1 THESALON 3 - Ngawm Bible

¹ A dawlbelnak ten, ka thuakleh theih uh ngawl toh hangin keimuh bek Athens khua ah umin,

² Timote hi nangmu lakah hah tukin ngaisung ung hi. Timote cu Khrih Thuthangpha a phuannak uhah Pathian nadektu a unau uh hi. Bawlsiatnak na tawh uhmi i hangin kuamah nunglamah na kik ngawl tukin,

³ amah cu thazaang piatu tukin le na muannak uh a khotiktu tukin kuat ung hi. Hitih bang bawlsiatnak cu a thuak hihim tukmi ung hi tih cu noh ten na theih uhmi hi.

⁴ Itahim titale nangmu lakah ka umlaih uh khin bawlsiatnak thuak tuk hung hi tih cu hilh ham zo ing. Na theih uh bangin, ka hilh masanak bang cikcekin piang ngangai hi.

⁵ Mah hangin ven Timote ka hahnak cu, na thu uh imah thei ngawlin um cu ka thuak theih ngawl toh hangin le na upnak uh thu ka theih nuam hangin ka hahnak hei hi. Satan in zol tuk a, ka nadeh uhmi hempoh thawnthongin, um kha kawn tih khi lauzet ing.

⁶ Atu-in Timote cu hengin upnak le itnak nei uh ci tihmi thupha sel hi. A son phatnak thu kohten ka muh nuam uh bang bokin nangmuh hei in mu nuam bok tuk uh ci, tih thu hilh bok hi.

⁷ Mah hangin u le naute, haksatnak le bawlsiatnak a tawk uh vangin nangmu hangin lungmu ngilcangzet ung. Thazaang a piatu cu nangmuh tei upnak hi.

⁸ Itahim titale Topa tuah na pehzopnak uhah a khohkhahzet uh hangin nung ngangai tuk toh ung hi.

⁹ Atu-in lungdamnak Pathian nelah hilh tuk hung. Nangmu hangin lungdamnak Pathian i mitmuhah ka co uh hangin amah cu thangphat ung hi.

¹⁰ Mahten nangmu lakah zin thei tukin le na upnak uh i sapmi a pia thei tukin sun le zanin lungmu tak tuah Pathian nelah ngen ung hi.

¹¹ A Pa uh Pathian le a Topa uh Jesuh in nangmu lak ka hen theihnak tukin lampi selhsak zal tahen.

¹² A Topa uhin pa khat le pa khat itdunnak le mi hempoh na ih uh cu khangtik tahen na, nangmuh ka ihnak uh a ngeng bangin ngengtik bok tahen.

¹³ Mahti bangin amah in, na thazaang uh khohtik hen na, Topa Jesuh Khrih cu a mihingte tuah a hunleh ten a Pathian uh i mai ah mi cangkim le mi thiangtho hi tuk uh ci.