1 SAMUEL 3 - Ngawm Bible

Samuel Lakah Topa Lang

¹ Naupangpa Samuel cu Eli khutnuai ah Topa i nadekin um hi. Mah hunin Topa i awnkam dawm dedeuhin Topa langleh ma toh hi.

² Eli cu a mitthim zo hi. Zan khat cu a zaunak khanah zau in,

³ Samuel cu Topa i Thutiam Kuang koihnak khanah zaubok hi. Khuavak laih ngawl mei in, a vak laihin,

⁴ Samuel cu Topa in sam hi. Samuel in, “Topa um leng ing hi,” ti in,

⁵ Eli lakah tai in, sam nge cim? tin ti hi. Eli in, “Nang sam mang, hawh inna, zaulehin hi,” ti hi. Mah hangin Samuel cu zauleh hi.

^6-7 Topa in, “Samuel” tin sam leleu hi. Samuel cu tho a, Eli lakah hawhin, “Hung zo ing, itakaw na sam?” tin ti hi. Eli in, “Ka capa, sam mang hi, hawh inna, zau lehin,” ti hi.

⁸ Topa in, Samuel cu vei thum tian sam hi. Samuel cu tho in Eli lakah hawh leleu in, “Hung zo ing, ita sam leleu kam?” tin ti hi. Samuel sam tu cu Topa hi tih Eli in thei in, a lakah,

⁹ “Hawh inna, zau lehin hi; a samleh tale, ‘Topa na hilh nuammi hilhin, na aw ngai leng ing hi,’ tin ti in,” ti hi. Mahceng ten Samuel cu zauleh hi.

¹⁰ Topa cu hungin, a elah ding hi. “Samuel, Samuel” tin masa bang lengin sam leleu hi. Samuel in, “Topa, na hilh nuammi hilhin hi. Na salpa in, na aw ngai leng ing,” ti hi.

¹¹ Topa in, “Israel tei humah lauhuaizet na pa khat bawl tung, mah ka bawlmi a theitu hempoh ten mulling haw tuk hi.

¹² Mah ni ten Eli innkua tei ca in thusia ka hilhmi hempoh awnkam pa khat hei pel ha ngawlin kimtik khawng tung.

¹³ A capa ten ka thang a siattik haw hangin a innkuate cu bawlsia tung hi, tin, Eli hilhsa zo ing. A capa tei thilpha ngawl a bawlmite thei na pi in kham ma hi.

¹⁴ Mah hangin iti bang biakpiaknak le piaknak a nei vangin sualnak hitihzah a bawl haw hangin ngaidam hihim tuk mang hi, tin Eli i innkua pih tei lakah ciang zetin phuang ing hi,” tin Samuel lakah ti hi.

¹⁵ Samuel cu khuavak tiang hihbu hi. Mah nungten tho in biakinn kongkate hong hi. A muhmi le a theih mite cu Eli lakah hilh ngam ma hi.

¹⁶ Eli in, “Ka capa, Samuel,” tin sam hi. Samuel in, “Sazapa, um ing,” ti hi.

¹⁷ Eli in, “Topa in ikaw a hilh? Imah im pahsun, ka lakah na hilh khawng ma tale Pathian in nase zetin bawlsia tuk hi” tin ti hi.

¹⁸ Mah hangin Samuel in, pa khat hei im ngawlin hilh khawng hi. Eli in, “Amah cu Topa hi, a phabel a tihmi cu bawl tahen,” ti hi.

¹⁹ Samuel cu khang dedeuh hi. Topa cu a lakah umin, a hilhmi hempoh Topa in kimtik khawng hi.

²⁰ Mah hangin Israel mi hempoh ten a ngammawk deng a ummi tianin, Samuel cu Topa i profet hi tin, thei khawng haw hi.

²¹ Samuel lakah a laknak le thu a hilhnak mun Shiloh ah Topa cu catngawlin lang leleng hi. Samuel i awnkam cu Israel miten ngai nuamzet haw hi.