2 KHANGSIALNAK 5 - Ngawm Bible

¹ Kumpi Solomon in, Biakinn sak a celh ten a pa David in, Topa i lak a piakmi sui, ngun le a dangte cu biakinn na koihnak khansungah koih khawng hi.

Biakinn Sungah Thutiam Kuang Koih Haw

² Kumpi Solomon in, Israel hinnam, hinnam dadang tei lupibel le hotute cu David khuapi Zion pen Topa i Thutiam Kuang la tukin le Biakinn sungah koih tukin, Jerusalem ah sam khawm hi.

³ A venghawng haw in, ha salihnak Puai hun ten tawkdun khawm haw hi.

⁴ A hotu hempoh a tawhdun khawm haw ten, Levi miten Thutiam Kuang cu zawngin,

⁵ Biakinn ah hawhpih haw hi. Thiampi le Levi miten Thutiam Kuang, Puanbuk le a na hempoh cu Biakinn ah thawn khawng haw hi.

⁶ Kumpi Solomon le Israel mi hempoh cu Thutiam Kuang mai, Biakinn ah khawm khawng haw a, tuu le khui sialcelh ngawl ngo in, biakpiaknak bawl haw hi.

⁷ thiampi ten Thutiam Kuang cu zawng haw in, Biakinn sungah a tumpih nung haw ten Mun Thiangthobel mun, Cherubim pa nih ha nuai ah koih haw hi.

⁸ Cherubim ha phalhmi in Kuang le a zawnnak ngolhte cu khuh khawng hi.

⁹ Mah ngolh lekte cu Mun Thiangthobel i mai pen lang thei in, mundang pen muh theih ma hi. (Mah ngolhte cu tuni tian umlaih hi.)

¹⁰ Thutiam Kuang sungah, na dang imah umma, Israel mite Izipt ngam pen tulin, amuhte tuah Topa in thutepnak a bawl laih a, Sinai Mual ah Moses in, suangpeek pa nih a koih tih sial ngawl Kuang sungah imah umma hi.

Topa i Sunloihnak

¹¹ Mun Thiangtho pen thiampite cu akua i pawl tih um peng ngawlin amuh le muh thianthohnak bawldun khawng haw hi.

¹² Levi mi lasatute, Asaf, Heman, Jeduthun le a innkua pihte hempoh, a venghawng haw in nimzang ma neuno tuah tahmi puan manpha silhin biaklandawh i nisuahnak lamah tingtang le daakkopte tuah ding haw hi, a lak hawah thiampi za le sawm nih um haw in, a venghawng haw in, pengkul tum haw hi.

¹³ Lasatu ten aw lual zetin, pengkul, daakkopte le tummi dangte tuah Pathian thangphat lasa haw in: “Topa cu thangphatin um hen, Itahim titale amah cu pha hi. Ohte a itnak cu kumkhua in kho hi,” tin sa haw hi. Thiampite Biakinn pen a tul bek haw ten Biakinn cu Topa i sunloihnakin, meingo bangin tuam vut hi.

¹⁴ Vaknak tuah dimin, a na haw vang dekleh thei haw ma hi.