2 KHANGSIALNAK 21 - Ngawm Bible

¹ Jehoshafat cu thi in, Jerusalem khua lam, David khuapi kumpi khanah vui haw hi. A capa Jehoram in kumpi dek hi.

Judah Kumpi Jehoram

² Judah kumpi Jehoshafat i capa Jehoram in unau pa luk nei in; Azariah, Jehiel, Zekhariah, Azariahu, Mikhael le Shefatiah haw hi.

³ A pa haw in sui, ngun le na manpha tampi pia in, Judah ngamsung kulhtian pa khat tek hotu in koih hi. Jehoram cu upabel a hih hangin Jehoshafat in ama ai-awhtu in bawl hi.

⁴ Jehoram in Judah ngam a ukmi a khoh deuh ten a unaute cu that khawngin, Israel bawi khenkhatte vang that hi.

⁵ Jehoram cu kum sawm thum le kum nih a kim ten kumpi dekin Jerusalem pen kum liat sung uk hi.

⁶ Ahab canu pa khat a huai hangin ziaza pha ngawlmi kumpi Ahab le Israel kumpi dang tei nundan cungin Topa i humah sualnak bawl hi.

⁷ Topa in David lakah thutepnak bawlin a casuan ten ngam uk leleng haw tuk hi tin, a tep zo hangin David i patmi ngam uknak cu Topa in siatsuah phal ma hi.

⁸ Jehoram in Judah ngam a uk laihin, Edom mite ngal tho in, amuhno ukdun cawm haw hi.

⁹ Jehoram le a ngalbawite cu tulin, cipuh leng tuah Edom ngam do haw hi. Mahlai ah Edom ten kil khawng haw naven zanlamin tul kuh den haw a, luat haw hi.

¹⁰ Mah pepan Edom ngam cu mahno ukdunmi ngamin suakta haw hi. Jehoram in, a pu le pa tei Pathian Topa cu nung a hek hangin mah hun lelengin Libnah khua mite cu ngaltho bok haw hi.

¹¹ Judah mualhum ngamah dawi biaknak tian sa in, Judah le Jerusalem mite cu Topa i mai ah misualin suaktik hi.

¹² Profet Elijah in, Jehoram cu laikuatin, a lai sungah, “Na pa Jehoshafat le na pu Asa bangin na nun ngawl hangin na cikhaihtu uh David i Pathian Topa in nang cu lawl zo hi.

¹³ Israel kumpi tei nundan zui in, Ahab le amah thektu ten Israel cu lam a pialtik haw bangin Judah le Jerusalem mite lampialtik ci. Nangmah sangin mipha deuh na unaute vang that khawng ci.

¹⁴ Topa in, na mihingte, na cate le na zite nase zetin bawlsia tuk a, na neihmi na hempoh pailal khawng haw tuk hi.

¹⁵ Nangmah vang vonnat nei tuk ci a, na ngil pualeu lamah a tul tianin, ni khat nung ni khat nase dedeuh tuk hi,” tin ngan hi.

¹⁶ Mah laihin Filistin mi khenkhat le Arab mi khenkhat cu tuipi mawk a um Ethiopia mitei elkimah um haw hi. Mah mite cu Jehoram do tukin Topa in sosuah hi.

¹⁷ Judah ngam cu do haw a, kumpi inn cu suamin, a capa nautabel Ahaziah sialngawl kumpipa i zi le a capa hempoh pui in, thawngah khia haw hi.

¹⁸ Topa in kumpipa cu a von natik hi.

¹⁹ A nat luai dedeuhin, kum nih nungten thuak hak zetin thi hi. A ukmi mihing ten ama laih ngawlin kumpi a dektu tei ca in meipual seh mek haw naven a thih ten meipual hei seh haw ma.

²⁰ Jehoram cu kum sawm thum le kum nih a kim ten kumpi dekin Jerusalem pen kum liat sung uk hi. A thih ten kuamah thasia haw ma. David khuapi vui haw in, kumpi khanah vui haw ma hi.