2 KORIN 6 - Ngawm Bible

¹ Pathian tuah na a dek langkhatmi ka hih uh hangin Pathian hehpihnak a cotu noh ten mah hehpihnak cu a thawnthongin cangtik pahsuh un tin ngen ung hi.

² Pathian i hilhmi ngai hem un: “Ka hehpihnak na hum uhah ka langtiknak tuk hun a hen ten na aw uh cu za ing. Nangmuh ka nunpatnak tuk ni a hen ten bawm ing,” ti hi. Ngai un! Pathian hehpihnak hun cu atu hun hi, hi; nunpatnak co ni cu tuni hi.

³ Ka nadeh uhmi hi kuamah i sonsiat tuk ka deih uh ngawl hangin kuamah bah sual haw ma hen tin, akua i lampi hei ah lumbahtiktu koih ma ung hi.

⁴ Thinsau zetin cimnak le haksatnak nam tuatuam thuakin mahten Pathian i nadektu ka hihnak uh langtik ung hi.

⁵ Vah co ung, thawnginn sung le mipi tei bawlsiatnak vang tawk ung, ka taksa uh i thuakzawh ngawl zah tianin nadektik haw; hihbu ngawlin le an ei ngawlin um ung hi.

⁶ Ka ziaza phatnak uh hei in hihen, thuman theih theihnak uh le thinsau in hehpihnak ka neihnak uhin hihen, Pathian nadektu ka hihnak uh langtik ung hi. Mah i humah Hawvang thiangtho ka co uhmi le itnak tatak ka neih uhmi in hihen,

⁷ thutak ka phuan uhmi le Pathian huham a langmi in Pathian i nadektu ka hihnak uh langtik bok ung hi. Diknak cu ka ngal uhte nawtvawknakin le keimuh hupdunnakin ka man uhmi hiamnam hi.

⁸ Upatnak vang tawkin mualphonak vang thuak ung hi. Zotsakmi ka hih uh hun umin, pahcoihmi ka hih zawng uh vang um hi. Zolthu son heng bawl haw naven thutak son ung.

⁹ Kuamah i theih awng ngawlmi mikhual bangin ngaisung haw naven mi hempoh tei theihmi vang na hi ung hi. Mithi bangin ngaisung haw naven nung leng ung. Bawlsiatmi hi naven ung, thi ma ung hi.

¹⁰ Ka lung uh siatik mek haw naven lungdam zetin um leleng ung; kohte cu mi zawngzet bang nave ung, mi tampi mihau in cangtik ung hi. Imah nei ngawl bang hi naven ung, ihempoh neitu ung hi.

¹¹ Korin khua a, ngualcam phate aw! Nangmu lakah ciangkohin awn ung hi. Ka lungmu uh cu zal zetin hong ung.

¹² Ka lungmu kongka uh khahsan ma ung. Nangmuh saw in khahsak saw uh ci!

¹³ Ka sungsuak ca bangin nangmu lakah awn ing. Na hum uhah lungmu taituang ka neih uh bangin nohte vangin nei bok un hi. Na lungmu uh zal zetin hong un hi.

Tisa Mitei Zopnak Ngalling Un

¹⁴ Um ngawltute tuah phialdunin, nadek langkhat kha pahsuh un. A cangthei ngawlmi, itin him diknak le siatnak a phialdun theih haw tuk? Itin him khuavak khuathim a um langkhat theih haw tuk?

¹⁵ Itin kaw Khrih le khawhuai a lungmu haw a bangve thei tuk? Thu umtu le umngawltu cu iti bangin a ngaihsutnak haw langkhat thei tuk him?

¹⁶ Pathian i biakinn le umngawltu tei milimte itang kaw a lemdun theih haw tuk? Itahim titale oh cu a nungmi Pathian i biakinn hung hi. Pathian amah loli in: “Ka mihing tei lakah ka umnak inn sa tung a, amu lakah um tung. A Pathian haw hi tung a, amuhte cu ka mihing hi haw tuk,” ti hi.

¹⁷ Topa in, “Amuh zamsan unna, amuh tei lak pen tulsanin khen un hi. A thiang ngawlmi cu tok kha hihim pahsuh un, mahten nangmuhte cu keimah in cosang tung hi.

¹⁸ Kei cu nangmuh tei Pa hi tung a, nohte cu ka capa le ka canute hi tuk uh ci,” tin, Ihempoh tithei Topa in ti hi, tin ti hi.