote haal hi.

¹⁶ Josiah in, a elkim zo in, mualhumah khante mu hi. A sung a, nguhte cu pholhtikin, biaklandawh humah haal hi. Biaklandawh cu nawngkaitikin masa lam pi a, puai hunin, mah biaklandawh el a, kumpi Jeroboam a din laihin, profet in, a hilh sami cu kimtik hi. Kumpi Josiah in, a elkim zo lehin, mah thu a hilhtu profet i khan cu mu in,

¹⁷ “A koi khan kaw?” tin dong hi. Bethel khua miten, “Judah ngam pen hungin hi biaklandawh hum a, na bawlmite hi umleh tuk hi tin, a hilhtu profet i khan hi,” tin ti haw hi.

¹⁸ Josiah in, “Hi khan cu kuamah in zen kha pahsuh un; hi tihno in um poh hen. A nguhte vang pholh pahsuh un,” tin thupia hi. Mah hangin a nguhte cu pholh haw ma, Samaria pen a hungmi profet tei nguh vang pholh haw ma hi.

¹⁹ Israel kumpi tei a bawl haw mi, Topa i thin a uktiktu biaklandawhte cu Israel ngamah tampi um hi. Mah biaklandawhte cu Israel khuapi tihkimah umin, Josiah in phelet khawng hi. Bethel khua biaklandawh hum a, bawl bangin hi biaklandawh tei hum hei ah bawl hi.

²⁰ Mah biaklandawh a, nadektu thiampite cu a nadehnak haw biaklandawh humah that khawng haw hi. Mah biaklandawh tihkim humah mihing nguh haal hi. Mahnung ten Jerusalem ah kik hi.

Josiah In Kaltan Puai Bawl

²¹ Kumpi Josiah in, Thutiam laibu sungah a ummi bangin, Topa a Pathian haw upatnakin, Kaltan Puai bawl tukin mipi lakah thupia hi.

²² Thukhentu ten Israel ngam buppi a uk pat haw pepan Israel kumpi ten hihen, Judah kumpi ten hihen, kumpi kuamah hei in tutum a, Kaltan Puai a bawl haw bangin bawl awng haw ma hi.

²³ A tawpnakin, Josiah in kumpi a deh kum sawm le kum liatnakin, kaltan puai cu Jerusalem ah bawlsuak haw hi.

Josiah Lepmi Dadang

²⁴ Thiampi Sang Hilkiah in, Topa i Biakinn sung a, muhmi laibu sung a, ummi daante cu zui suak tatak tukin Jerusalem khua le Judah ngamsung a, um mipolte le khutlam zothiamte cu kumpi Josiah in, hawlvawk khawng hi; innkua milimte, pathian zukte le a pathian biaknak na hempoh siatsuah khawng hi.

²⁵ Kumpi Josiah bangin, Topa i nadeh a lungmu venghawng, a cihnak venghawng le a tha neihmi venghawng tuah dekin Moses Daan a zui khawngtu kumpi um awng haw ma hi, ama nung hei ten amah bang cu kuamah um awng haw ma laih hi.

²⁶ Topa i thinuknak cu kumpi Manasseh i na bawlmi hangin Judah mitei humah mei bangin sa in, tu hei in dap ma laih hi.

²⁷ Topa in, “Israel hum a ka bawlmi bangin Judah hum hei ah bawl tung hi. Ka mitmuh ngawlnak ngamah Judah mi cu hawlvawk tung hi; ka ten sa mi Jerusalem khuapi le keimah a biak lelengnak haw tukin ka tihmi Biakinn cu lawl tung,” ti hi.

Kumpi Josiah Thihnak

²⁸ Kumpi Josiah i nadehmi dangte cu Judah Kumpi Tei Khang Tangthu Laibu sungah ngan haw hi.

²⁹ Josiah cu Judah kumpi a hih laihin, Izipt kumpi Neko in, a ngalkapte ho in, Assiria kumpi bawm tukin Eufrates Ngun lamah hawh hi. Mahmi cu kumpi Josiah in kham tum hi; Megiddo ah Izipt kumpi tuah dodun haw in, Josiah cu that haw hi.

³⁰ A khutnuai bawi ten a luang cu cipuhleng tuah Jerusalem ah pua haw in, kumpi khanah vui haw hi. Judah miten Josiah i capa Jehoahaz cu a pai ai-awhtu tukin tengin, sathau thihin kumpi in bawl haw hi.

Judah Kumpi Joahaz

³¹ Joahaz cu kum sawm nih le kum thum a kim ten Judah kumpi dekin, Jerusalem pen ha thum sung uk hi. A nu cu Libnah khua mi Jeremiah i canu Hamutal hi.

³² Joahaz in tanglaih a pu le pa tei ziaza a zui hangin Topa i mitmuhah sual hi.

³³ Izipt kumpi Neko in, manin Hamath ngam Riblah khua thawngah khia hi, mahten Judah miten Izipt kumpi lakah ngun tangka cangin, cuai thawng nih le sui cuai sawm nih siah pia haw hi.

³⁴ Kumpi Neko in, Josiah i capa Eliakim cu Josiah ai-awhtu in, Judah kumpi in bawlin a min cu Jehoiakim in thek hi. Joahaz cu kumpi Neko in Izipt ngamah pui in, mahlai pen thita hi.

Judah Kumpi Jehoiakim

³⁵ Kumpi Jehoiakim in Izipt kumpi i siah ngetmi kim tukin mipi lak pen a hauhnak le a ca-ngahnak haw zo in siah la hi.

³⁶ Jehoiakim cu kum sawm nih le kum nga a kim ten Judah kumpi dekin Jerusalem pen kum sawm le kum khat sung uk hi. A nu cu Rumah khua mi Pedaiah i canu Zebidah hi.

³⁷ Jehoiakim in, a pu le pa tei ziaza a zui hangin Topa mitmuhah sual hi.