2 KUMPI 2 - Ngawm Bible

Elijah Cu Vancung Ah Lato

¹ Topa in, Elijah cu simpei tuah vancungah a laktoh hun heng hi. Elijah le Elisha cu Gilgal pen tulin,

² a hawhlih haw laihin Elijah in, Elisha lakah, “Nang hilai ah hin na umin hi. Kei cu Topa in Bethel hawhtik hi,” ti hi. Elisha in, “Topa i min salin le nangma nunnak tuah thutiamdun ing. Nangmah cu kihsan hihim tuk mang,” ti hi. Mah hangin a pa nih haw in, Bethel ah hawh haw hi.

³ Mahlai a um profet cu Elisha lakah hungin, “Topa in, na bawipa hi tuni in, na lak pen la tuk hi thei cim?” tin dong hi. Elisha in, “Hi zuh hi, thei ing. Mahnaven mah thu cu son kha ma nung,” ti hi.

⁴ Elijah in, Elisha lakah, “Nang hilai ah na umhihin hi. Kei cu Topa in Jerikho hawhtik hi,” ti hi. Elisha in, “Topa i minsalin le na nunnak tuah thutiam ing. Kihsan hihim tuk mang,” ti hi. Mah hangin a pa nih haw in hawh langkhat haw hi.

⁵ Mahlai a um profet hon khat cu Elisha lakah hungin, “Topa in, na bawipa cu tusunin, na lak pen la tuk hi, tih thu thei a cim?” ti in dong haw hi. Elisha in “Mahzuh hi, thei ing. Mahnaven mah thu cu son pahsuh un,” ti hi.

⁶ Elijah in, Elisha lakah, “Nang hilai ah na umhihin hi. Kei cu Topa in Jordan ngunah hawhtik hi,” ti hi. Elisha in, “Topa i min salin, na nunnak tuah thutiamdun ing: Nangmah zam hihim tuk mang,” ti hi. Mah hangin a pa nih haw in hawh haw a,

⁷ Profet sawm nga in, Jordan Ngun tian hen haw hi. Elijah le Elisha cu Jordan Ngun mawkah dingin profet sawm nga cu a khawla thimah ding haw hi.

⁸ Elijah in, a angki cualpi cu dukin, a zial nungten mahmi tuah tui cu vat hi; mahten tui cu khendun paihin, Elijah le Elisha cu leiko hum pen ngalkhat lamah hawh haw hi.

⁹ Mahlai pen Elijah in, Elisha lakah, “Kei cu na lak pen laktoh hi tuk toh ing. Mah hangin laktoh ka hih lai ngawlin i bawlsak tuk deih kam?” tin dong hi. “Nangmah ai-awhtu ka hih theihnak tukin ka covo tuk i let nihin, na huham pia in,” ti hi.

¹⁰ Elijah in, “Na ngetmi cu piak tuk hakzet hi. Mahnaven na lak pen keimah laktoh ka hih laih a mutu na hi tale na ngetmi cu ngah tuk ci, na mu ma tale ngah tukma ci,” ti hi.

¹¹ Thuson thahin, a hawh lih laihtak haw in, phawhkhak ngawlin, a laklawh hawah mei alh cipuh i kaihmi mei alh cipuhleng heng vutin, Elijah cu simpei in vanah len toh pih hi.

¹² Mahmi cu Elisha in mu in, “Ka pa, Ka pa! Thawmngeng Israel hup theitu!” tin au hi. Mahnung ten Elijah cu mu lehma toh hi. Thasia in, Elisha cu a puansilhmi khen nih suahin botkek hi.

¹³ A duh zomi Elijah i angki cualpi cu Elisha in, a khul nungten kiklehin, Jordan Ngun mawkah ding hi.

¹⁴ Elijah i angki cualpi tuah tui cu vatin, “Ilai ah kaw Topa, Elijah i Pathian cu a um?” tin ti hi. Tui cu a vah ten khendunin, Elisha cu khatlam ngalah tanvawk hi.

¹⁵ Jerikho a um profet sawm nga ten amah cu amuh haw ten, “Elijah i huham cu Elisha humah um hi,” ti haw hi. Muak haw in, a mai ah kunin,

¹⁶ Na nadektu “Mi ngil nguakcang mihing sawm nga hilai ah um ung. Hawh inna bawipa cu zei nung. Topa i hawvangin pui a, mualhumah maw, luam sungah maw, mun kha khatah zamta hi tuk,” tin ti haw hi. Elisha in, “Mah kha ma hi, hawh pahsuh un,” ti hi.

¹⁷ Mahnaven a nget lo haw hangin hawhtik hi. Mihing sawm nga cu hawh haw in, a suk le a to, ngam tihkimah ni thum sung zei haw hi. Mahnaven Elijah cu mu haw ma hi.

¹⁸ Elisha in Jerikho khua pen ngakin, a lakah a kihleh haw ten, “Hawh pahsuh un, ti ma ing maw?” ti hi.

Elisha i Nalamdang Bawlmi

¹⁹ Jerikho khuasungmi khenkhatte cu Elisha lakah hungin, “Topa, na theih bangin hi khua ah mun le ngam hi phazet hi. Mahnaven tui pha ngawlin nau siatnak suaktik leleng hi,” ti haw hi.

²⁰ Elisha in “Kuang thak sungah ci koih unna, ka lakah hunpih un,” ti hi. A tih bangin hunpih haw in,

²¹ a khua haw i tuinakah hawhin, ci cu a hah nungten, “Topa in ‘Hi tui cu thiangtik zo ing a, thihnak le nausiatnak suaktik tukma toh hi,’ ti hi,” tin hilh hi.

²² Mah pepanin, Elisha i hilhnak bangin mah tui cu tui thiangtho in suakta hi.

²³ Elisha cu Jerikho pen tulin Bethel lamah a hawh laihin khua pa khat pen pano naupang tul haw a, cekpan bawlnakin mang haw in, “Hawhin, lu kolhpa hawhin,” tin ti haw hi.

²⁴ Elisha cu nunglam hekin ahin thahin, Topa i min tuah tam hi. Hampa lak pen vom pinu pa nih tulin pano naupang sawm li le pa nih cu botkek khawng haw hi.

²⁵ Elisha cu Karmel mualah hawhin, mah nungten Samaria ah kikleh hi.