2 KHANGSIALNAK 30 - Ngawm Bible

Kaltan Puai Tuangtipnak

^1-3 Ha khatnak ha in, a thiangthomi thiampi cangkim um haw ma laih hangin mipite vang cangkimno in, Jerusalem ah a hen theih haw laihngawl hangin a hun kim ten Kaltan Puai cu bawl thei haw ma. Kumpi Hezekiah le a khutnuai a bawite le Jerusalem miten ha nih ha ten bawl tukin lungkim haw hi. Mah Puai ah hung thei tukin Israel mi le Judah mi hempoh cu kumpipa in zawm hi. Efraim le Manasseh hinnam tei lakah laikuatin, Israel Pathian Topa i minthannak tukin Jerusalem Biakinn ah Kaltan Puai sim tukin a cuangin, cialnak laikuat hi.

^4-5 Saklamah Dan pen hanglamah Beersheba tian, Israel mi hempoh zawmin, kum dang sangin Jerusalem ah mitam saw deuh ngangai hung a, Daan sung um bangin Kaltan Puai bawl tukin a vaihawm haw hangin kumpipa le mipite cu thatuizet haw hi.

⁶ Kumpi le a khutnuai bawi tei thupiaknak bangin Judah ngam le Israel ngam sungah mi hahin, a mi zopnak haw cu hi bangin ngan haw hi. “Israel mi u le nau, Assiria miten a ngam uh neh haw naven noh cu suakca uh ci. Atu-in, Abraham i Pathian, Isaak le Jakob i Pathian Topa i lakah kikleh toh unna, amah vang nangmu lakah kikleh bok tuk hi.

⁷ Topa a Pathian haw i mai ah muantak ngawlin a ummi na pu le pa uh le na unau pih uh Israel mite bangin um toh pahsuh un. Na zak khawng sa uh bangin amuhte cu Topa in nase zetin bawl sia hi.

⁸ Amuhte bangin na lungmu uh khohtik pahsuh hen, Topa i thu cu zui saw un. Na hum uhah Topa a thinuk ngawl tukin Topa na Pathian uhin, a kumkhua thiangtho tukin a bawlmi Jerusalem Biakinn ah hungin, Amah cu bia un.

⁹ Topa i lakah na kikleh uh tale na unaupih uhte pui in, thawng a khiatute vangin a hum hawah hehpihnak lungmu nei in, innah pin haw tuk hi. Topa na Pathian uh cu hehpihnak le lainatnak neitu a hih hangin Ama lakah na kikleh uh tale nohte cu cosangleh tuk hi,” tin ti haw hi.

¹⁰ Mahten Efraim le Manasseh ngamsung khua tihkimah hawhin, Saktabel Zebulun ngam tian heng haw; mahnaven mipi ten nuihsanin, cekpan bawlnakin mang haw hi.

¹¹ Asher hinnam, Manasseh hinnam, le Zebulun hinnam sung pen khenkhat cu Jerusalem khua ah a heng nuamtu na um haw hi.

¹² Judah mi lak pen Pathian nadekin, kumpipa le a khutnuai bawi tei thupiakmi bangin Topa i thu zui tukin mipite cu tuptahnak bangten nei haw hi.

Kaltan Puai Bawl Haw

¹³ Ha nihnak ha in, Naman hel ngawl Cangho Puai bawl tukin Jerusalem khua ah mi tampi hung haw hi.

¹⁴ Jerusalem khuasung biakpiaknak le namtui halnak biaklandawh ummite cu phialet khawngin, Kidron Hawkluamah vawk haw hi.

¹⁵ Mah ha, ni sawm le ni li ni-in, Kaltan Puainak tuk tuute ngo haw hi. A thiangtho ngawlmi thiampi le Levi mite cu a zahcak leita haw hangin Topa i lakah thianthohnak bawl thathah haw a, Biakinn sungah biakpiaknak cu bawlbok haw hi.

¹⁶ Pathian i sila Moses Daan piakmi bangin Biakinn sungah umnak co bok haw hi. Levi miten biakpiaknak tuk ngan thi cu thiampi lakah pia in, thiampi ten biaklandawh humah theh haw hi.

¹⁷ Mi tampi cu mi thiangtho ngawl a hih haw hangin Kaltan Puainak tuk tuute ngo thei haw ma hi, mah hangin amu ai-in Levi miten ngo haw a, Topa i lakah tuu cu pia haw hi.

¹⁸ Mah hum pen Efraim hinnam, Manasseh hinnam, Issakhar hinnam le Zebulun hinnam sung pen a hungmi mipite cu thianthohnak a bawl laih ngawlmi hi haw in, Kaltan Puai cu a daan ngawlin bawl haw hi. Kumpi Hezekiah in, amu ai-in thungenin,

¹⁹ “Topa aw, ka pu le pa tei Pathian, mi thiangtho ngawl hi haw naven lungmu tatak tuah nangmah a biatute cu na hehpihnak tuah ngaidam zazalin hi,” ti hi.

²⁰ Topa in Hezekiah thungetnak cu theihsakin, a hum hawah haksatnak hengtik ngawlin ngaidam hi.

²¹ Jerusalem khua ah a hungmi hempoh ten Naman hel ngawl Cangho Puai cu lungdam thatuino in, ni salih sung bawl haw; ni khat nung ni khat thiampi le Levi miten Topa cu a tha neih zah tuah thangphat haw hi.

²² Topa thangphat biakpiaknak lamah mipui thiamzettu Levi mite cu kumpi Hezekiah in pak hi. Ni salih sung puai bawlin, Topa i lakah pawlkom biakpiaknak bawlin a pu le pa tei Pathian cu thangphat haw hi.

Puai Vei Nihnak

²³ Mah nungten a venghawng haw in, ni salih sung puai bawl peh tukin lungkimin, adang ni salih sung lungdam thatui zetin puai na bawl bet haw hi.

²⁴ Kumpi Hezekiah in mah puai a, mipi tei eih tukin khuicang thawng khat le tuu thawng salih pia in, a khutnuai bawi ten khuicang le tuucang thawng sawm pia bok haw hi. Thiampi tampi ten amuhte thianthohnak bawlsak haw hi.

²⁵ Mah hangin Judah mi, thiampite, Levi mite, saklam ngam pen a hungmite le Israel le Judah ngam sungah a um leleng ngamdang mite a venghawng haw in, lungdamzet haw hi.

²⁶ Jerusalem khuapi cu lungdamnak tuah dim hi, mahtih bang lungdamnak cu David capa kumpi Solomon khan nungin um awng ma hi.

²⁷ Thiampi le Levi miten mipite cu Topa i muicu ngetsak haw hi. Vancung a inn pen a thungetnak haw cu Pathian in zain sansak hi.