1 TIMOTE 6 - Ngawm Bible

¹ Pathian i min le thuzilhnakte cu kuamah i zotsak theih tuk ngawlin sila ten na to uhte cu upat tak hi tin ngaisung un.

² A to haw cu Khristian ahi tale sila ten, “Khristian a unau ten poh ung,” tin zawnsak haw pahsuh hen. A nadeh haw pha sesemin, a deh haw tuk saw mi hi. Itahim titale a nadeh haw mi nemcuamnak a cotu cu a ih haw mi thu umtute haw hi. Thu na hilh uhten hitih bangte hi hilh un hi.

Zilhnak Man Ngawl le Hauhnak Man

³ Thuman ngawl zilhin, Topa Jesuh Khrih i awnkamte le a biaknak thu uh hei hihen, a bisi ngawlin a zilhtu cu,

⁴ thu thei cuam ngawltu hi. Mahpa cu awnkam mandanah eldun tuk bebek a nuamzettu hi. Mahtibang ngamtatnakin iksiknak, thin pulhangnak, mi nautatnak, mi muan ngawlnak le a catngawlin thusia piangtik hi.

⁵ Mahti bangin a ngamta tute cu lungmu man ngawl, thutak a thei ngawl laihtute hi. Mahti bang mihing ten biaknak hi hauhsaknak lampi pa khat hi tin ngaisung haw hi.

⁶ Pathian biaknak hangin mah i neihsano tuah a lungkim thei mi cu biaknakin mihau cangtik loli hi.

⁷ Leihumah a pianpat uh laihin, ikaw a tulpih uhmi a um? Imah umma hi. Hi leihum pen ikaw a ken theih uhmi a um? Imah umma!

⁸ Mahti bang a hih hangin eih tuk an le silh tuk puan a nei uh tale eimu ca in tawk hi.

⁹ Mahnaven a hau nuam mite cu sualloihnak tawkin, tisa deihnak thang sungah awk haw hi. Mah tisa deihnakin, a muhte siatik hi.

¹⁰ Itahim titale tangka deih leita cu sualnak hempoh tawpantu hi. Mi khenkhat ten tangka neih a nuam leita haw hangin a upnak lampi pen pialin, apvansanin um haw hi.

Bulpak Thuhilh Dunnak

¹¹ Mahnaven nang cu Pathian i mihing na hih hangin hitih bangte pialin hi. Diknak, thianthohnak, upnak, itnak, thuak theihnak le lungnemnakte bawl tukin nasezet zuamin hi.

¹² Upnak tai zuamnakah na tha neihtawp suah inna, na Pathian in nang a sam ten theihpihtu tampi tei mai ah na upnak phuang zo na hih hangin; kumkhua nunnak na neihmi lenkhim zetin hi.

¹³ Ihempoh i nunnak a piatu Pathian le Pontius Pilat mai a, upnak ciang zetin a phuang theitu Khrih i mai ah thupia ing.

¹⁴ A Topa uh Khrih Jesuh a henleh Ni tian, hi ka thupiakmite hi cangkim le ngeikhei zetin zui in hi.

¹⁵ Jesuh Khrih i henleh tuk Ni cu, sunloihmi le amah pa khat bek ihempoh Uktu, kumpi tei Kumpibel, topa tei Topa Bel, Pathian in, a thiahsa mi hunah kimtik tuk hi.

¹⁶ Amah bek hi a thi thei ngawlmi Pathian hi; a umnak mun cu vak leita in kuamah in zuan zo haw ma hi. Amah cu kuamah in mu awng haw ma hi; Kumkhua ngilnak, huham le upatnak cu ama lakah um leleng tahen! Amen.

¹⁷ Mihaute khi ultung kha sual tuk ngawlin ngallinnak pia un. A kho ngawlmi leihum hauhsaknakte ngaisung ngawlin, eimu co theih tukin phal zetin, a pia theitu Pathian khi muang saw un.

¹⁸ Midangte hehpih thei tukin le ngamtat ziaza pha in phal zetin pia thei tukin hilhin hi.

¹⁹ Mahti bangin a zui thei haw tale mailam ca in, nunnak bulpi tatakah zungsa ngahtu hi haw tuk a, lo le lam a khawlsate hi haw tuk hi. Mahten nunnak tatak cu co haw tuk hi.

²⁰ Timote, na cinkhawi tukin apmi hempoh hi komzetno in cingkhawi in hi. Pathian kihcaknak um ngawlmi awnkam le sullam a um ngawlmi thu eldunnakte le mi khenkhat ten “Cihthiamnak,” a tih haw mite cu pialin hi.

²¹ Itahim titale mi khenkhatte cu mahmi cihthiamnak co ngah zo ung tin ti in upnak lampi pen pial haw hi. Pathian i hehpihnak thupha cu na venghawng uh humah um tahen!