2 KORIN 2 - Ngawm Bible

¹ Mah hangin nangmuh thasia lehtik tuk sangin a zin ngawlin um saw tung tin soncat zo ing.

² Itahim titale nangmuh tha ka siatik ahin akua him ka lungdamnak bawltu a umleh tuk toh? Nangmuh hi ka lungdamnak bawltu uh ci.

³ Mah hangin ka laikuatmi sungah ka lung a damtiktu nangmuh ten ka thasiat tikleh lamsangin zinleh tuk mang tin ngaisung ing. Itahim titale kei ka lung a dam ten nohte vang lungdam bok uh ci, tin um ing.

⁴ Nangmu lak a, lai ka ngatmi hi, lungmu ngitzet le vancaukapin mit hitui tuah ngan ing. Hitih bang ka ngat ten nangmuh thasiatik tukin hi ma hi; na hum uhah itih zahin itnak nei kam ing tih na theihnak tukin hi saw hi.

A Sualmi Ngaihthiamnak

⁵ Mi pa kha khatin midang humah thasiatnak a hentik ten keima hum hengtik tih hi ma hi, tawkfang cu nangmu humah a hengtik na hi saw hi. Hi tin, a nem saw deuhin, ka otnak cu a humah khoh leita ka deih ngawl hangin hi.

⁶ Hitih bang thasiatnak a piangtik tute cu mitam saw tei bawlsiatnak tawkfang thuak li zo haw toh hi.

⁷ Tu pepan ngaithiam unna thazaang pia saw un hi; a thasia leita lawlawm tale siat lawh leita kha tuk hi.

⁸ Na itnak uhte cu a humah langtik un tin ngen ing.

⁹ Nangmu lakah hilai ka ngatnak cu ka thu hi zui ngangai haw maw iti bang kek haw him tih theihnuamnakin ka khingkhainak hi.

¹⁰ Mi pa kha khat thil a bawl sualtu na ngaihthiam uhten kei vangin ngaithiam bok ing. Itahim titale ka ngaihthiam kulmi a um ngangai tale nangmuh hangin Khrih mai ah ngaithiam ing.

¹¹ Mahti bangin ka ngaihthiamnak cu satan in eimuhte neh ma hen tih ka deihnak hangin hi. Satan i tuptahmi tale theithei sih hung hi.

Troas Pen Paul i Lungkhamnak

¹² Khrih Thuthangpha phuang tukin Troas khua ka hen ten Topa in mahlai ah nadek tukin kongka honsak tin mu ing.

¹³ Mahnaven a unau uh Titas cu mahlai ah ka muh ngawl ten ka lungkhamzet ing. Mah a hih hangin mahlai a, mihingte cu zam hih tung tin ti in, Macedonia lamah hawh ing.

Khrih Hangin Nehnak

¹⁴ Pathian nelah thangphatnak um tahen! Itahim titale Khrih tuah a pehdun uhnak hangin Khrih i nehnak puai sungah a hawhtu tukin Pathian in lamhuai ngut hi. Khrih i thu cu khua hempoh ah pak namtui bangin tangzalhtu tukin Pathian in kohte cu mang hi.

¹⁵ Itahim titale kohte cu Khrih in Pathian nelah a piakmi zimui namtui bang hi ung hi. Mahmi zimui cu nunpatnak lampi ah a hawh li laihmi tei lakah le paihthongnak lampi ah hawh li laihmi tei lak hei ah heng khawng hi.

¹⁶ A paithong susuk li laih tei ca in hi zimui namtui hi a thihnak tuk ngim sia hi a, nunpatnak a ngah li laih tei ca in nunnak piatu namtui hi. Mahti bang nadeh sunglawi le nadeh khung cu akua in kaw a dek suak thei tuk?

¹⁷ Kohten Pathian i thu khi man baihno in, a zuaktu bang kha ma ung hi. Pathian i tiikmi ka hih uh hangin Khrih i nadektu ung hi tih thei in, a mitmuhah lungmu tatakin, a thu phuang ung hi.