1 PETER 1 - Ngawm Bible

¹ Jesuh Khrih i tiikmi keimah Peter in Pontius, Galatia, Kappadosia, Asia le Bithinia peng a ngaltai bangin a vakkekmi, Pathian i tenmite nangmu lakah laikuat ing.

² Jesuh Khrih i thu na zuinak tuk uhin le ama thisan tuah a thiantikmi na hih theihnak tukin nohte cu Pa Pathian tuptahnak bangin tenmi le ama hawvangin mi thiangtho ah a bawlmi hi uh ci. Pathian hehpihnak le lemdaihnak cu nangmu lakah lawhting zetin um tahen.

A Nungmi Muansannak

³ Topa Jesuh Khrih i pa le a Pathian cu thangphat nung. A hehpihnak hangin Jesuh Khrih cu thihnak pen tholehtik a, nunnak thak pia zo hi. Mah hangin ohte cu a nungmi muansannak tuah dimin,

⁴ Pathian in, a mihing tei ca a koihmi lo le lam co tukin ngakhel zetin um ung hi. Mah lo le lam cu nangmu ca vancungah koihsakin, a sia thei ngawlmi kuamah i nguk theih ngawlmi le a muat thei ngawlmi hi.

⁵ Hun dawlbel ten langtik tukin, atu a koihsami nunpatnak cu upnak hangin Pathian i huham tuah cinkhawimi nangmuh tei co tukmi lo le lam hi.

⁶ Mah hangin lungdam un. Haksatnak a phunkim na tawh uh hangin hun comno sung thasia in, na um uh vangin lungdamin um sesem un hi.

⁷ Itahim titale hi haksatnak na thuak uhmi cu na upnak uh a ngangai maw, a ngangai ma him tih theihnak tukin hi. A sia theimi sui hei khi mei tuah khingkhai haw hi. Mahti bang bokin sui sangin a sunglawi saw mi na upnak uh cu haksatnak a thuak zotu hi tukin thiathazoh kul hi. Jesuh Khrih a lang Ni ten thangphatnak, sunloihnak le upatnakte ngah tuk uh ci.

⁸ Amah cu mu awng ma nave uhcin it uh ci, mu ma nave uhcin um uh ci. Mah hangin kam hei son zawh ngawlmi a sunglawimi lungdamnak nei uh ci.

⁹ Itahim titale Jesuh Khrih na upnak uh hangin tumtahnak na neih uhmi, hawvang nunpatnak cu co ngah tuk uh ci.

¹⁰ Hi nunpatnak thu hi profet tei zeimi le a dotkan lih haw mi thu hi. Pathian in, a piak tukmi hehpihnak laksawng thu cu profet tei hilh hamsami hi.

¹¹ Ituk ten kaw mah hun cu a hen tuk tin zei suak tukin a tumtah haw mi hi. Amu sungah a ummi Khrih i hawvangin, Khrih i thuak tukmi haksatnak le mah nungten a co tukmi sunloihnak thu a hilh ham ten atu hun hi, a son nuammi hun hi.

¹² Profet tei nadehnak cu amuh tei nemcuamnak tuk hi ngawlin nangmuh tei ca tukmi saw hi, tihmi Pathian in amuh tei lakah langtik hi. Mahten profet tei a hilh haw mi cu atu-in vancung pen a hahsukmi Hawvang Thiangtho i huham hangin Thuthangpha a phuangtu tei lak pen na zak uhmi hi. Hi thu hi vancungmite hei in, a theih nuam haw mi thu hi.

Nun Thiangtho Tuk

¹³ Mah hangin nadek pan tukin na lungmu uh tuangtim sa in um un, ngalling sa in um unna, Jesuh Khrih a lang ten na ngah tuk uhmi thupha muicu laksawng humah na ngaihsutnak uh a venghawngin nga un.

¹⁴ Pathian deihnak zui unna, na theih laih ngawl uh hun a, na neih uhmi tisa deihnakin, na nunnak uh ukleh toh pahsuh hen.

¹⁵ A samtu Pathian cu Pathian Thiangtho a hih bang bokin, nisial na nunnak uhah thiangtho zetin nungbok un.

¹⁶ Lai Thiangtho sungah, “Keimah ka thiangtho bang bokin nangmuh vang thiangtho bok un,” tin um hi.

¹⁷ Pathian nelah thu na nget uhten ohtei Pa tin sam uh ci, mah na Pa uh cu mi hempoh deidatnak nei ngawlin amuh tei nadehnak bangkekin, thukhen tuk hi. Mahtibang a hih hangin hi leihum na nunsung uhah amah kihcaknak tuah ama ca in nung un.

¹⁸ Na pu le pa tei lo le lam a zap haw mi le nemcuamnak a um ngawlmi na nundan uh sung pen a suakcatiktu cu ihim tih thei leng uh ci. A sia theimi sui le ngun bang kha ma hi.

¹⁹ A luattiktu cu a sunglawimi, Khrih thisan hi; Khrih cu sonbang ngawl, a thiangthomi tuuno bang hi.

²⁰ Amah cu leipi semsuah laih ngawlin Pathian i tensami hi, atu nangmu ca tukin ni dawlbel hun a, Pathian i langtikmi hi.

²¹ Amah hangin Pathian muang uh ci, Pathian in amah cu thihnak pen tholehtikin, sunloihnak pia hi. Mah hangin na upnak uh le na muansannak uh cu Pathian humah a phutmi hi uh ci.

²² Atu-in, thutak na zuinak uh hangin thianthohtikmi hi zo uh ci, umtu unau dang khi lungmu takin it uh ci. Mah hangin na lungmu tak uh tuah pa khat le pa khat itdun un.

²³ A nungmi le kumkhua a khomi Pathian awnkam hangin hinthakmi hi zo uh ci. A thi theimi, nu le pa tei cate hi lehma toh uh ci. A thi thei ngawlmi i cate hi zo uh ci.

²⁴ Lai Thiangtho in, a tih bangin, “Mi hempoh hi hampa bang thong hi. A sunloihnak haw vang hampa lak a, pak bang thong hi. Hampate cu ko a, paakte cu thiimin, zuk haw hi.

²⁵ Mahnaven Topa i thu cu kumkhua kho hi.” Nangmuh tei lakah a phuanmi Thuthangpha cu hi thu hi, hi.