1 SAMUEL 23 - Ngawm Bible

David In Keilah Khua Pan

¹ David in, Filistin ten Keilah khua simin, an thakte nguksak haw tih za hi.

² Mah hangin Topa Pathian nelah, “Filistin mite do nang maw?” tin dong hi. “Topa in do inna, Keilah khua cu panin hi,” tin ti hi.

³ Mahnaven a miten David lakah, Judah ngam sungah lau tuk tampi nei nave hung, “Keilah khua ah hawhin, Filistin mite na do uh tale haksa dedeuh tuk hung,” tin ti haw hi.

⁴ Mah hangin David in Topa cu dong lehleu in Topa in, “Keilah ah Filistin mite cu do in hi, neh tuk ci,” ti hi.

⁵ Mah hangin David le a ngalkapte cu Keilah ah hawhin Filistin do haw hi. Filistin mite tampi thi haw in, a ngam tampi lonsak haw hi. Keilah khua cu David in pan bawk hi.

⁶ Ahimelek i capa Abiathar cu tai in, David lakah a hawh ten thiampi angki saupi keng hi.

⁷ Saul lakah, Keilah khua ah David heng hi tih a hilh haw ten Saul in, “Pathian in ka kut sungah koih zo hi, khuapi kulhtian tuah upmi le kongkhahah David cu amah le mah khahkhumdun zo,” ti hi.

⁸ Mah hangin Saul in, Keilah khua do tuk le David le a ngalkapte man tukin a ngalkapte cu sam khawng hi.

⁹ Saul in keimah do tum hi tih David in, a zak ten, “A thiangthomi angki cualpi hunpihin,” tin thiampi Abiathar cu ti hi.

¹⁰ David in “Topa aw, Israel Pathian, na salpa keimah hangin Saul cu Keilah ah hung tukin siatsuah khawng tuk hi, tin thei ing.

¹¹ Keilah khuasungmi ten Saul i khutah keimah hi pia haw ni maw? Ka theih bangin Saul cu hung ngangai ni maw? Maw Topa Israel Pathian, ka dotmi hi theitik zalin hi,” tin ngen hi. “Topa in Saul cu hung loli tuk hi,” tin don hi.

¹² David in, “Keilah khuasungmi ten Saul i khutah keimah le ka mihingte pia haw ni maw?” tin dong hi. “Topa in Pia haw tuk hi,” tin ti hi.

¹³ David le a ngalkap za lukte cu Keilah khua pen manlang zetin tulin tai haw hi. David tai zo tih cu Saul in, a zak ten a tumtahmi cu cawlleh hi.

David Hampalak Ah Um

¹⁴ David cu ngelhin, Zif khua elah um hi. Saul in, a sun a zanin David cu zei naven Saul khut sung heng tuk cu Pathian in phal ma hi.

¹⁵ Saul in thah bebel a tum hangin David cu a thinsu leleng hi. Zif khua el ngamkhing Horesh a tihmi haw munah David a umlaihin,

¹⁶ Jonathan cu a lakah hungin, a thinnau tuk ngawlin hilh hi.

¹⁷ David lakah, “Lau hihim pahsun. Ka pa Saul in that thei hihim tukma hi. Israel kumpi cangleh tuk ci a, kei vang nangmah sangtu hi tung hi. Mahmi cu ka pa in thei khawng leng hi,” tin ti hi.

¹⁸ Ngualcam pha a hihnak haw cu Pathian mai ah tiamdunleh haw hi. David cu Horesh ah umin, Jonathan cu innah pin hi.

¹⁹ Zif khua mi khenkhat cu Gibeah khua Saul lakah hawhin, “David cu ka ngam sungah umin, Judea ngamkhing hanglam mawk Hakhilah mual, Horesh tihmi munah ngelh hi.

²⁰ Maw kumpi pa, David man ngah tukin iti zahin deih ci tihvang thei khawng ung. Mah hangin ka ngam uhah hung inna, na mat ngah theihnak tukin ngaisung tuk hung hi,” tin ti haw hi.

²¹ Saul in, “Hi tizahta in kei ca na ngaihsut uh hangin Topa in muicu pia zal tahen.

²² Hawh unna, ilai kekah umin, akua in mu him tih vangciang vanglak un. David cu mi ngian neizet hi tih thei ing.

²³ A ngelhnak mun loli zei suak unna, pelh ngawlin ka lakah hilhleh un. Nangmu lakah hawh tung a, Judea ngam pumpi ah zei a kul vangin mah ngamah a umlaih a hih tak zei suak loli tung,” ti hi.

²⁴ Mah hangin tul haw in, Saul hen laih ngawlin Zif khua ah kik haw hi. David le a mihingte cu Judea hanglam mawk Maon ngamkhing a tihmi hawah um haw hi.

²⁵ Saul le a ngalkapte cu David zei tukin tul haw hi. Mah thu cu David in, a zak ten Maon ngamkhing a, suang tuah a dimmi luamah hawhin, mahlai ah um hi. Mah thu cu Saul in, a zak ten David cu hil hi.

²⁶ Suang hawkluam khatlam mualah Saul le a ngalkapte cu heng haw a, David le a mihingte cu lang khatlam mualah um haw hi. David le a mihingte cu man haw kawn tih lau in, tai haw a, Saul le a ngalkap ten hil ngut haw in pha awndiak haw toh hi.

²⁷ Mahlai takin, mi pa khat Saul lakah hungin, “Manlang kikin, Filistin miten a ngam uh do haw hi,” tin hilh hi.

²⁸ Mah hangin Saul in David cu hil ngawltohin, Filistin do tukin a kik hangin mah mun cu “Khehdunnak Mual,” tin samta haw hi.

²⁹ David cu hawh pepelin Engedi a tihmi haw munah ngelh hi.