2 KHANGSIALNAK 22 - Ngawm Bible

Judah Kumpi Ahaziah

¹ Arab ten Jerusalem a do haw laihin, mi khenkhat ten kumpi Jehoram capa hempoh, a nautabel Ahaziah sialngawl, that khawng haw hi. Mah hangin Jerusalem miten a pai ai-in Ahaziah cu kumpi in bawl haw hi.

² Ahaziah kumpi a deh ten kum sawm nih le kum nih kimin, Jerusalem pen kum khat uk hi. A nu cu Israel kumpi Omri i tunu, Ahab canu Athaliah hi.

³ A nu in thusia a so lih hangin Ahaziah in kumpi Ahab i innkua nundan cungin thilpha ngawl bawl hi.

⁴ A pa i thih nungten kumpi Ahab innkuate cu kumpi Ahaziah ngaihsutnak piatu hi haw a, ngaihsutnak pha ngawl a piak haw hangin Topa i humah sualin amah khiasuktu in suak hi.

⁵ A thu haw sangin Israel kumpi Joram lakah tang a, Siria kumpi Hazael do haw hi. Gilead ngam Ramoth ah ngalte tuah dodunin, Joram liamsuah haw hi.

⁶ A meima tuamlawm tukin Jezreel khua ah kikin, mahlai ah Ahaziah in veh hi.

⁷ Ahaziah in Joram a vehmi cu Topa in, Ahaziah caksuknak tukin mang hi. Mahlai ah Ahaziah aum laihin Ahap tawpatmi uknak siatsuah tukin Topa i tenmi Nimsahi capa Jehu in Ahaziah le Joram cu na zuam hi.

⁸ Pathian i thuson sami a bawl suaktu cu Jehu a hih hangin Ahaziah zuitu Judah ngam hotute le Ahijah unau i capate tuah tawkdun haw hi. Jehu in, a venghawng haw in, that khawng hi.

⁹ Ahaziah cu zei haw a, Samaria ah a ngelhnak mun pen man haw hi. Jehu lakah hawhpih a, Jehu in that hi. Topa i na cu a deh theihzahin, a dek boktu a pu Jehosaphat a upatnak haw hangin Ahaziah luang cu phazetno in vui haw hi. Ahaziah unaupih tei sung pen ngam a uk theitu tuk pa khat hei um haw ma hi.

Judah Kumpi Bawinu Athaliah

¹⁰ Kumpi Ahaziah i nu Athaliah in, a capa a thah haw thu a zak bek ten Judah ngam kumpi sangngam hempoh thattik khawng hi.

¹¹ Kumpi canu Jehosheba in Ahaziah i capa Joash la in, thah tukmi kumpi capa tei lak pen taipihin, a cingtu tukin a cingtu pa khat tuah Topa i Biakinn a zaunak khan pa khat sungah selin, a hup hangin Athaliah khutsung a, thihnak pen Joash cu luat hi.

¹² Athaliah kumpinu a deh kum luk sung cu mahlai ah ngelh leleng hi.