1 TIMOTE 2 - Ngawm Bible

Pathian Biak Daan

¹ A masabelin ka sonnuammi cu mi hempoh tei ca in Pathian nelah thungenin kuun un, midang tei ca thungen unna, lungdam thu hilh un tihmi hi.

² Pathian kihcaknak tuah ziaza phano in le lemdaizetno in, a nun theihnak tuk uhin kumpi le ngamsung hotu upa tei ca in Pathian nelah thunget sak un hi.

³ Mahtin na bawl uh ahin pha hi; mahten mi hempohin thutak thei in, nunpatnak ngah haw hen tin a deihtu,

⁴ nunpantu Pathian a lungdam tuk hi.

⁵ Itahim titale Pathian pa khat bek umin, mihing le Pathian laklawhah lemnak a bawltu kamtai pa khat bek um hi.

⁶ Mah kamtaitu cu mi hempoh nunpan tukin a nunnak a piatu Khrih Jesuh hi. Mahtin a nunnak a piakmi cu Pathian in, a hunkim ten mi hempoh nunpan khawng nuam hi tih langtiknak hi.

⁷ Mah hangin hi upnak thu le thutak phuangtu tukin Gentail mitei lakah zilhtu le kamtai tukin a hahmi hi. Zolthu son mang, thutak son ing.

⁸ Pathian biaknak mun hempoh ah pano ten thungen haw hen, tih deih ing. Pathian nelah pum a piadunmi le thinuknak le thu eldunnak um ngawlno in, pano ten khutzaakin thungen haw hen.

⁹ Numeite vang cu a zoh mawi in um haw hen na, zoh mawi in paallel haw hen. A sam haw cu a tom haw ten a valin tom haw pahsuh hen; neih le lam, sui, suang manpha le nikcen puansilh manphazet tuah thuam haw mahen.

¹⁰ Mah sangin biaknak lam pen a zuammi numei ahi haw tale ziaza phatnak tuah thuam saw haw hen.

¹¹ Numeite cu a cungtu hi haw hen na, daiden le niamkhiatnak tuah cung haw hen.

¹² Zilhtu a hih haw tuk cu deih mang hi; Pano tei humah vangin thunei li ngawlin mengdenin um haw poh hen.

¹³ Itahim titale a masabelin bawlmi cu Adam hi; a nungten Evi laih hi.

¹⁴ Mahnaven zolnak a tawktu cu Adam hi ngawlin Evi hi. Pathian i daan a palcattu vang cu numei hi.

¹⁵ Mahnaven numei ten lungnemin, itnak upnak le thianthohnak sungah a khohkhah haw tale ca a neihnak haw i hangin nunpat hi haw tuk hi.