1 SAMUEL 7 - Ngawm Bible

¹ Mah hangin Topa i Thutiam Kuang cu Kiriath Jearim kua miten pua haw in, mualhum a um Abinadab i innah koih haw hi. Abinadab i capa Eleazar cu a cingtutik haw hi.

Samuel In Israel Uk

² Kiriath Jearim khua ah Topa i Thutiam Kuang kum sawm nih sung um hi. Hi sung hempoh ah Israel miten Pathian lakah bopnak ngen leleng haw hi.

³ Samuel in, “Na lungmu tatak tuah uhin, Topa na zuan nuam uh tale ngamdang pathian le Astrate zukte cu vawk khawng un hi. Na nunnak uh a venghawngin Topa i lakah pia khawng unna, amah bek bia un. Filistin tei khut sung pen Topa in luattik tuk,” ti hi.

⁴ Mah hangin Israel miten Baal pathian le pathian dang i zukte cu vawk khawngin, Topa bek bia haw hi.

⁵ Israel mite cu Mizpah khua ah tawkdun khawm tukin Samuel in cah khawmin, “Mahlai pen Pathian nelah nangmu ca in thungen tung,” ti hi.

⁶ Mah hangin Mizpah ah tawkdun khawm haw hi. Tuicawi in Topa i lakah biakpiaknak munah tui leih haw a, sun nilui ancang haw hi. “Topa i humah sual ung hi,” tin ti haw hi. Samuel in Mizpah ah Israel tei thu son sak hi.

⁷ Israel mite Mizpah ah a khopkhawm haw thu Filistin miten a zak haw ten do tukin Filistin kumpi pa nga le a ngalkapte cu thok haw hi. Mah thu cu Israel miten a zak haw ten lauzet haw in,

⁸ Samuel lakah, “Filistin tei khut sung pen suak thei tukin Topa a Pathian uh lakah catngawlin thungenin hi,” tin ti haw hi.

⁹ Samuel in tuuno ngo in, a pumin halkang biakpiaknakin Topa i lakah pia hi. Israel mite bawm tukin Topa lakah Samuel in thungenin, a thungetnak cu Topa in theihsak hi.

¹⁰ Samuel in biakpiaknak a bawl laihtakin, muanmawh ngawlpi in Filistin miten nam tawtok haw hi. Topa in vanthum dudumtikin Filistin mite cu thinsu zetin tai khawng haw hi.

¹¹ Israel miten Filistin mite cu Mizpah pen Bethkar tian hil haw hi. A hilnak haw lamtuanah Filistin mite cu that pepel haw hi.

¹² Samuel in suang la a, Mizpah le Shen khua laklawhah phutin, “Topa in lamtuan bawm hi,” ti in Ebenezer tin minsa hi.

¹³ Mah hangin Filistin mite cu ngal sungin, Samuel i nunsung hempoh cu Israel ngam do thei tuk ngawlin Topa in kham hi.

¹⁴ Ekron le Gath khua laklawh a um khua hempoh Filistin mitei lonmi khuate cu Israel tei lakah pialeh haw a, Israel miten a ngam haw hempoh ngahleh haw hi. Israel mi le Kanaan mitei lakah lemdaihnak um hi.

¹⁵ Samuel cu a nunsung hempoh Israel uktu hi.

¹⁶ Kumsialin Bethel, Gilgal le Mizpah ah hawhin, thubuainak um hempoh lem pepel hi.

¹⁷ Ramah khua a innah kiklehin, Ramah hei ah Israel tei thukhentu dek hi. Ramah khua ah Topa i ca tukin biaklandawh hi.