1 SAMUEL 16 - Ngawm Bible

David Kumpi Tukin Sathau Thihnak

¹ Topa in Samuel lakah, “Itik can tian Saul hangin na lungsia tuk him? Israel kumpi a hihnak pen vawk zo ing. Mah hangin olif situi dawmno la inna, hunpihin hi. Bethlehem khua ah Jesse a tih haw pa i lakah hah tung. Itahim titale a capa tei lak pen pa khat cu kumpi tukin teng zo ing.”

² Samuel in, “Mahmi cu itin kaw ka bawl ngam tuk? Saul in, a thei tale keimah that tuk si,” ti hi. Topa in, “Khuino pa khat pui thah inna, Topa i lakah biakpiaknak pia tukin hung ing hi tin ti in hi.

³ Jesse cu biakpiaknak na piaknakah zawm inna, mah nungten na bawl tukmi cu hilh tung hi. Sathau thihin hi, ka tihmi pa cu kumpi hi tukin sathau thihin,” ti hi.

⁴ Topa i tihnak bangin Samuel in bawlin, Bethlehem ah hawh hi. Bethlehem khua sung um upa ten muak haw a, can thathahin, “Thupha tuah zin cim, sazapa?” tin dong haw hi.

⁵ “Hi zuh hi, Topa i lakah biakpiaknak pia tukin hung ing hi, tin Samuel in ti hi. Thiangthodun unna, ka lakah hung un,” ti hi. Jesse le a capate vang thianthohdun tukin hilhin, biakpiaknakah zawm hi.

⁶ A hen haw ten, Jesse i capa Eliab cu zo in, “Topa i sathau thih tukin a tenmi hi loli hi,” tin, a lungmu sungno in ngaisung hi.

⁷ Mahnaven Topa in, a lakah, “Mi dingsau le mipiangzet ahi vangin zo nuam pahsun. Amah cu ka vawk zo mi hi, itahim titale mihing tei zohdanin zo mang. Mihing ten a pualam zo uh ci, kei in, a lungmu haw zo ing.”

⁸ Jesse in, a capa Abinadab samin, Samuel lakah hunpih hi. Mahnaven Samuel in, “Mah kha ma, Topa i tenmi hi pa kha ma hi,” ti hi.

⁹ Jesse in, a capa Shammah pui in Samuel in, “Mah kha ma, Topa i tenmi hi pa kha ma hi,” ti leleu hi.

¹⁰ Jesse in, a capa salihte cu Samuel mai ah hunpih khawng naven Samuel in, “Pa khat mah Topa i tenmi hi haw ma,” ti hi.

¹¹ Samuel in, “Capa dang nei ma toh cim?” tin dong hi. Jesse in, “A nautabel pa umlaih naven hampa lakah tuucing,” ti hi. Samuel in, “Amah cu sam inna, hung hen. A hun laklawh Topa i lakah biakpiaknak pia hih tukma hung,” ti hi.

¹² Mah hangin Jesse in sam tukin mi hah hi. David cu mipiangzet, mi damzet tangvalno hi, a mit hahte phazet hi. Topa in Samuel lakah, “Ka tenmi pa cu amah hi, sathau thihin,” ti hi.

¹³ Samuel in olif situi la in, a unau tei mai ah David cu sathau thih hi. Topa i hawvang cu mah ni pepanin David lakah nase zetin heng hi. Mahnung ten Samuel cu Ramah ah pin hi.

Saul Inn Ah David Heng

¹⁴ Topa i hawvangin Saul cu zamsanin, Topa i hahmi hawvang siasuak ten Saul bawlsia haw hi.

¹⁵ A umlawh ten, “Pathian i hahmi hawvang siasuakin bawlsia hi, tih thei ung.

¹⁶ Mah hangin sazapa, thupia inna, tingtang tum thiamzet zei tuk ung hi. Khawhuai in, a mat ten amah in tingtang tum henna, phaleh tuk ci,” tin ti haw hi.

¹⁷ Saul in, “Tingtang tum thiamzet zei sak unna, hunpih un,” tin thupia hi.

¹⁸ A umlawhpa khatin, “Bethlehem khua mi Jesse in tingtang tum thiamzet capa pa khat nei hi. Amah cu mi ngalphazet le midiang zetin, ngaldo thiamzet le thuhilh thiamzet vang na hi. A lakah Topa um,” ti hi.

¹⁹ Saul in, Jesse lakah mi hahin, “Tuucingtu na capa David cu ka lakah hah zazalin hi,” tin cah hi.

²⁰ Mah hangin Jesse in sabittui saphaw thawl khat, keelno pa khat le cangho puatu laak pa khat tuah David cu Saul lakah hawhtik hi.

²¹ David cu Saul lakah hengin, Saul i nadektu in cang hi. Saul in David cu deih zetin, a hiamnam cawitu in bawl hi.

²² Saul in Jesse lakah, “David cu deihzet ing. Ka lakah um hih poh hen,” tin thucah hi.

²³ Pathian i hahmi hawvang siasuakin Saul cu manin, mah bangin a mat ten David in, a tingtang la in, a tum ten, Saul cu nemcuam deuhin damleh mek hi.