2 KHANGSIALNAK 15 - Ngawm Bible

Asa i Bawlphat Lehnak

¹ Pathian i hawvang cu Oded capa Azariah humah hengin,

² kumpi Asa lakah, “Kumpi Asa, Judah le Benjamin mite, ngai hem un! Topa i lamah na tan sung uh cu Topa in nohte vang tanpih bok hi. Amah na zei uh tale amah in nohte cu tawk tuk a, nung na hek uh tale nangmuh nunghek bok tuk hi.

³ Israel mite cu hun ngeipi sung Pathian tatak nei ngawl, zilhtu thiampi nei ngawl le daan nei ngawlin um haw hi.

⁴ Topa, Israel Pathian nelah haksatnak a tawh haw ten, kikleh haw a, Topa cu zei in, tawkleh haw hi.

⁵ Mah ni-in, kuamah in, a nadehnak pen suk le to ah hawh ngam haw ma, lauthawngnak le lemdun ngawlnak khua tihkimah um hi.

⁶ Pathian in, a hum hawah haksatnak le lungapnak a hentik hangin ngam khat le ngam khat, khua khat le khua khat lemdun ngawlin um haw hi.

⁷ Nohte cu a ngilzet le ngalpha zetin um unna, na dehman uh co tuk uh ci,” ti hi.

⁸ Asa in, Oded capa profet Azariah i thuphuanmi cu a zak ten a thathozet hi. Judah, Benjamin ngam le Efraim mualhum ngam a lak haw mi khuapi hempoh sungah a ummi milimte cu vawksak khawng haw hi. Biakinn tual a, um Topa i biaklandawhte vang lemleh hi.

⁹ Efraim ngam, Manasseh ngam le Simeon ngam pen mi tampi cu Asa lakah hungin, a ngam sungah um haw; itahim titale a lakah Topa um hi tih cu mu haw hi. Asa in mah a hung mite le Judah mi le Benjamin mite cu sam khawm hi.

¹⁰ Asa kumpi a deh sawng kum sawm le kum nga kum, ha thumnakin Jerusalem ah tawkdun khawm haw hi.

¹¹ Mah ni-in, a ngal tei lak pen a lon haw mi na sung pen khui za salih le tuu thawng salih cu Topa i lakah biakpiaknak tukin pia haw hi.

¹² A pu le pa tei Pathian cu a lungmu haw le a zaangtha venghawng tuah bia tukin a venghawng haw lungkimin thutepnak bawl haw hi.

¹³ Kuakua hei hihen, khangno, upa hihen, numei, pano ti ngawlin, Topa a bia ngawltu cu thah tukin thutiamdun haw hi.

¹⁴ Topa i min cu nging zetin, a thutepmi zui tukin siatcamnak bawlin, pengkul tumin nase zetin au haw hi.

¹⁵ A lungmu tatak haw tuah hi thutepnak a bawl haw hangin Judah mi hempoh cu lungdamzet haw hi. Pathian a biaknak haw hempoh ah lungnopnak nei in, Pathian i sanmi biaknak suakin, khua hempoh ah lemdaihnak thupha pia hi.

¹⁶ Kumpi Asa i pi Maakah in pathiannu Asherah milim a bawl hangin kumpipa i nu a hihnak pen Asa in vawk hi. Asa in milim cu phukin, a talh khawng ceng ten Kidron Hawkluamah mei tuah halkang khawng hi.

¹⁷ Asa in Israel ngamsung a dawi biaknak mun hempoh cu siatsuah khawng ma naven a dam sung hempoh Topa muangin um hi.

¹⁸ Pathian nelah a pa Abijah i piakmi nate le ama piakmi sui le ngun tuah bawlmi nate cu Topa i Biakinn sungah koih khawng hi.

¹⁹ Judah ngam a uk kum sawm thum le kum nga sung cu a ngam sungah ngaldonak umma hi.