2 KORIN 7 - Ngawm Bible

¹ Ka ihmi u le naute aw, hi thutepnak hempoh hi eimu lak a tepmi hi. Mah hangin taksa pumpi hihen, Hawvang hihen, a nintiktu pawpoh cu vawkin, a thiangthono in um nung hi; Pathian upat le kihcaknak tuah nungten nung.

Paul i Lungdamnak

² Na lungmu uh cu keimu ca in tongtik zazal un hi. Kuamah zol ma ung; kuamah siatsuah ma ung hi; kuamah zawnsakin nautat ma ung hi.

³ Hitih bangin ka tih ten nohte cu misual ngeh hi uh ci, tin ka tihnak kha ma hi, itahim titale ni dang laihin ka ot zo bangin nohte ka ihzet uh hangin, nunah hei nung langkhatin, thihah vangin thi langkhat tuk hung hi.

⁴ Ka muan zetmi hi uh ci. Ka maiphatiktu vang nangmuh uh ci. Haksat mangbang ka tawh hei ten muansannak nei leleng ing. Ka lungdamnak vang let duaduah hi!

⁵ Macedonia ka hen nung uh hei ten daidenno in colhnak hun nei ma ung hi. Ilai banglai ah nawngkainak um, midang tuah hauhdunnak umin, ka lungmu sung uhah launak um sih hi.

⁶ Mahnaven thinnau mite lungmu khohnak a piatu Pathian in Titas cu keimu lakah a hentik hangin ka lungmu uh khohleh hi.

⁷ Titas a hen hangin thinnop ung tih bek hei hi ngawlin amah thazaang na piaknak uhte ka theih uhten thatho ngangai ung hi. Itih zahin keimah mu nuamin, sikkik uh cim tih le itih zahin keima lamah na tannak uh tih khi hilh hi, mah hangin ni dang laih sangin ka lungdam saw ing.

⁸ Itahim titale hi bangin lai ka kuatnak i hangin na thasia uh vangin sikleh mang hi. Hun comno sung ahi hei in, hitih bang ka laikuatmi in, na tha uh siatik tih ka muh ten ka thasiazet bok ing.

⁹ Mahnaven atu-in lungdamleh zo ing, na thasia uh hangin ka lungdam hi ngawlin, na thasiatnak uhin, na nundan uh a khelh hangin hi, mahtih bangin na lungsiatnak uh khi Pathian in, a man hangin ka thil bawl uhmi in imah siatsuah ma hi.

¹⁰ Pathian in thasiatnak cu thintheknakin mangin nunpatnakah hengtik hi. Mah hangin mah lungsiatnak hangin sihlehnak imah umma hi, mahnaven leihum lungsiatnak thong ahi tale thihnak hengtik hi.

¹¹ Zo hem un, Pathian i deihnak hangin a piangmi nohtei khaw-ngaihnak hi! Itih zahin him thathonak a suahtik, na sual uh ngawlnak langtik tukin na zuam dan uh hi! Thil sual na muh uhten na thin uh tawtokin, thinsu uh ci, na thin uh uk, na pumpi uh pia in, thil bawl sual mite cawh tukin ngalling sa uh ci. Hi thu hempoh ah sualnak nei ma uh ci, tih khi langtik uh ci.

¹² Mah hangin hi bangin lai ka ngat hi thil sual a bawltu a um hangin le thil sual bawlnak a thuaktu a um hangin hi sapma hi. Thungai in titale keimu ca na pumpiaknak uh itihzah ngai hum tih Pathian i mitmuhah a lang tukin ka ngatmi hi.

¹³ Mah hangin ka thin uh nopin, ka tha uh tho hi. Ka tha uh tho tih bek hei hi ma lai hi. Na venghawng uhin Titas na bop uh, a lungnopnak thu Titas in, a son ten ka lungdamnak uh cu son ceng ma ung hi.

¹⁴ Titas i lakah nangmuh bangin tuangkhawng li ing. Nohte hei in ka thasiatik ma uh ci. Noh tei lakah thutak hilh leleng ing hi; mahti bang bokin Titas lakah ka tuangkhawnnak uh vang cu thumanin cang hi.

¹⁵ Mahten Titas i hilhmi na venghawng un na bawl nuam uh dan le upatnak le kihcaknak tuah na muan dan uhte a sonpih pepel lih ten a itnak hi nisialin khangto dedeuh hi.

¹⁶ Ka lungmu hempoh tuah ka muan theihnak hi lungdam mahtak ing.