2 KHANGSIALNAK 33 - Ngawm Bible

Judah Kumpi Manasseh

¹ Manasseh cu kum sawm le kum nih a kim ten Judah kumpi dekin, Jerusalem pen kum sawm nga le kum nga sung uk hi.

² Topa i mai ah thilpha ngawl bawlin sual hi. Israel mite Kanaan ngam a tum haw laihin, a umsa, Topa i hawlvawkmi tei bawlmi zui in, ningdelhhuai nate bawl hi.

³ Manasseh in, a pa Hezekiah i siatsuahmi dawi a biaknak munte cu bawlleh hi. Mahbek hi ngawlin Baal lawki biaknak tukin biaklandawhte bawl hi; Asherah milimte bawlin aksite vang bia hi.

⁴ Topa i Biakinn sung kumkhua in “Keimah na biaknak mun uhah,” tin Topa amah in, a tihmi munah dawi biaklandawhte bawl hi.

⁵ Biakinn tual pa nihah aksi biaknak biaklandawhte bawl hi.

⁶ Hinnom munlawnah a capate halkang biakpiaknakah pia hi. Kungkhai in, dawihte mang hi, khutlam zotikin, camphua hi. Topa i mai ah thilpha ngawlzet bawlin, Topa thinuktik hi.

⁷ Topa i Biakinn sungah milim koih hi. Topa in David le a capa Solomon lakah, “Hi Jerusalem khua, hi Biakinn mun cu Keimah na biaknak tukin Israel minam sawm le pa nih tei ngamsung pen ka tenmi mun hi.

⁸ Israel miten ka thukham le ka thupiakmi hempoh zui in, ka sila Moses in, a lakah a piakmi Daante kimno in, a zui haw tale, a pu le pa tei lakah ka piakmi hi ngam pen kuamah in hawlvawk haw tukma hi,” tin, a hilhsa mi Biakinn sung loli ah milim koih hi.

⁹ Topa i mihing Israel mite Kanaan ngam a tum haw laihin, Topa in, a hawlvawkmi hinnam tei sualnak sungah Judah mite cu Manasseh in puitum hi.

Manasseh Sikleh

¹⁰ Topa in Manasseh le a mihingte cu ngallinnak pia na pi in, ngai nuam haw ma.

¹¹ Mah hangin Topa in Assiria ngal bawite cu Judah ngam dotik hi. Manasseh cu manin, a naalah kawizang khaih haw, thik taicin tuah hencipin, Babilon ah pui haw hi.

¹² vancaukapin, a um hangin a lungmu kiam lehin, Topa Pathian nelah hekkik lehin, Topa i bopnak ngen hi.

¹³ Manasseh i thungetnak cu Pathian in theihsakin, Jerusalem ah kiklehin, Judah ngam cu uklehtik hi. Manasseh in, Topa cu Pathian ngangai hi tih thei ngah hi.

¹⁴ Mah nungten Manasseh in Jerusalem khua kulhtian cu nisuahnak lam a, um Gihon Cik lawn pen saklam Ngasa Kongka le Ofel a tihmi khua tianin, tiang pepel a, sang dedeuhin bawl hi. Judah ngamsung khua kulhtian tihkimah ngalbawi pa khat le a khutnuai ngalkapte koih pepel hi.

¹⁵ Biakinn ah a koihmi ngamdang pathiante le milimte cu la khawngin, Biakinn a saknak haw mualtuan le Jerusalem khuasung a, um dawi biaklandawhte hempoh cu siatsuah khawng hi. Mahte cu la in, Jerusalem khua pualeu lamah vawk khawng hi.

¹⁶ Topa biaknak biaklandawh cu lemlehin pawlkom biakpiaknak le lungdam biakpiaknakte bawl hi. Judah mi hempoh cu Topa Israel Pathian bia tukin so het hi.

¹⁷ Mipi ten mun dadang hei ah biakpiaknak bawl haw naven a piakmi ngangai haw cu Topa i lak bekah hi.

Manasseh i Uknak Bo

¹⁸ Manasseh i bawlmi dadang, a Pathian lakah a thungetmi le Topa Israel Pathian minin profet ten a lakah thu a phuan haw mite cu cangkimno in, Israel Kumpi Tangthu sungah ngan haw hi.

¹⁹ Kumpi Manasseh i thungetnak le Pathian i sannak, sualnak le phatngawlnak a bawl mite, dawi biaknak le Asherah dawinu zuk a bawl mite le milim a biaknak thute cu cangkimno in, Profet Tei Tangthu Laibu sungah ngan haw hi.

²⁰ Manasseh cu thi in, kumpi innah vui haw, mahten a capa Amon in kumpi dek hi.

Judah Kumpi Amon

²¹ Amon cu Judah kumpi a deh ten kum sawm nih le kum nih hi, Jerusalem pen kum nih sung uk hi.

²² A pa Manasseh bangin Topa i mai ah sualin, a pa i biakmi milimte bia bok hi.

²³ Mahnaven a pa bang hi ma hi, a lungnem ngawlin Topa i lamah vang hekkikleh ma hi, a pa sangin a sualnak cuang deuh hi.

²⁴ A khutnuai a bawi ten suam haw in, a kumpi inn sung pen Amon cu that haw hi.

²⁵ Amon thattute cu Judah miten thatleh bok haw a, Amon capa Josiah cu kumpi in bawl haw hi.