2 KHANGSIALNAK 16 - Ngawm Bible

Israel Tuah Dodunnak

¹ Kumpi Asa cu Judah ngam a uk sawng kum sawm thum le kum luknakin Israel kumpi Baasha in Judah ngam cu do in, Judah ngamsung tumnak le tulnakte kham khawng tukin Ramah khuapi kulhtian tiang hi.

² Asa in Topa i Biakinn le kumpi innah a koih haw mi sui le ngunte cu la in, Damaskas a, Siria kumpi Benhadad lakah kuat hi. Mah hum pen,

³ “A pa uhte tang langkhat a hih haw bangin ohte vang tang langkhat nung. Sui le ngun hi laksawngin pia ing. Ka ngamsung pen Israel kumpi Baasha in, a ngalkapte kihpihleh tukin amah tuah na kopdunnak uh cu cawl toh un,” tin thucah hi.

⁴ Benhadad in, Asa i thucahmi cu lungkimin, Israel khuapi do tukin a ngalbawite le a ngalkapte hawhtik hi. Do haw in: Ijon, Dan, Abel, Beth Maakah Naftali ngam a, an a koihnak khuapi la khawng haw hi.

⁵ Mah thu cu Baasha in, a zak ten Ramah kulhtian bawl ngawltohin, taisan hi.

⁶ Kumpi Asa in, Judah ngamsung mun tihkim pen mi hulawm khawm a, Baasha in Ramah khua kulhtianin, a manmi suang le thingte puatikin, Geba le Mizpah khuapi kulhtianin mang haw hi.

Profet Hanani

⁷ Mah hunin profet Hanani cu Judah kumpi Asa lakah hawhin, “Topa na Pathian muang ngawlin, Siria kumpi na muan saw hangin Israel ngalkapte cu na khut sung pen luat khawng zo haw toh hi.

⁸ Ethiopia le Libia ngalkapte cu a cipuhleng le cipuh ngalkapte tuah tam deuh ngangai haw hi. Topa na muan hangin hitihzah tam haw naven Topa in nehnak pia hi.

⁹ Topa in amah muannak lungmu a neitu tei lakah tha ngilnak pia tukin lei buppi hi zo leleng hi. Silhahzet bangin na nadek zo toh a hih hangin, tu pepan ngaldo in, ngal nei leleng tuk ci,” ti hi.

¹⁰ Mah thu a zak ten Asa cu profet Hanani humah a thinuk zetin, thik taicin tuah kenin thawnginn sungah khia hi. Mah hun laihin Asa in, a ngam sungmi khenkhatte cu hehpihnak um ngawlin bawlsia hi.

Asa Uknak Tawnpi

¹¹ Asa i Judah ngam a uksung na a piangmi hempoh cu a pat pepan a tawp tian, Judah le Israel kumpi Tangthu Laibu sungah ngan haw hi.

¹² Asa cu Judah kumpi a dehnak kum sawm thum le kum kuah kumin, a ke ah nase zetin meima sia vei naven Pathian muang ngawlin sibawite muang saw hi.

¹³ Kumpi a deh kum sawm li le kum khat kumin thi hi.

¹⁴ David khuapi a, amata tukin a kuatsa suangkhanah vui haw hi. A luang vuinakah namtui le situi ngim phate mangin, amah upatnakin meipual seh haw hi.