2 KORIN 4 - Ngawm Bible

Leibeel Sunga Na Manpha

¹ Pathian in hehpihin hi nadeh hi amah in, a dehtik hangin thinnau ma ung.

² A bawl kuh mek uh thil le zahcakhuai thil khi vawk khawng zo ung hi; mizol ma ung, Pathian thu vang keimu deih zawngin melh ma ung. Thutak cu zaknop le taituang zetin phuang ung a, mahten itih bang mihing ung ngim tih cu miten a lungmu haw tuah khenkhuai haw hen tin nung ung hi.

³ Mahti bang a hih hangin Thuthangpha ka phuan uhmi hi lang ngawlin selmi ahi tale a paimi i ca bekin selmi in lang tuk hi.

⁴ Mahmi ten sang haw ma hi, itahim titale hi leihum i pathian sesuakin, a lungmu haw cu khuathim lakah a koih leleng hangin hi. Thuthangpha i vaknak Khrih i sunloihnak pen a hengmi vaknak cu mu haw ma hen tin mah pathian in lim leleng hi. Khrih cu Pathian tuah bangve loli hi.

⁵ Ka hilh uhmi hi keimu cungcang thu hi ma hi; Jesuh Khrih cu Topa hi a, Jesuh i ca in kohte hi nangmu umlawh ung hi, tihmi saw hi ka hilh uhmi hi.

⁶ “Khuathimnak sung pen khuavaknak suak hen,” tin, a titu Pathian cu Khrih i mitmai hum a, Pathian i sunloihnak khi ka theih zawhnak tukin keimu lungmu sungah a vaknak piatu cu Pathian amah leleng hi.

⁷ Mahnaven hi hawvang lo le lam thil a cotu kohte cu beellei tuah bawlmi beel bang poh ung hi; itahim titale a sangbel thuneihnak cu keimuta hi ngawlin Pathian ta hi tih langtiknakin hi.

⁸ Ka ningkim uhah haksatnakin nuainek naven khendunin tai mang thong ma ung hi; vei kha khat ten vancaukapin um ung, mahnaven amthong ngai in umma ung;

⁹ Huatu tampi nei ung, mahnaven ngualcam nei ngawlin um cuang ma ung; vei tampi nase zetin dennek tawk ung, mahnaven thi cuang ma ung.

¹⁰ Jesuh i nunnak cu ka taksa hum uhah lang hen tin catngawlin a thi theimi ka pumpi hum uhah Khrih thihnak pua leleng ung hi.

¹¹ A thi thei mi ka pumpi hum uhah Jesuh i nunnak lang hen tin nisial thihnak tawk kuan leleng nave ung, Jesuh hangin nung ung hi.

¹² Hihi a sullam cu keimu sungah thihnakin nadek naven nohtei sungah nunnakin nadek tihnak hi.

¹³ Lai Thiangtho in, “Ka up hangin hilh ing.” Mahti bang upnak lungmu nei in ka sannak uh hangin Pathian Thuthang phuang bok ung hi.

¹⁴ Topa Jesuh khi thihnak pen a tholehtiktu Pathian in keimuh vang Jesuh tuah thotik bok tuk a, nangmuh tuah munkhatah ama umnakah la tuk hi tih khi thei ung hi.

¹⁵ Hi hempoh hi nangmuh hangin hi. Mahten Pathian i hehpihnak cu mi tam saw deuh tei humah a hen hangin, Pathian sunloihnak cu mi tampi ten thangphat sesem haw tuk hi.

Upnak Tuah Nung

¹⁶ Hitih bang a hih hangin lungkiamin umma ung hi. Ka taksa pumpi uh cu a kiam susuk li vangin ka hawvang lungmu uh cu nisialin thak suakto lelengin um hi.

¹⁷ Mahten haksatnak hun comno sung ka tawh uhten a let tampi in kumkhua sunloihnak pia tuk hi.

¹⁸ Mah hangin cangcian zetin ka zoh uhmi cu mit amuh theih thilte hi ma hi; muh theih ngawlmi thil hi saw hi. Muhtheih mite cu hun comno sung bek phat hi, mahnaven muh theih ngawlmi cu kumkhua ca phat hi.