2 KORIN 13 - Ngawm Bible

Dawlbel Ngallin Piaknak le Nuksatnak

¹ Tu tum cu nangmu lakah vei thum ka zinnak hi tuk hi. Lai Thiangtho in, “Sualnot dunnak a um ten theihpihtu pa nih maw pa thum maw in, a dinpih haw bek ten man tin tih tuk,” ti hi.

² Nunglam a sualnak a bawltu tei lakah hihen, midang tei lakah hihen, hi thu hi hilh nuam ing. Nung a vei nihnak ka zin laih khin hilh zo toh ing; mahnaven lam khawla ah ka um hei in, hilhleh tung hi; nangmu lakah ka henleh hun ten kuamah daidileh tukma toh ing.

³ Mahtin Paul i otmi hi; Khrih i ot ngangai hi ni maw? tin na tihmek uhte cu muciang khawng tuk uh ci. Khrih in nangmu humah na a deh ten imah ngawl thong kha ma pah cuh; nangmu lakah a ngilnak langtik hi.

⁴ Itahim titale imah ngawl zetin thinglamteh humah that haw naven atu-in Pathian i huham tuah nung hi. Amah tuah ka pehdun uhten imah ma bok nave ung, nangmuhte tuah a pehzomnak uhah a nunnak sungah Pathian i ngilnak huham cu kawmdun bok tuk hung hi.

⁵ Upnak sungah um hung maw? Um ma hung him tih theihciannakin nangmuh le nangmuh cekdun un. Jesuh Khrih eimu sungah um tatak tih thei ngai uh cim? A um tatak ngawl ahi tale mi lawhting ngawl hi uh ci.

⁶ Mahnaven kohte lawhting ung tih cu thei tuk uh ci.

⁷ Kohte na ka dehnak uhah lawhting ung hi tih langtiknak hi ngawlin, kohte cu a tingsammi bang ka hi uh hei in noh ten, a man ngawlmi bawl ngawlin a man mi saw na bawlnak tuk uh Pathian nelah thungen ung hi.

⁸ Itahim titale thutak langpang thei tukma hung; a pan pih bek panpih thei hung.

⁹ Kohte cu thanem nave ung, noh ten na ngil uh tak lungdam em ung. Mah hangin mi cangkim na hih theihnak tuk uhin keimuh vangin thungen ung hi.

¹⁰ Mah hangin a khawlanak hei pen nangmu lakah hilai ka ngatnak hi. Itahim titale Topa in thuneihnak a piakmi hi, nangmuh siatsuahnak tuk hi saw ngawlin, tundinnak tuk hi a, nangmu lakah ka hen ten nangmu humah thuneihnak khoh zetin ka man kul ngawlnak tukin ka tummi hi.

¹¹ Atu-in u le naute damno in um zal un. Cangkimzet tukin zuam un. Ka ngetnakte khi ngai un, pa khat le pa khat thinkhat le lemdunno in um unna, itdunnak le lemdaihnak Pathian cu nangmuh tuah um kawm tuk hi.

¹² Pa khat le pa khat nuksat dunnakin thutdun un. Pathian i mi hempoh ten nuksat haw hi.

¹³ Topa Jesuh Khrih i hehpihnak, Pathian i itnak le Hawvang Thiangtho tuah pawlkomnak cu na venghawng uh humah um leleng tahen.