2 KHANGSIALNAK 27 - Ngawm Bible

Judah Kumpi Jotham

¹ Jotham cu kum sawm nih le kum nga a kim ten kumpi dekin, Jerusalem pen kum sawm le kum luk sung uk hi. A nu cu Zadok canu Jerushah hi.

² A pa bangin Topa i mai ah thilpha bawlin, Topa lungdamtik hi; mahnaven a pa bangin Biakinn sungah hawhin, thil sual bawl ma hi. Mahnaven mipi ten sualnak thilpha ngawl bawl leleng haw hi.

³ Biakinn i Saklam kongka a satu le Jerusalem khua sung Ofel veng a tih haw mi el a, khuapi kulhtian nase zetin, a satu cu amah Jotham hi.

⁴ Judah ngam mualhumah khua tampi tohin, ngalvilnak tausangpite sa hi.

⁵ Ammon kumpi le a ngalkapte do in neh hi. Ammon mi cu siah kumsialin, kum thum sung a lakah pia tukin thupia hi. A thupiakmi bangin kumsial a piak haw mi siah cu ngun pawng thawng salih le za nga, sangvut seu thawng sawm nga kim hi.

⁶ Topa a Pathian i thu cu komno in, a zui hangin Jotham cu kumpi huham nei zetin suak hi.

⁷ Kumpi a deh sungin a bawlmi, a ngaldonak le a tuptahmi dangte cu Israel le Judah kumpi Tangthu Laibu sungah cangkimno in um hi.

⁸ Jotham cu kum sawm nih le kum nga a kim ten kumpi dekin Jerusalem pen kum sawm le kum luk sung uk hi.

⁹ Thi in, David khuapi ah vui haw hi. Mahten a capa Ahaz in kumpi dek hi.