1 SAMUEL 24 - Ngawm Bible

David In Saul Nunnak Khawih

¹ Saul cu Filistin mite a donak mun pen a kih ten David cu Engedi el ngamkhingah ngelh hi tin hilh haw hi.

² Saul in Israel ngam ngalkap lak pen a phabel thawng thum tuah David le a mihingte cu Sathak Liang a tih haw mun pen nisuahnak lamah zei haw hi.

³ Mah lampi elah, tuu inn umin, mah elah suanghol pa khat um hi. Mah suanghol sungtabelah David le a mihingte ngelh haw hi. Saul cu suanghol a hen ten onghawh tukin suanghol sungah tum hi.

⁴ David cu a mihing ten, “Hun lemcangzet ngah ci. Topa in, na ngal cu na khutsungah pia tung hi, tin, a tih bangin pia ngangai hi. Mah hangin a humah na deih bangin bawl thei ci,” tin ti haw hi. David cu vakkuhin Saul i theih ngawlin a angki cualpi mawk tansak hi.

⁵ Mahnaven David cu a lungmu nop ngawl zetin

⁶ a mihing tei lakah, “Pathian in kumpi tukin a tenmi ka bawipa cu ka liamsuah ngawlnak tukin Topa in cingkem zal tahen, Pathian i tenmi kumpi a hih hangin, amah cu siatsuah hihim tuk mang,” ti hi.

⁷ Mah hangin David in, a mihing tei lakah Saul that tuk ngawlin hilh hi. Saul cu tho in, suanghol sung pen tulin hawh hi.

⁸ David in zui in, “Maw kumpi pa,” tin sam hi. Saul cu a nunghek lehin, David cu upatnak tuah lei ah bokin,

⁹ David in Saul lakah, “Itakaw David in nangmah thah tum hi tin, a hilhtu tei thu cu sang nge cim?

¹⁰ Tu ni hi suanghol sungah nangmah cu Topa Pathian in ka khut sungah hengtik hi tih cu na mit loli in mu ci. Mi khenkhat ten nangmah that tukin so haw, mahnaven nangmah ka hehpih hangin le Pathian tenmi kumpi na hih hangin demno hei liamsuah tuk mang hi,” tin ti ing.

¹¹ Zo tehin, ka bawipa, na angkicual cep ka cawimi hi! Keimah loli in at tawng naveng that mang hi. Hi na muh ten nangmah do tuk le siatsuah tukin tummi nei mang hi, tih hi theiciangin hi. Nangin that tukin zei li naven cin, kei in imah ti awng mang hi.

¹² Akua saw mawh kam hung tih cu Topa Pathian in sonsak zal tahen. Nangmah dawmno hei liamsuah mang hi, mahnaven nangin keimah na ngal hangin Pathian in cawh zal tahen.

¹³ ‘Thilpha ngawl cu mipha ngawl ten bawl haw hi,’ tin mi awn cu thei ci. Ka khut tuah nangmah liamsuah hihim tuk mang hi.

¹⁴ Israel kumpipa i thah na tum lihmi hi zo teh ci! Na hil pepelmi hi zo tehin! Uico thi le uili bang hi.

¹⁵ Topa Pathian in thukhen zalta henna, akua saw mawh ung, hi thu ah keimah panin luan zal tahen,” ti hi.

¹⁶ Mahti bangin David in thu a hilh ceng ten Saul in, “Ka capa David hi ngangai cim maw?” tin kap hi.

¹⁷ Saul in David lakah, “Nangmah thudik saw ci, keimah khial ing. Ka humah phazet navecin, kei cu na humah sehuaizet ing.

¹⁸ Topa Pathian in, na khut sungah koih naven na thah ngawl hangin ka humah ituk zahin mi pha hi ci tih cu tuni in langtik zo ci.

¹⁹ Akua kaw a ngal a mat ten himno in hahleh na zak awng? Ka humah na bawl bangin Pathian in muicu pia zal tahen.

²⁰ Atu-in Israel kumpi hi tuk ci, Israel ngam cu na uknak sungah kho tuk toh hi.

²¹ Mahnaven ka min le ka innkua tei min cu a paih ngawlnak tukin na casuante cu khawih tung tin, Topa i minin thutiamin,” ti hi.

²² A tih bangin David in thutiam hi. Saul cu a innah pinin, David le a mihingte cu a ngelhnak munah haw kik haw hi.