2 KHANGSIALNAK 14 - Ngawm Bible

Kumpi Asa In Ethiopia Mite Neh

¹ Kumpi Abijah cu thi in, David khuapi, kumpi khanah vui haw hi. A capa Asa in kumpi dekin, Asa khutnuai ah Judah ngam cu kum sawm sung lemdaihnak um hi.

² Asa in thudik le thilpha a bawl hangin Pathian lungdamtik hi.

³ Ngamdangmi tei biaklandawh le a pathian biaknak munte cu phelet khawng hi, a zehsah suangphut hawte cu sukehin, a pathiannu Asherah milimte siatsuah khawng hi.

⁴ Topa i deihmi a pu le pa tei Pathian deihnak bawl tukin le a zilhmi le a thupiakmite zui tukin Judah mite cu thupia hi.

⁵ Judah ngam khuapi hempoh a, um pathian dang biaknak mun le namtui halnak biaklandawhte cu a siatsuah khawng hangin a ukmi ngam sungah lemdaihnak um hi.

⁶ Hi hunin, Judah ngam khuapi hempoh cu khuakulh tiangin, Topa in lemdaihnak a piak hangin kum tampi sung ngaldo dunnak umma hi.

⁷ Judah mitei lakah, “A khuapi uh kimsuakin ngal kulhtian bawlin, tiang nung. Khua zohnak tuk inn sangzet sa in, khah theihmi le kalh theihmi kongka bawl nung. Pathian deihnak a bawl uh hangin, a ngam uh cu komno in uk thei tuk hung hi. Amah in mun le ngam hempoh ah himdamnak pia hi,” tin ti haw hi. Mah hangin a tih haw bangin sa in, khangto dedeuh haw hi.

⁸ Kumpi Asa in, Judah mi sung pen lumphaw le ceipi cawitu ngalkap thawng za thum le Benjamin mi lak pen lumphaw le thalcang neitu ngalkap thawng za nih le thawng sawm liat nei hi. A venghawngin ngalphazet le ngaldo a cungsa ngeh haw hi.

⁹ Ethiopia mi, Zerah a tih haw pa in, ngalkap million khat le cipuhleng za thum tuah Judah ngam cu do in, Mareshah tian tumngut hi.

¹⁰ Asa cu Zerah do tukin tulin, a lang nih hawah Mareshah el Zefathah munlawnah sihsan khual veve haw hi.

¹¹ Topa a Pathian nelah Asa in thungenin, Topa aw, ngalkap a ngilzette hihen, a nawmtamte hei hihen, na nuam tale baihno in bawm thei ci. Maw Topa ka Pathian uh, “Nangmah bek muang ung hi, na min tuah hitihzah tam ngalkap hi do tukin tul zo ung; hu bawm zalin hi. Topa, nang cu ka Pathian uh hi ci, kuamah in nangmah neh tuk cu a lungmu haw neuno hei tum ngam thawthong haw tukma,” ti hi.

¹² Topa in, Asa le Judah ngalkap ten Ethiopia ngalkapte a do haw ten neh hi. Ethiopia ngalkapte cu tai in,

¹³ Asa le a ngalkap ten Gerar tian hil haw hi. Ethiopia ngalkapte cu a thah tam leita haw hangin ngal doleh thei haw ma toh. Topa le a ngalkap ten nehin, na tamzet vang lonsak haw hi.

¹⁴ Topa cu mahlai elkim a, um miten a lau leita haw hangin, Judah ngalkap ten Gerar elkim a um khuapi cu siatsuah khawng haw hi. Khuapi tampi le a ngam haw a, na tampi laksak haw hi.

¹⁵ Tuucing tei ngiahbuk mun khenkhatte vang zuanin, tuu le kalauk tampi a lonsak ceng haw ten Jerusalem ah kik haw hi.