2 KUMPI 11 - Ngawm Bible

Judah Kumpinu Athaliah

¹ Kumpi Ahaziah i nu Athaliah in, a capa a thah haw thu a zak ten, a capa Ahaziah i innkuate cu kumpi suak kha haw kawn tih lau in, that khawng hi.

² Ahaziah i capa Joash bek luat hi. Amah vang cu thah tukmi naven a ninu Jehosheba in pan ngah hi. Jehosheba cu kumpi Jehoram i canu hi a, Ahaziah i celnu hi. Jehosheba in Joash cu amah awhtu nu tuah Biakinn sung a, zaunak khan pa khat sungah selin mahlai ah cingkhawi hi; mahten Athaliah in mu ngawlin luat hi.

³ Jehosheba in Joash cu kum luk sung biakinn sungah selin phano in zo hi mah sung cu Athaliah in kumpinu dekin, ngampi uktu hi.

⁴ Mahnaven kum salihnakin, thiampi Jehoiada in kumpinu cingtu le kumpi inncingtu bawite cu Biakinn ah samin, thutiamtik a, a tuptahmi cu a lak hawah hilh hi. Kumpi Ahaziah i capa Joash cu a mai hawah hunpihin,

⁵ hi bangin thupia hi. “Sabbath ni-in micingtu na hih uhten nangmu lak pen khen thum khenkhatin kumpi inn na cing un hi.

⁶ Adang khenkhat cu Sur Kongka cingtu hi tuk uh ci, a dang khenkhat cu kongkhah cingtu tei nunglam pen na cing un hi.

⁷ Sabbath ni a micingtu hon nih ten, a cuangin Biakinn ah dehvo nei unna, kumpi cing un hi.

⁸ Kumpi Joash cu na ngalnam uh dawksa in cing unna, a hawhnak hempoh ah na zui un. Nangmuh a nektu hempoh that un hi,” ti hi.

⁹ Thiampi Jehoiada i thupiakmi cu bawi ten ngai haw in, a khutnuai mihingte, Sabbath ni a, micingtute hihen, a cing ngawltute hihen, a lakah hunpih khawng haw hi.

¹⁰ Jehoiada in bawi tei lakah, David i man mi, Biakinn sung a koih haw mi ceipi le lumphawte cu pia hi.

¹¹ micingtu ngalkapte Biakinn elkimah koihin, a ngalnam haw cawi tiptep thahin kumpi cu cing haw hi.

¹² Jehoiada in Joash cu tulpihin, kumpi lukhuh a khuh nungten thutepnak laizial le kumpi thuneihnak laipi tuah pia hi. Sathau thihin, kumpi in bawl hi. Mipi ten baibengin, “Kumpi, a nunkhua sau zal hen!” tin au haw hi.

¹³ Kumpi bawinu Athaliah in, mipi le micingtu tei au thawm cu a zak ten mipi tei tawhdun khawmnak Biakinn ah manlang zetin hawh hi.

¹⁴ Kumpi thak cu, a dan bangin Biakinn sung tumnak khuam elah dingtikin, ngalbawite le pengkul tumtu ten cing tiptep haw hi. Mipi cu lungdam zetin au haw a, pengkul tumin, a um haw cu Athaliah in mu hi. A lungsia in, a puan botkek a, “Zohsuamnak! Zohsuamnak!” tin au hi.

¹⁵ Jehoiada in Biakinn sungah Athaliah thah a nuam ngawl hangin ngalbawi tei lakah, “Man unna, ngalkap ten cingthahin, a pua lamah dok tul un hi, amah a pan tumtu hempoh cu that un,” tin thupia hi.

¹⁶ Man haw a, kumpi innah hunpihin, Cipuh kongkhah tihmiah that haw hi.

Jehoiada i Nadehmi

¹⁷ Jehoiada in, Topa i miphun a hihnak tukin kumpi le mipi cu, Topa tuah thutepnak bawltik hi, kumpi le mipi tei laklawhah thutepnak bawltik hi.

¹⁸ Mipi ten Baal biakinn ah hawhin, siatsuah khawng haw hi; biakinn sung a um biaklandawh le milimte cu sepkeh khawng haw hi. Baal thiampi Mattan cu biaklandawh mai pen that haw hi. Jehoiada in Biakinn ah micingtu koihin,

¹⁹ amah le ngalbawite, kumpi cingtu le kumpi inncingtu ten kumpipa cu Biakinn pen kumpi innah hawhpihin, mipi ten zui haw hi. Joash cu Micingtu Kongkhah tihmi pen tumin, kumpi khunnak humah khung hi.

²⁰ Mi hempoh tei lungmu sung cu lungdamnak tuah dim hi; kumpi inn sung pen ngalnam tuah Athaliah a thah nung haw ten a khuapi cu dai hi.

²¹ Kum salih a kim ten Joash cu Judah kumpi dek pan hi.