2 JOHAN 1 - Ngawm Bible

¹ Pawlpi upa keimah in, ka ihmi le upatmi Bawinu le a cate, nangmu lakah hi laikuat hi ngan ing. Keimah bek hi ngawlin thutak a theitu hempoh ten it haw hi.

² Itahim titale thutak cu eimu sungah um a, kumkhua in eimu nelah um tuk hi.

³ Ohtei Pa Pathian le a Capa Jesuh Khrih in hehpihnak le lemdaihnak thupha pia tahen, thutak le itnakte vang eimuta hi leleng tahen.

Thutak le Itnak

⁴ Ohtei Pathian i thupiaknak bangin, na cate a khenkhat cu thutak sungah um haw tih ka muh ten ka lungdamzet ing.

⁵ Mah hangin ka ihmi le upatmi Nu, pa khat le pa khat itdun ten nung tin kun ing. Hitih bangin ka ngatmi hi thukham thak kha ma hi. A pat pepan a zaksa uhmi thukham hi.

⁶ Hi itnak ka tihmi cu Pathian thukham zui kul tihnak hi. Mahmi thukham cu a pat pepan na zaksa uh bangin, itnak tuah nung un tihnak hi.

⁷ Mizoltu tampi leihumah heng zo haw hi. Mah mizoltu ten Jesuh Khrih cu mihingin hung ma hi, tin a titu cu Khrih i ngalte haw hi.

⁸ Mah hangin muansannak tuah na nadeh lih uhmi na paihtik thong ngawlnak tukin le na laksawng tek uh kimno in, na ngah theihnak tukin ngalling zetin um un.

⁹ Akua hei hihen Khrih thuzilhnak sungah um ngawlin a valthau in, a nungtu cu Pathian nei ma hi. Mahnaven Khrih thuzilhnak sungah a umtu cu, Pathian nei in, a Capa vang nei bok hi.

¹⁰ Mah hangin mi pa kha khat cu nangmu lakah hengin, hi thu a zilh ngawltute cu na inn uhah zintungtik pahsuh un; “Na humah lemdaihnak thupha um hen,” tih hei ti nuam pahsuh un hi.

¹¹ Itahim titale phat ngawlnak a bawltu khi, “Lemdaihnak thupha na humah um tahen,” a titu cu phat ngawlnak a bawlnak sungah a telbokmi hi.

Dawlbel Thucah

¹² Son tuk tampi nei ing; mahnaven lai le laitui tuah hilh tuk mang. A lungdamnak uh a cangkim theihnak tukin nangmu lakah zinin bulpak otpih nuam ing.

¹³ Nangmu ihmi na unau nu uh i ca ten nangmah nuksat bok haw hi.