1 SAMUEL 13 - Ngawm Bible

Filistin Mite Do Haw

¹ Saul cu kumpi a deh pat ten kum sawm thum hi a, Israel kumpi cu kum sawm li le kum nih dek hi.

² Saul in Israel tei sung pen mihing thawng thum tengin, midang cu a inn hawah pintik hi. Mihing thawng nih Bethel mualhum ngam Mikmash a tih haw mi munah ama lakah koih hi. Adang thawng khat cu Benjamin ngam Gibeah khua ah a capa Jonathan lakah koih hi.

³ Gibeah khua ah Jonathan in Filistin ngalbawi thatin, mah thu cu Filistin miten za khawng haw hi. Saul in Hebru mite do tukin pengkul tumin, thuthan hi.

⁴ Filistin ngalbawi Saul in that hi tih le Israel mite cu Filistin ten nautatzet haw hi tih cu Israel mi hempoh tei lakah hilh khawng haw hi. Mah hangin ngaltho tukin sam a hih haw ten Saul umnak Gilgal ah hawh haw hi.

⁵ Israel mite do tukin Filistin mite cu khawmdun susuih haw in, ngaldonak cipuhleng thawng sawm thum, cipuh hum khung ngalkap thawng luk le tuipi mawk phil zah ngalkap hulawm haw hi. Bethaven pen nisuahnak lam a um Mikmash ah hawhin, mahlai ah cam haw hi.

⁶ Israel mite cu nase zetin do haw a, amthongin bawl haw hangin a khen cu suangholah le leikua le tuikhuk sungte ah ngelh haw hi.

⁷ A khenkhat cu Jordan ngun kaltanin Gad le Gilead ngamah heng haw hi. Saul cu Gilgal ah umin, amah tuah um langkhat hempoh vang lauthawngzet haw hi.

⁸ Samuel in, keimah ngak tukin hi tin, a tepsa bangin ni salih sung Saul in ngak hi. Samuel cu Gilgal ah heng thei ma hi. Saul cu a mihing ten zamsan li haw toh hi.

⁹ Mah hangin a lak hawah Saul in, “Halkang biakpiaknak le pawlkom biakpiaknak hunpih hem un,” ti hi. A hunpih haw ten amah in biakpiaknak cu pia hi.

¹⁰ A piak ceng bek ten Samuel cu heng hi. Samuel a hun bek ten Saul in muak tukin tul hi.

¹¹ Mahnaven Samuel in “I bawl kam?” tin ti hi. Saul in “Heng tung hi na tih hun ten na hen ngawl hangin le ka miten zamsan dedeuh haw in, Filistin mite Mikmash ah khawmdun susuih bok sih haw hi.

¹² Filistin miten Gilgal pen do haw tuk tih ka up hangin le Pathian bopnak vang ka nget laih ngawl tak biakpiaknak ka pia ma tale hi thei ma toh tih ka ngaihsut hangin keimahno in biakpiaknak pia ing,” ti hi.

¹³ Samuel in, “Na bawlmi hi silhahzet hi. Topa na Pathian i thupiakmi zui ma ci. Na zui bang ahin nangmah le na casuante Pathian in, a kumkhua in Israel uktik tuk naven.

¹⁴ Mahnaven atu-in, na uknak cu ngeiphat tukma hi. Pathian in ama deihmi mihing zei in, a mihingte uktu tukin bawl tuk hi. Itahim titale Topa i thu ngai ma ci,” ti hi.

¹⁵ Samuel cu Gilgal pen tul hi. Midang hempohin Saul cu zui haw in, a ngalkap tei lak pen Saul le mipi cu hawh haw hi. Gilgal pen Benjamin ngam a um Gibeah ah hawh haw hi. Saul in, a ngalkapte cu khawmin, za luk ting haw hi.

¹⁶ Saul le a capa Jonathan le a ngalkapte cu Benjamin ngamsung Geba khua ah cam haw hi. Filistin mite cu Mikmash ah cam haw hi.

¹⁷ Filistin ngalkapte cu ngaldo tukin a hah haw ten hon thumin khen haw hi. Hon khat cu Shuak ngam Ofrah khua lamah hawh haw hi.

¹⁸ Hon nihnak cu Beth Horon khua lamah hawh haw hi. Hon thumnak cu Zeboiim ngamkhing pen ngalkhat lam ngam sungah hawh haw hi.

¹⁹ Mah hunlaihin, Israel ngamsung a pumsu pa khat hei um haw ma hi; itahim titale Filistin miten nam le ceipi suk tuk ngawlin kham haw hi.

²⁰ Israel mite cu tuman, phailai, heipi le namtongte hiamzet suk tukin, Filistin mitei lakah hawhpih haw hi.

²¹ Heipi le namtong sukman cu ngun tangka tamat hi, tuman le phailai sukman cu ngun tangka nga-mu hi.

²² ngal a dodun haw ten Israel tei lak pen Saul le a capa Jonathan sial ngawl nam le cei a neitu um haw ma hi.

²³ Mikmash lampi cingtu tukin Filistin miten ngalkap hon khat hah haw hi.