1 TIMOTE 3 - Ngawm Bible

Pawlpi Lamhuaitu

¹ Mi pa khatin pawlpi lamhuaitu tuk a nuam tale nadeh pha a dek nuamtu hi tih cu ciangzet hi.

² Pawlpi lamhuaitu cu khelhnak nei ngawlmi tuk hi. Zi pa khat bek neitu, zu a in ngawlmi, mah le mah ukdun thei mi, zohlemin, a nungmi, mikhual zothiamtu le mi a zilhthiamtu hih kul hi.

³ Zukham misil hi tukma, thinsup thei ngawlmi, midang tuah a haudun theimi, mi ngilo, iksiknak neimi le phuciak theimi hi ma hen, mahnaven lungnemmi le lemdaihnak a deihtu hi tuk hi. Sum deih leitatu hi tukma hi.

⁴ A innkua komzetno in, a kelen theitu hi tuk a, a ca ten a thu ngai in, a upat haw mi hi tuk hi.

⁵ Ama innkua hei phano in, a cingkhawi thei masa ngawltu in itin kaw Pathian i pawlpite a cinkhawi theih tuk?

⁶ Upnak lamah papi muantak hi tuk hi. Thinthek semmi hi tukma, mah ngawl cu ultung sual tuk a, Dawihmangpa khi vawk a tawh bangin amah vang vawk co kha sual bok tuk hi.

⁷ Pathian thu zui ngawl mipite hei i upatmi hi tuk hi, mahtibang bek ahimata mitei sonsiat tawkin, Dawihmangpa i thangah awk tuk hi.

Pawlpi Upa

⁸ Pawlpi upa cu ziaza pha neimi le lungmu manmi hihen, zu a in ngawlmi le tangka lamah hampum leita mi hi haw ma hen.

⁹ Pathian i phuanmi thutak khi a sia le pha khen theihnak lungmu thiangtho in, a len khimtute hi haw hen.

¹⁰ Upa nadek nuamtute cu khingkhai masak hi haw tuk a, sonsiatnak a umma tale dek thei haw tuk hi.

¹¹ A zite haw vang ziaza pha mi hi tuk a, mi sonsia in kamtam mi hi haw pahsuh hen, zu a in ngawlmi hi haw tuk a, ihempoh ah mi ngeikhei zetmi hi haw hen.

¹² Pawlpi upa cu zi pa khat bek neimi hi tuk a, a innkua le a cate phano in, a uk theitu hihen.

¹³ Nadeh ciangkaino in, a dek theitu upa cu upatnak co in, Khrih Jesuh a upnak haw khi ngalpha zetin phuang ngam haw hi.

Thu-ip Ngengpi

¹⁴ Nangma lakah hi laikuat ka ngat laihin, a ngeican um ngawlin nangmah tawk pal tukin ngaisung ing.

¹⁵ Mahnaven ngei ka um kha sual tale Pathian i innkua a pawlpi sung uhah iti bangin kaw a umdan tuk uh, hi ka laikuatmi in hilh tuk hi. Pathian i innkua cu kumkhua in, a nungmi Pathian i pawlpi hi a, mah pawlpi cu thutak i zungmutnak le a dingkhotiktu khuam hi.

¹⁶ A biaknak sung uh a, thu-ip cu ngeng ngangai hi, tih cu kuamah in el thei haw tukma hi. Amah cu mihing bangin langto a, a diknak thu cu Hawvangin langtikin, vancungmite vangin mu haw hi. A thu le la cu mi hempoh tei lakah phuan hi a, leihum khua hempoh ten um haw in, vancungah lato haw hi.