2 KHANGSIALNAK 25 - Ngawm Bible

Judah Kumpi Amaziah

¹ Amaziah cu kum sawm nih le kum nga a kim ten kumpi dekin, Jerusalem pen kum sawm nih le kum nga sung uk hi. A nu cu Jerusalem mi Jehoaddin hi.

² Amaziah in, Topa i mai ah thilpha bawlin Topa lungdamtik hi; mahnaven a lungmu, a zaangtha venghawngin pia ma hi.

³ Judah ngam kho zetin, a uk theihbek ten a pa thattu bawite thatleh paih hi.

⁴ A cate haw cu that ma hi. “A cano tei sualnak hangin a nu le pa cu that pahsuh un; mahten a nu le pa tei sualnak hangin a canote that pahsuh un. Mi pa khat cu ama bawlmi sualnak bebek hangin thah hi tuk hi,” tin Moses Daan sung a, Topa i thupiakmi zui hi.

Edom Ngam Do Haw

⁵ Amaziah in, Judah miphun le Benjamin sung a, pano hempoh ngalkap tukin la khawng hi. A hinnam tek haw pen khenin, mi thawng khat hotu le za khat hotu ngalbawi koih pepel hi. Pano kum sawm nih pen a humlam hempoh la in, a venghawngin thawng za thum kim haw hi. Ngaldotu tukin ten cuampeng, ngaldo thiam sa le ceipi le lumphaw mangthiam sate haw hi.

⁶ Mah humah Israel pen ngalkap thawng za khat zawngin, a zawn man ngun puak za khat pia hi.

⁷ Mahnaven profet pa khat kumpipa i lakah hawhin, “Hi Israel ngalkapte hi na lakah tel kha haw ma hen. Saklam Ngam a, ngalkap tei lakah Topa umma hi.

⁸ Amuhte a tel haw tale ngal a do haw ten ngil saw deuh tung tin ngaisung tuk ci, mahnaven a tel haw tale na ngal uhten neh haw tuk hi, itahim titale nehnak le sunnak cu Topa i thu,” ti hi.

⁹ Kumpi Amaziah in, “Mah tin ahi tale ka piaksa mi ngun hempoh cu iti bang bawl tung kaw?” tin profet dong hi. Profet in, “Topa in hih sangin tam saw pia tuk,” ti hi.

¹⁰ Mah hangin Amaziah in, a zawnmi ngalkapte cu hahin, a ngam hawah pintik khawng hi. Israel ngalkapte cu Judah mitei humah thinna zetin pin haw hi.

¹¹ Amaziah in, imah launak nei ngawlin a ngalkapte cu Ci munlawnah hawhpih hi. Mahlai pen dodun haw a, Edom ngalkap thawng sawm that haw hi.

¹² A nungin thawng sawm man haw in, a mat haw mite cu Sela khua a liang mawkah hawhpihin, mahlai pen nawmvawk khawng haw a, a nuai suang humah keh siksekin thi haw hi.

¹³ Amaziah in ngaldonakah hawhtik ngawlin a khawmmi Israel ngalkap ten Judah ngam khuapi Samaria le Beth Horon laklawh a, ummite do in mihing thawng thum that haw a, na tampi lonsak haw hi.

¹⁴ Amaziah cu Edom ngalkap a nehnak mun pen a kihleh ten Edom tei milimte pua in, a pathian in bawlin bia a, mah milim tei mai ah namtuite haal hi.

¹⁵ Mahti bangin a bawl hangin Amaziah humah Topa cu a thinukin profet pa khat hah hi. Profet in, “Na ngilnakte neh thei ngawlin, a mihingte hei a hup thei ngawltu ngamdang pathiante cu ita bia nge cim?” tin kumpi Amaziah dong hi.

¹⁶ Amaziah in, “Itukin kaw kumpi ngaihsutnak piatu tukin nang ka bawl uh? Awn toh pahsun, that kha tung,” ti hi. Profet cu awnleh ma toh naven a tawp laih ngawlin, “Hi bang nate bawlin ka thuhilh mite na ngaih ngawl hangin nangmah siatsuah tuk cu Pathian in soncat zo hi tih thei ing,” tin na tita hi.

Israel Do Haw

¹⁷ Judah kumpi Amaziah cu Israel ngam suam tumin, Israel kumpi Jehoash lakah dodun tukin thucah hi. Jehoash cu Jehoahaz i capa hi. Jehoahaz cu Israel kumpi Jebu i capa hi.

¹⁸ Jehoash in Amaziah cu hi tih hin thuk kikleh bok hi. “Vei khat laihin, Lebanon Mualah ling honpi pa khatin, sidar thing lakah thucahin, ‘Ka capa i zi tukin na canu pia in,’ ti hi. Sahang pa khat a el pen hungin, linghon cu cilpek khawng hi.

¹⁹ Atu-in Edom mite neh ing, tin pualthauzet ci, mahnaven phano in hilh ing, mengdenin, na innah um saw inna, nangmah le na mihing tei ca in siatsuahnak tuk nate ita tokpil nuam li kam?” tin ti hi.

²⁰ Amaziah in mah thu cu ngai nuam ngawlin Edom mitei milim a biak hangin Amaziah cu sung tukin, Topa i tumtah sa hi.

²¹ Israel kumpi Jehoash cu Judah kumpi Amaziah do tukin hawh hi. Judah ngam Beth Shemesh pen tawkdun haw hi.

²² Judah ngalkapte cu sung haw a, inn lamah tai khawng haw hi.

²³ Jehoash in Amaziah cu manin, Jerusalem ah pui hi. Jerusalem upnak kulhtian cu Efraim kongka pen khua ning kongka tian, kaih za nih sung phialet khawng hi.

²⁴ Na a lonmi Biakinn sui le ngunte Obed Edom casuan tei cinmi, Biakinn nate le kumpi inn a, sum le pai hempoh Samaria ah hawhpih khawng hi. Salah a mat haw hempoh vang hawhpih khawng haw hi.

²⁵ Judah kumpi Amaziah cu Israel kumpi Jehoash sangin kum sawm le kum nga in nung ngei saw hi.

²⁶ Amaziah i uknak a pat pepan a bo tian, a bawlmi dangte cu Judah le Israel Kumpi Tangthu Laibu sungah kimno in ngan haw hi.

²⁷ Amaziah in, Topa a nunghek pepanin, Jerusalem ah Amaziah suamtu um leleng haw hangin Lakhish khua ah tai hi. Mahnaven ma laihah a suamtu ten zui in that haw hi.

²⁸ A luang cu Jerusalem ah cipuh tuah pua haw in, David khuapi, kumpi khanah vui haw hi.