2 KORIN 11 - Ngawm Bible

Paul le Nungzui Manngawlte

¹ Silzet ka hi hei in, na sup kawko tuk uh deih ing. Sup hih zal poh un!

² Pathian in mi a cin bangin kei hei in cing mahtak bok ing. Nohte cu Khrih amah bek tuah huaidun tukin ka hamsami khanglai thiangtho bang hi uh ci.

³ Ka lauthawngmi cu: ngulpi in ngian tuah Evi a zol ngah bangin nangmu lungmu sung phat ngawlnakin zol tuk a, kimzet le thiang zetin Khrih na zuinak uh hi zam kha pang kawn uh ci tih na hi.

⁴ Itahim titale keimuh tei phuanmi hi ngawlin, a dang Jesuh thu a phuangtu a hung haw tale lungdam zetin sang paih uh ci a, kohtei hilhmi Hawvang Thiangtho le lungdamnak Thuthangpha tuah bangve ngawlmi, hawvang dang le lungdamnak thuhilh a um haw ten sang paih uh ci.

⁵ Noh ten, “Nungzuitu,” tuam vilvel na tih uh mite sangin dawmno hei a niam saw cuangin ngaisungdun bokma ung.

⁶ Thuhilh lam pen a thiam ngawl hei cu na hi tung hi; mahnaven theihnak lamah niam saw cuang hihim mang hi. Iti bang hunah hei hihen ciangzet le cangkim zetin hilh leleng ung hi.

⁷ Pathian Thuthangpha nohtei lakah ka phuan ten phuan man la awng mang, nangmuhte saw thupitik nuamin, keimah saw nuai khiadun ing. Mahtin ka um cu sual ing maw?

⁸ Nangmu lak a, na ka deh laihin pawlpi dang ten vak haw hi. Nangmu bopnak tukin a thil haw la ing ti nung inna!

⁹ Mahten nangmu lakah ka um sung khin sum man tuk ka tingsamzet hei in nohte simsial kha mang hi; Macedonia ngam pen a hungmi a unaupih uhten ka kulmi hempoh sel khawng haw hi. Nunglam laih bangbok lelengin mailamah na bawm uh ngittiktu hi tukma toh ing.

¹⁰ Hitih bangin ka tuangkhawnnak cu Khrih thutak ka sungah a um hangin hi. Akhaia ngamsung khua hempoh ah kuamah in daitik thong haw tukma tin ka sung a ummi Khrih i min salin tiam ing.

¹¹ Nangmuhte ka ih ngawl hangin, hitih bangin awn ing maw? Nangmuhte ka ihnak cu Pathian in thei leng hi.

¹² Nungzuitu hi bok ung a titu ten, “Amuhte bangbokin, na dek bok ung hi,” tin, a tuangkhawng theih haw ngawlnak tukin atu a, ka bawlmi hi pehzom sesem tung hi.

¹³ Amuhte cu nungzuitu tatak hi haw ma hi, Nungzui man ngawlte haw hi. A nadeh haw mi thu ah zolthu bawlcawmin, Khrih i nungzuitu ngangai bangin umduntik cop haw hi.

¹⁴ Mahmi cu lamdangsak tuk imah umma hi; satan hei in vaknak vancungmi bangin bawlduncop thei bok hi.

¹⁵ Mah hangin satan i nadektu a umlawhte hei in diknak nadektute bangin bawldun cawmtik hi. A dawlbelin amu nadehnak bangin thuakleh leng haw tuk hi.

Nungzuitu Paul i Thuaknak

¹⁶ Notleh hih tung: Kuamah in misilin ngaisung haw pahsuh hen. Mahnaven noh ten na ngaisung uh tale misil bangin nei poh unna, dawmno bek cu tuangkhawng thei bok tung hi.

¹⁷ Hitih bangin ka otmi hi Topa i ottik nuammi cu hi ma hi; tuangkhawn lam thu ah misil bang ing.

¹⁸ Mahnaven mihing taksa thu ah a tuangkhawngmi tamzet a um haw hangin kei hei in tuangkhawng bok tung hi.

¹⁹ Nohte cu micipzet na hih uh hangin misilte zol thei uh ci!

²⁰ Ama thuno in, nungtik a nuamtu, zolin, a duaptu, thang tuah a awktu, a zawnsaktu le na biang uh a bengtute vang ngaidam thei uh ci.

²¹ Kohte cu ngalnawmin mahtih bangin ka um ngam uh ngawl hangin zahcakhuai hi, tin phuang ing. Mahnaven a kuakua hei hihen thil pa kha khat i thu ah a tuangkhawng ngam tale kei hei cu misil bangin awn tung, amah bangkekin ngalhang bok tung.

²² Hebru mi hi haw maw? Kei vang hi bok ing. Israel mi hi haw a maw? Kei vang hi bok ing. Abraham casuan hi haw a maw? Kei vang hi bok ing.

²³ Khrih nadektu hi haw a maw? Kei cu misil bang ing. Mahnaven thu ngai in, a muhte sangin Khrih nadektu pha hi saw ing. Amuh sangin ka nadeh mantam saw hi; vei tam saw thawng sung khiakmi ing hi; vei tam saw vah tawk ing, mahten vei tampi a thi ngawlin thuak ing,

²⁴ Vei sawm thum le vei kuah loli vahnak khi Judah mitei khutah tum nga loli tawk ing.

²⁵ Rom miten vei thum vat haw, mahten suang sehnak vei khat thuak ing. Tinbaw sia vei thum tawk ing, vei khat ngen cu nazi sawm nih le pa li sung tui humah tang ing.

²⁶ Vei tampi ka khualzinnakah tui cawkpi le damiahte hangin thinsuknak tawkin ka phunpih Judah mitei lak pen le Gentail tei lak pen lauhuainak tawk ing. A lauhuai phunkim khuapi sung le hampa lakah hihen, tuipi humah le ngualcam pha ngawl ka neihmi lak pen hihen tawk leleng ing.

²⁷ Nadeh haksa a catngawl umin, vei tampi hihbuhnak hun hei nei ngawlin um ing. Ngilkial le dangdumin um ing; vei tampi buknak nei ngawlin, eih tuk an khamtham ngai hei nei ngawl le nikcen puansilh nei ngawlin um ing.

²⁸ Mahten thudang son ngawlin pawlpi ca thu ngaisung hihimin, nisial bawmngit bangin delh hi.

²⁹ Mi pa kha khat a thanem tale kei vang ka tha nem bokin, thei ing; pa kha khat sualnak sungah a bah kha tale thinkhamnak tuah dim ing.

³⁰ A tuangkhawng tukmi ka hi tale ka thanemnak a langtiktu thil humah tuangkhawng tung hi.

³¹ Topa Jesuh i Pa le a Pathian cu kumkhua in, a min thangphatin um tahen; Amah in zolthu ka son ngawlnak thei hi.

³² Damaskas khua sungah ka umlaihin Kumpi Aretas i khutnuai a, ngamuktu bawipa in khuapi upnak kongka hempoh ah keimah man tukin palik koih hi.

³³ Mahnaven tukvelh pa khat pen keimah cu bawm tuah khiasuk haw a, cangca suakca ing.