2 KUMPI 16 - Ngawm Bible

Judah Kumpi Ahaz

¹ Remaliah i capa Pekah in Israel ngam a uk kum sawm le kum salih kumin, Jotham i capa Ahaz cu Judah kumpi dek hi.

² Kumpi a deh ten Ahaz cu kum sawm nih hi a, Jerusalem pen Judah ngam cu kum sawm le kum luk sung uk hi. A pu David i bawlmi thilpha bawl ma hi, Topa a Pathian i deih ngawlmite bawlin,

³ Israel kumpi dang tei nungzui hi. Israel mite Kanaan ngam a tum haw laihin Kanaan ngam a um, Topa i hawlvawkmi tei bawlmi thil ningdelhhuai nate bawlbok hi. A ma capa loli hei milim biaknakah halkang biakpiaknakin mang hi.

⁴ Mualkul humah le thingkungpi nuai hempoh ah leimi tei pathian biaknak mun tihkimah Ahaz in biakpiaknak bawlin namtui haal pepel hi.

⁵ Siria kumpi Rezin le Israel kumpi Pekah in, Jerusalem khua cu do in, kil khawng haw hi; mahnaven Ahaz cu neh thei haw ma.

⁶ Mahlai in, Edom kumpi in Elath khua cu la lehin, mahlai a um Judah mite cu hawlvawk khawng hi. Elath khua ah Edom mite um haw in, tuni tian um haw laih hi.

⁷ Ahaz in, Assiria kumpi Tiglath Pileser lakah thucahin, “Kei cu na nadektu na sila le na capa ing. Siria kumpi le Israel kumpi ten a do haw hangin keimah hu pan zalin,” ti hi.

⁸ Ahaz in Biakinn a, sui le ngun le kumpi inn a, sui le ngunte la in, Assiria kumpi lakah laksawngin kuat hi.

⁹ Ahaz i nget bangin Tiglath Pileser cu a ngalkapte tuah tul haw a, Damaskas cu do in, la haw hi; kumpi Rezin cu thatin, khuasung mite cu Kir khua ah sila in pui hi.

¹⁰ Kumpi Ahaz cu kumpi Tiglath Pileser tawk tukin Damaskas khua ah a hawh ten mahlai ah biaklandawh mu in, mahmi bang cikcekin, dawh bok tukin a luangzingte kimno in, thiampi Uriah lakah kuat hi.

¹¹ Mahmi umdan bangkekin, Uriah in biaklandawh pa khat tiang a, Ahaz a kikleh laih ngawlin ceng khawng hi.

¹² Ahaz cu Damaskas pen a kihleh ten biaklandawh tiang ceng zo hi tih cu mu in,

¹³ a humah biakpiaknak a, manmi ngante cu halin, canghovam biakpiaknakte bawl hi; mah hum pen intuk biakpiaknak a piakmi sabittui tuah leihin, pawlkom biakpiaknak a piakmi sathi tuah theh hi.

¹⁴ Topa i ca tukin thiantikmi le daal tuah bawlmi biaklandawh cu biaklandawh thak le Biakinn laklawhah ummi hi a, mahmi cu biaklandawh thak i saklamah thawn hi.

¹⁵ Uriah cu, “Hi ka biaklandawh ngengpi cu zinglam halkang biakpiaknak le taklam canghovam biakpiaknakin mang inna, kumpi le mipi tei halkang biakpiaknak le canghovam biakpiaknakin mangin hi; mipi tei piakmi intuk biakpiaknak tuk vangin hi tuk hi. Biakpiaknak a, man mi ngan hempoh tei thi cu a humah leihin hi. Mahnaven daal biaklandawh cu keima ca bek hi tuk a, kungkhainak in mang tung,” tin thupia hi.

¹⁶ Mah Uriah in kumpi i thupiaknak bangin bawl khawng hi.

¹⁷ Kumpi Ahaz in, Biakinn sung a um lengkete cu pheletin, a hum a ummi maihumte cu la hi; mah ten daal khuicang sawm le pa nih i nunglam a ummi daal tuikuang cu la in, suangpeek phahmi humah koih hi.

¹⁸ Mah hum pen Assiria kumpipa lungdamtik tukin Ahaz in, Biakinn sung a, ummi kumpi khunnak koihnak taitan cu lawlvawkin, Biakinn sung a, kumpi tumnak lampi cu khak khawng hi.

¹⁹ Kumpi Ahaz i nadehmi dadang cu Judah Kumpi Tei Khang Tangthu Laibu sungah ngan haw hi.

²⁰ Ahaz cu thi in, Jerusalem, David khuapi a, kumpi khanah vui haw hi. Mahten a capa Hezekiah in kumpi dek hi.