1 PETER 2 - Ngawm Bible

A Nungmi Suangpi le Miphun Thiangtho

¹ Mah hangin phat ngawlnak hempoh vawk khawng toh un; zolthu sonleh toh pahsuh un; ultungleh toh pahsuh un; mi iksikleh toh pahsuh un, nautatnak awnkamte mangleh toh pahsuh un;

² Nau hinsemno bang un; hawvang nawitui cu duhzet un; mah nawitui na in uh hangin khangin, nunpatnak ngah tuk uh ci.

³ Lai Thiangtho i tihnak bangin, “Mi hehpih theitu Topa i hihnak tep ngah zo uh ci.”

⁴ Topa i lakah hung un; Amah cu mihing ten nemcuam ma hi tin, a lawl haw hei in Pathian in, a sunglawi tin, a tenmi a nungmi suang hi.

⁵ Nangmuhte vang hung bok unna, a nungmi suang bangin Hawvang biakinn saknak tuk Pathian i manmi suang hi un. Mahlai ah thiampi thiangtho nadeh dek tuk uh ci; co takmi Hawvang biakpiaknak khi Jesuh Khrih hangin Pathian nelah pia tuk uh ci.

⁶ Itahim titale Lai Thiangtho in, “Suang manpha pa khat teng ing a, innkil suang tukin Zion ah koih ing. Amah a umtu hempoh cu ituk mahten mualpho haw tukma hi;” ti hi.

⁷ Thu umtu nangmuh tei ca in suang manpha hi. Mahnaven umngawltu tei ca in, “Inn satu tei nemcuam ma tin, a lawl haw mi suang cu man neibel suangin suak hi,” tihmi khi hi.

⁸ Mahten Lai Thiangtho mundangah, “Hi Suang hi, mitei lup le bahnak suangin cang tuk hi,” tin um hi. A bahnak haw cu Thuthangpha a up haw ngawl hangin hi; mahtin a um haw cu Pathian i tuptahmi hi.

⁹ Mahnaven nohte cu tensa miphun, Kumpipa i thiampi, miphun thiangtho, Pathian i miphun hi uh ci. Khuathim sung pen thasiahhuai vaknak sungah a samtu Pathian in nalamdang a bawlmite tangau pih tukin a tenmi hi uh ci.

¹⁰ Ni dang laihin Pathian i mihing hi kha ma uh ci, mahnaven atu-in amata hi uh ci; Ni dang laihin Pathian hehpihnak thei ma uh ci; mahnaven atu-in, a hehpihnak co zo uh ci.

Pathian i Silate

¹¹ Ka ihmi ka ngualcamte, hi leihumah mikhual le ngaltaimi bangkek hi nave uhcin, nangmuh tei lakah hehpih kun ing. Hawvang tuah a ngaldun lelengmi tisa i deihnakin neh pahsuh hen.

¹² Pathian a um kha ngawl tei lakah zohteh tak tukin nung unna, phat ngawlnak a bawltu tin sual a nawn haw hei in, na ngamtat phatnak uhte mu in, Pathian a hunleh ni ten amah cu thangphat haw tuk hi.

¹³ Topa hangin nangmu humah thuneitu bawi tei thu khi ngai un; a sangbel a, thuneitu kumpi thu khi ngai un.

¹⁴ Mahten khua le ngamuktu bawi upa khi mipha ngawlte dantattu tuk le phatnak bawltute pahcawitu tukin nadeh piakmi a hih haw hangin a thu haw ngai un;

¹⁵ Itahim titale imah thei ngawlin a umtu misil tei awnkamte cu a ngamtat phatnak uhin neh tahen, tih cu Pathian i deihsakmi hi.

¹⁶ A luatmi bangin nung un; mahnaven na luatnak uh cu phat ngawlnak huptu in bawl pahsuh un, mah sangin Pathian i sal bangin nung saw un.

¹⁷ Mi hempoh upat un, thu umtu unaute it un, Pathian cu kihca unna, kumpi cu upat maizahnak pia un.

Khrih i Thuaknakte Tehkip Un

¹⁸ Silate, na bawi tei thu khi ngai unna, upat un; hehpihnak le ngaihsak dunnak a neite bek upat ngawlin bawi pha ngawl ahi hei in, a thu ngai un.

¹⁹ Pathian deihnak na theih uh hangin na tawh tuk uh ngawlmi haksatnak na thuak uh tale Pathian in thupha muicu pia tuk hi.

²⁰ Sualnak na bawl uh hangin na thuak hihim tuk uhmi vah le dennak na thuak uh tale na ca uhin, i nemcuamnak um him? Mahnaven phatnak bawl leng napi in, na thuak uh tale Pathian in thupha muicu pia tuk hi.

²¹ Mahtibang haksatnak thuak tukin Pathian i sammi hi uh ci; itahim titale Khrih amah loli in, nangmu ca haksatnak thuakin, a ke kal na zui theihnak tuk uhin zohteh tuk a zammi hi.

²² Khrih in sualnak imah bawl ma hi, a kam pen zolthu son hi tihvang miten thei awng haw ma hi.

²³ Miten a zotsak haw ten, zawnsakleh bokma hi. Haksatnak a thuak ten lulleh ma hi. Mahnaven dikcang zetin thu a khentu Pathian saw muang hi.

²⁴ Khrih in ama pumpi loli tuah a sualnakte uh cu thinglamteh humah a henpih zo hangin ohte cu sualnakah mithi hi zo nave hung diknak sungah a nung tuk mite hung hi. A thuaknak liammate hangin damnak ngah zo uh ci.

²⁵ Lampaimi tuu bangin lampai zo uh ci; mahnaven atu-in nangmu hawvang khaltu le cingkhawitu Topa i lakah kihlehtikmi hi zo uh ci.