2 KHANGSIALNAK 1 - Ngawm Bible

Solomon In Cihnak Ngen

¹ David capa Solomon in, Israel ngam a uknak cu kho dedeuh hi. Topa a Pathian in muicu pia in hu le thawm a nei zetmi kumpi in bawl hi.

² Solomon in, a ngalbawi ngalkap thawng khat hotu le za khat hotu hempoh, innkua pen lupite, cozah bawi upate le a hung khawmmi mipite cu

³ Gibeon i Pathian biaknak munah hawh tukin thupia hi. Pathian sila Moses in, ngamkhing lakah a hawh haw laihin, a bawlmi Topa i puanbuk umnak Gibeon ah a venghawngin hawh haw hi.

⁴ (Thutiam Kuang cu David in Kiriath Jearim pen Jerusalem ah a lak zo toh hangin, Jerusalem khua a, puanbuk a sakmi sungah um hi.)

⁵ Hur i capa Uri le a tupa Bezalel i bawlmi daal biaklandawh vang Topa i puanbuk mai Gibeon ah um hi. Solomon le mipi ten mahlai ah Topa bia haw hi.

⁶ Puanbuk mai a um daal biakpiaknak bawlin, Solomon in, Topa bia hi, ngan thawng khat ngo in biaklandawh humah halkang biakpiaknak bawl hi.

⁷ Mah zanin, Pathian in, Solomon lakah lang a, “Ikaw ka piak tuk? Na deihmi ngenin,” ti hi.

⁸ Solomon in, “Ka pa David humah itnak ngengpi nei lelengin, atu-in amah ai-in kumpi dektik ci.

⁹ Maw, Topa Pathian ka pa i lakah na thutepmi hempoh cu kimtikin hi; itahim titale sialcelh ngawl mihing tei humah kumpi tukin bawl zo ci.

¹⁰ Mihing hitihzah ka uk theihnak tukin ka kulbelmi cihnak le theihnak pia zalin hi. Mah ahimata na mihing hitihzah tam hi itin kaw ka uk theih tuk?” tin ti hi.

¹¹ Pathian in, “Solomon lakah, A dikmi teng ngah ci. Hauhsaknak, sum le saw, ahimata minthannak maw, na ngal tei thihnak tukin maw, ahimata nangma ca in, na khansaunak tukin maw, ngen ngawlin, ka mihingte uktu kumpi in ka bawl hangin amuh uk theihnak tukin cihnak le theihnak na nget hangin,

¹² cihnak le theihnak pia tung. Nangma laih ngawlin iti bang kumpi hei i a neih awng haw ngawlmi le a neih haw tuk ngawl tohmi hauhsaknak, sum le saw le minthannak pia tung hi,” ti hi.

Solomon Kumpipa i Huham le Hauhsaknak

¹³ Mah hangin Solomon cu Pathian biaknak mun, puanbuk thiangtho umnak Gibeon pen Jerusalem ah kikin, Israel ngam cu uk hi.

¹⁴ Cipuh le cipuh leng tampi nei in, cipuh leng thawng khat le za li, cipuh ngalkap thawng sawm le thawng nih nei hi. A khenkhat cu Jerusalem khua sungah koihin, a khenkhat cu khuapi dadangah koih hi.

¹⁵ Israel ngam a uk sungin sui le ngun cu Jerusalem khuasungah suangzah tamin, sidar thingkung cu theikung zahin tam hi.

¹⁶ Kumpi ca tukin na leitu ten Izipt le Kue pen cipuhte lei haw hi.

¹⁷ Cipuhleng vang Izipt pen lei haw hi. Cipuhleng pa khat cu ngun tangka za luk pia haw in, cipuh pa khat cu ngun tangka za le sawm nga tuah lei haw hi. Cipuh le cipuhleng a lei sate cu Hit le Siria kumpi lakah zuak mek haw hi.