2 KUMPI 1 - Ngawm Bible

Elijah le Kumpi Ahaziah

¹ Israel kumpi Ahab a thih nungten Israel do tukin Moab mite ngaltho haw hi.

² Israel kumpi Ahaziah cu Samaria a, kumpi inn hum kemdawh pen cak kha in, nasezet liam hi. Mah hangin a nuntuk le nuntuk ngawl thei nuamin, Ekron khua a pathian haw Baalzebub thusiampih tukin, Filistin ngam Ekron khua ah mi hah hi.

³ Mahnaven Topa i vancungmi pa khatin, Tishbe khua a, profet Elijah cu kumpi Ahaziah i a mi hahte tawktikin, a lak hawah, “Itakaw Ekron khua a, Baalzebub pathian tawk tukin na hawh uh? Israel ngamah Pathian umma maw i hum?

⁴ Na kumpi uh i lakah, ‘Topa in nung tukma ci. Na liamnakin thi tuk ci,’ ti hi, tin na hilh un,” tin ti hi. Topa i thupiaknak bangin Elijah in hilh hi,

⁵ mah hangin kumpipa i hahte cu kik haw hi. Kumpipa in, “Itahim na kihleh uh?” tin dong hi.

⁶ A muh ten, “Mi pa khat tawk ung a, nangmuh a hawhtiktu kumpipa i lakah, na kikta unna, a lakah Topa in, ‘Ita Ekron a, Baalzebub pathian tawk tukin mi hah kam? Israel ngamah Pathian umma maw? Nung tukma ci, na liamnakin thi tuk ci;’ tin na hilh un, a tih hangin kik ung,” tin ti haw hi.

⁷ Kumpipa in, “Na tawh uhmi pa cu iti bang mihing kaw?” tin dong hi.

⁸ Amuh ten, “Savun tuah bawlmi angki cualpi silhin, savun taikhap khap hi,” ti haw hi. Kumpipa in, “Elijah hi tuk hei!” ti hi.

⁹ Kumpipa in Elijah pui tukin ngalbawi pa khat le ngalkap sawm nga hah hi. Elijah cu mualhumah a khun laihin, ngalbawi pa in, mu in, a lakah, “Pathian mihing pa, kumpipa in hung hen,” tin ti hi.

¹⁰ Elijah in, “Pathian i mihing ka hi tale van pen mei alh kulhsuk henna, nangmah le na mihingte kang khawng hen!” tin ti hi. Thakhat thu in, van pen mei alh caksukin, ngalbawipa le a ngalkapte cu kanghum khawng haw hi.

¹¹ Kumpipa in, adang ngalbawi pa khat le ngalkap sawm nga hah lehin, Elijah lakah hawh haw hi. Ngalbawipa in, “Pathian mihing pa, kumpipa in manlang zetin hungin ti hi,” tin hilh hi.

¹² Elijah in, “Pathian i mihing ka hi tale van pen mei kulhsuk henna, nangmah le na ngalkapte kang khawng hen!” ti hi. A tih bek ten van pen Pathian mei alh kulhsukin, ngalbawipa le a ngalkapte cu kanghum khawng haw hi.

¹³ Kumpipa in, adang ngalbawi pa khat le ngalkap sawm nga hah leleu hi. Ngalbawipa cu Elijah lakah hawhin, Elijah mai ah khukdinin, “Pathian i mihing pa aw, keimah le ka mihing tei humah hehpih zazal inna, ka nunnak hi khawih zalin hi.

¹⁴ Ka masuan a, ngalbawi pa nih le a ngalkapte cu van pen mei alhin kanghum khawng haw hi. Mahnaven kei cu hu hehpih zalin hi” tin ngen hi.

¹⁵ Topa i vancungmi in, Elijah lakah, “Amah tuah na hawhin hi. Imah lau pahsun,” ti hi. Elijah cu ngalbawipa tuah kumpipa i lakah hawh haw hi,

¹⁶ a lakah, “Topa in ‘Israel ngamah Pathian um ngawl bangin Ekron khua Baalzebub pathian lakah mi na hah hangin tu a, na zaunak hum pen tholeh tukma toh ci. Thi tuk ci,’ ti hi,” tin hilh hi.

¹⁷ Elijah lak a, Topa i awnkam bangin Ahaziah cu thi hi. Ahaziah cu capa a neih ngawl hangin a unau Joram in, Judah kumpi Jehoshafat i capa Jehoram i kumpi a deh kum nihnak ten Israel kumpi dek hi.

¹⁸ Kumpi Ahaziah i nadehmi hempoh cu Israel kumpi tei Khang Tangthu Laibu sungah ngan khawng haw hi.